Zef Shtjefni
Veshët e shqiptarëve çfarë nuk kanë dëgjuar nga goja e Berishës dhe çfarë nuk kanë dëgjuar nga goja e ndjekësve dhe zëdhënësve të tij për kundërshtarët politikë këto vite. Ata kanë menderosur Kuvendin, foltoren e PD-së, ekranet e medieve, faqet e gazetave dhe çdo gjë që kanë mundur. Me libër shtëpie kanë sharë, kanë ofenduar, kanë denigruar, kanë kërcënuar, kanë akuzuar, kanë mashtruar dhe shpifur për Nanon, për Mejdanin, për Majkon, për Metën dhe tani të njëjtin refren po e dëgjojmë për Ramën, për Tahirin dhe për këdo që u del përpara apo që u ngjall zili në qeveri dhe në PS.
Një nga këta partizanë dhe ndjekës i devotshëm i Berishës ka vite tashmë që është bërë edhe Strazimiri i Durrësit, i cili erdhi nga hiçi dhe zuri vend në krahun e djathtë të tij në Kuvend, madje duke sfiduar të tjerët në PD nga agresiviteti, tehu dhe helmi i gjuhës kundër palës tjetër. Berisha nuk e zgjodhi Strazimirin si intelektual në ekipin parlamentar, por si njeri të fortë, të sertë, të egër, të ashpër, për ta përdorur ndaj kundërshtarëve politikë.
Kjo bëri që edhe partitë e tjera politike të zgjedhin për balancë me Berishën njerëz nga e njëjta kategori. Dhe ja rezultati që kemi tani. Si gjithmonë Berishës pështyma që hedh sipër kundër të tjerëve, i kthehet dhe i bie në fytyrë. Ia rrahën atë që ka zgjedhur për të fortë, atë që ka zgjedhur për të sharë, për të shpifur, për të fyer dhe për të poshtëruar të tjerët.
Tani kërkojnë të justifikohen dhe të fajësojnë Ramën edhe për këtë bukë që kanë gatuar vetë, njësoj si ata që duan të kacavaren pas xhamave. Në xhama nuk kacavaresh dot, ndaj edhe Ramën e përziejnë kot së koti në këtë punë, siç e akuzojnë kot së koti edhe për shumë gjëra të tjera, duke humbur kështu pikë. Strazimirin e rrahën se e kërkoi vetë, se e mbushi kupën Berisha. Ua bënë për borxh të gjithëve në PS e ndoshta dhe në PD.
Sharës të tillë do t’i rrihnin edhe në parlamentin italian, grek, bullgar, çek dhe belg. Berisha e ka marrë pas vetës Starzimirin për të sharë dhe për t’u rrahur, pasi gjë tjetër nuk kemi parë se di të bëjë ky deputet tani me dy legjislatura. Në pamje të pare, duket se me këtë arsyetim po përpiqem të justifikoj dhunën në parlament, grushtet dhe shpullat e Ndokës dhe të Ndreut të PS-së kundër Strazimirit të PD-së.
Nuk kam ndër mend ta bëj këtë, sepse mendoj se me dhunë veç përkeqësohen gjërat. Në fakt kështu i ndodhi edhe Ramës, edhe PS-së, edhe PD-së, edhe vetë të tre aktorëve të përfshirë në dhunë. Rama gjendet keq dhe nuk di çfarë të thotë për prokurorinë dhe as se si të mbrojë deputet e vet. PS-ja dhe mazhoranca Rama-Meta kanë veç humbje me opozitën jashtë Parlamentit. Opozita vetë ka humbje, jo vetëm prej rrogave të humbura të deputeteve të saj, tani e sa muaj, por dhe sepse i mungon foltorja e Parlamentit për të thënë fjalën e vet dhe për të përfaqësuar zgjedhësit.
Kjo pra, është rruga ku të çon strategjia e sherreve që mbjell Berisha. Ndokën dhe Ndreun nuk mund t’i marrë në mbrojtje njeri dhe këtë ata e dinë mirë përderisa vendosën të ngjiten në shkallët e politikës. As nuk mund t’ua ndryshojë atyre kush biografinë e jetës dhe të punës, pasi e kanë shkruar vetë dhe për to janë gjykuar nga shoqëria, e cila i ngjiti më pas deri në sallën e Parlamentit. Por t’u thuash mafiozë dhe kriminelë atyre, më duket se është njësoj sikur të thuash se Liqeni Artificial është det.
Ndokajt janë një fis i madh dhe ndonjëri prej tyre ka bërë dhe zullume në Lezhë. Por pjesa dërrmuese e tyre janë njerëz të varfër dhe mezi mbyllin muajin me rrogën e ndonjë familjari që punon. Por ajo që të bën më shumë përshtypje këtu është kulti i Berishës në vlerësimin e njerëzve. Kur ato punojnë me dhe për Berishën, janë njerëz të mrekullueshëm dhe ai i emëronte në detyra të rëndësishme nëpër institucionet e shtetit.
Kur janë në krahun tjetër të politikës, ai i quan mafiozë. A mund të besohet ky njeri kur thotë se ish-zv/drejtori i Përgjithshëm i Policisë së Ndërtimit të qeverisë së tij, i cili ka kaluar me PS-në, është mafioz? Janë mësuar ushtarët e Berishës me sharje ndaj Majkos, me kurthe dhe pengje në Tropojë ndaj Metës, me akuzat të çmendura dhe me burg ndaj Nanos, me kapjet prej zhelesh të Ballës dhe Braçes, me laviret e bulevardit, etj.
Por ja që vjen dita dhe të “ndesh hunda në lesh”, pasi ka njerëz që nuk ta durojnë sharjen dhe provokimin. Duke e parë që ranë vetë në kurthin që ngritën për të tjerët, duke u mundur keqas me armët e veta dhe pasi u shkoi “shtatë në qase”, ata kërkuan ndihmë nga kori mbrojtës i të gjithë grupit parlamentar të PD-së dhe e bojkotuan Parlamentin.
Unë këmbëngul të them se Berisha dhe Strazimiri ka kohë që po i kërkojnë vetë grushtet dhe shpullat, por thjesht nuk e besonin se mund t’u vinin. Ndaj, mendoj se ata duhet të rikthehen në Parlament dhe të sillen si njerëz dhe si opozitarë, në mënyrë që të mos guxojë t’i sulmojë fizikisht njeri dhe të kenë mbrojtjen e prokurorisë dhe të të gjithë popullit me kauza të drejta.
