Kreu i LDK-së Isa Mustafa mori 65 vota për postin e kryeparlamentarit në seancën konstituive të Kuvendit të Kosovës, por nuk mori asnjë urim nga përfaqësuesit e institucioneve vendore dhe ndërkombëtare. Mustafa mori urime vetëm nga kreu i Kuvendit të Shqipërisë, Ilir Meta dhe kreu i PD-së, Lulzim Basha.
Ndërkohë, sot Partia Demokratike e Kosovës a ka dorëzuar në Gjykatën Kushtetuese çështjen e zgjedhjes së Mustafës në krye të Kuvendit të Kosovës. Partia e drejtuar nga Hashim Thaçi pretendon se zgjedhja e djeshme e kryetarit të LDK-së në postin e kryeparlamentarin është bërë në kundërshtim me Kushtetutën e Kosovës dhe se ka pasur shkelje të Rregullores së Punës së Kuvendit. Hashim Thaçi ka thënë se vendimet në Kuvendin e Kosovës, që dolën nga një proces antiligjor, antidemokratik dhe antikushtetues janë të pavlefshme dhe të barabarta me një zero të madhe.
Ndërkohë, kryetari i Gjykatës Kushtetuese, Enver Hasani në një intervistë dhënë muajin e kaluar për emisionin “Rubikon”, ka thënë se çështja e propozimit të kryeparlamentarit dhe ajo e grupeve parlamentare nuk bie në domenin e instancës më të lartë gjyqësore në vend.
Nga ana tjetër, zyra e presidentes, Atifete Jahjaga, ka njoftuar se do ta presë vendimin e Gjykatës Kushtetuese për çështjen e kryeparlamentarit, për ta mandatuar më pas formuesin e Qeverisë.
I pari i Vetëvendosjes Albin Kurti ka thënë se ai nuk beson që Gjykata Kushtetuese do të marrë një vendim të paanshëm dhe profesional rreth ngjarjeve të fundit në Kuvend. Ai ka shtuar se nuk është optimist që kjo gjykatë do të dalë me një vendim të drejtë, megjithatë bindja personale e tij është grupi LKD-AAA-Nisma janë grupi më i madh parlamentar.
Përkundër këtyre zhvillimeve, kryetari i LDK’së, Isa Mustafa, ka nisur sot zyrtarisht punën si Kryeparlamentar. Ai ka arritur në zyrën e tij në Kuvend qysh në mëngjes dhe është në përgatitje të thirrjes së seancës së re të Kuvendit.
Mbajtjen e seancës për konstituimin e Kuvendit, e kanë përcjellë shumë shkelje. Kështu thotë Driton Selmanaj, nga instituti Demokratik i Kosovës (KDI), për të cilin thotë nga shumë shkelje që janë bërë në Kuvendin e Kosovës, është vështirë të kompletohet një veprim i veçantë i shkeljes. Selmanaj ka thënë se pothuajse nga fillimi i seancës ka pasur skenarë të dyanshme, nga subjektet politike, që të shmanget rregullorja e punës së Kuvendit.