Nga Petrit Kuçana
Ngjan si i pabesueshëm lajmi për heqjen e të drejtës ekskluzive në Aeroportin e Rinasit. Të paktën për emigrantët që e “shijojnë” në çdo udhëtim të tyre kriposjen e çmimeve, ngjan një lajm i rremë, në mos një vrazhdësi që kalon dhe harrohet. Nuk janë vetëm temperaturat thuajse të pazakonta të Londrës që të çojnë të mendosh për pushimet verore, ku Rinasi mbetet kryefjalë e që krejt natyrshëm anashkalohet, me një shikim disa sekondash të çmimet të biletave, duke u zëvendësuar me aeroportet e shteteve fqinjë, që janë të paktën gjashtë.
Kryebashkiaku Erion Veliaj na kujtoi Rinasin këto ditë. Ishte një vizitë e kryebashkiakut në Londër, që shërbeu si yshtje dhe jo thjesht për përmbajtjen e një lajmi që patjetër do të prodhonte. Ai është takuar më ca arkitektë, dhe sipas lajmit “ka marrë ca ide falas” për zhvillimin e Tiranës.
Të paktën për emigrantët e këtushëm nuk ka ndonjë lajm në këtë mes (për të mos hyrë në komentet e mëtejshme, se sa pjesëmarrës ishin, kush ishin etj etj). Lajm mund të përbëjë fakti se janë të paktën 10 arkitektë shqiptarë në Londër që operojnë me kompanitë më prestigjioze të Londrës, madje njëri prej tyre Përparim Rama ka fituar çmim ndërkombëtar si arkitekti më i mirë… por asnjë prej tyre nuk ishte në atë takim, ku krye bashkiaku Veliaj paska folur për Tiranën.
Sa i ka kushtuar bileta krye bashkiakut Veliaj?
Nuk dihet se cili do të jetë justifikimi për këto çmime të tmerrshme të Rinasit (gjithkush mund të shohë në internet që çmimi për një biletë Londër-Rinas barazohet më një biletë Londër New York) pasi deri më tani mallkonin me të parë e të fundit Fatos Nanon për koncesionin e dhënë nga qeveria e tij, e madje llogariteshin edhe vitet e mbetura, për t’u çliruar, për t’u bërë të paktën si rajoni. Cili vend i rajonit ka më shumë “emigrantë” sesa Shqipëria?
Çfarë do të ndodhte nëse z.Veliaj të “hiqte njollën e turpit” si kryebashkiaku i kryeqytetit me çmimet më të shtrenjta do të vazhdonte negociatat me kompanitë lowcost?
Minimumi nuk do të kishte pd-ist , berishist, , ballist, zogist, socialist apo rilindas që nuk do t’i thoshte “bravo” (duke huazuar një term Tirons). Thua të jenë vetëm emigrantët që nuk i kuptojnë këto vizita të krye bashkiakut? Cili rilindas nuk do të mërzitet kur ulet të presë biletën për në kryeqytetin e dashur? U thanë ca lajme që është dhënë përsëri me koncesion deri më 2027 pa të drejtë ekskluzive. Lajm? Çfarë realisht do të thotë ky lajm? Ulen gjë biletat?…
Nuk do të duhet të shkojmë në Greqi, Turqi apo Kroaci për të parë fqinjët me fushatat e tyre për marrjen e turistëve anglezë. (A ka njeri t’i thotë kryebashkiakut që çmimi i një bilete Tiranë-Rinas është i baras vlefshëm me të paktën një jave pushime (çift) në Turqi të gjitha të përfshira, biletë, hotel dhe mëngjes). Po futu njëherë ne internet dreqi e mori.
I ramë shumë në qafë kryebashkiakut? Epo të paktën si mjeshtër i PR-it të bënte një përpjekje qoftë edhe nga ato që përbëjnë vërtet lajm…qoftë edhe për të justifikuar vizitat në Londër. Imagjinoni nëse Z.Veliaj do i paguante biletat nga xhepi i vet, jo instalacion që nuk do t’i shkonte në mend, por me biçikletë do të nisej drejt Malit të Zi, ose drejt Maqedonisë që t’i pyesë homologët e tij, se si ja kanë arritur që t’i kenë biletat aq të lira dhe të kenë jo një por dy aeroporte.
Ndoshta do të ndjehej i turpëruar që bie fala Mali i Zi që ka gjysmën e banorëve të Tiranës ka në funksionim dy aeroporte. Do të turpërohej kur të shikonte se gjatë muajve të verës aty zbarkojnë emigrantët shqiptarë, e nëse do të denjonte të pyeste tek kompanitë që japin makina me qera, do të kuptonte se pa shqiptarë ato nuk mund të mbijetonin.
Mbase nuk do të çuditej se pse përveç Podgoricës ata e hapin edhe aeroportin e Tivarit. Të njëjtën gjë do të shikonte edhe në Shkup e nëse nuk do të përtonte do të pyeste se si funksionon aeroporti i Ohrit dhe do të mësonte për “furnizuesit” me të ardhura në këto shtete dhe krejt natyrshëm nuk do t’i shkonte ndërmend për instilacionin “Reja” nga ata më ekstravagantet që t’i merrte nga Londra, por do të kapte nga kollarja ministra e zv-ministra e çdo zyrtar përgjegjës që kapardiset me taksat e shqiptarëve, derisa të arrinte të kthente Rinasin në normalitet, së paku si vendet fqinjë.
(Vetëm një kërkim në internet rezulton se një biletë kthimi në verë nga Londra në Tiranë është rreth £800 sa rroga mujore e krye bashkiakut).
E megjithatë emigrantët shqiptarë do të vijnë në Tiranë, në mos nga aeroportet e vendeve fqinjë, do ri-përsëritin aventurën treditore me makina, duke i rënë mes përmes kontinentit. Por një gjë është e sigurte; Nuk do u bie ndërmend për iniciativën krejtësisht inovative për të marrë insalacionin Reja nga Londra, por do ta gjejnë dhe do ta lënë zotin Veliaj kryebashkiakun e aeroportit më të shtrenjtë jo vetëm të rajonit.
E mbase nuk do të çuditen aq shumë nëse z.Veliaj do të rikthehet sërish në Londër me ndonjë ide tjetër më gjeniale se instalacioni “reja”, qoftë edhe për të folur për turizmin…
