Nga Skënder KAPITI
Është një periudhë relativisht e shkurtër kohore që nga 23 Qershori 2013 kur vota popullore e ndëshkoi ashpër regjimin e pushtetit autokrat të Berishës për të bërë një bilanc të qeverisjes së Rilindjes, por pavarësisht kësaj, ndryshimin ndërmjet para dhe pas kësaj date që shënon një pikëkthesë, ndoshta pse jo dhe fundin e ndarjen me tranzicionin dhe fillimin e një Rilindje nuk është vështirë për ta konstatuar. Së pari kjo vërehet në atë që BE ia dha Shqipërisë Statusin e Anëtarit Kandidat pas disa muajsh të ardhjes në pushtet të PS-së, dhe kjo në radhë të parë erdhi për besimin që krijoi Europa në atë që pikësëpari kjo qeverisje filloi me ndarjen si politikë pushteti me korrupsionin gjithëinstitucional të instaluar në sistem nga ish regjimi korruptivo – kleptokratik i PD-së; erdhi për shpresën dhe besimin që Europa ka në suksesin për reformat në administratë dhe sidomos në drejtësi që ka filluar dhe po kryen politika e re në pushtet; dhënia e statusit erdhi dhe si një inkurajim dhe si një mbështetje e deklaruar po dhe e dhënë hapur nga institucione dhe prej personaliteteve kryesore të drejtuesve të qeverive të shteteve të Europës e sidomos e kryeministres gjermane znj. Merkel, të cilët shohin me besim se në Shqipëri ka vullnet dhe dëshirë e impenjim serioz nga qeveria aktuale për të përmbushur vlerat dhe standartet moderne demokratike, politike dhe ekonomike që kërkon BE. Sikurse, pra që edhe duket, ashtu si verdikti i popullit priti me padurim datën e zgjedhjeve për t’u ndarë me politikën e vjetër, po ashtu në mënyrën se sa shpejt dhe menjëherë pas ndëshkimit popullor të ish pushtetit edhe Europa sikur e paska mezipritur këtë fakt për të na dhënë Statusin. Shteti ka filluar të marrë natyrën humane pasi ish pushteti ja kishte dhënë atë antihumane, ish pushtet i cili e bëri shtetin produkt dhe vegël e pronë private ashtu siç dhe e përdorte dhe shoqërinë ; ish pushtet i cili keqfunksionoi dhe e bëri shtetin dhe shoqërinë të funksionojnë keq sepse ato drejtoheshin nga korrupsioni mirëfunksional i atij ish pushteti. Ndërsa sot politika dhe korrupsioni që identifikoheshin me njëri-tjetrin para 23 Qershorit kanë filluar të ndjehen të tulatura, të frikësohen dhe të kërcënohen nga ligji dhe drejtësia, dhe politikën e keqe dhe korrupsionin e saj e ka zënë paniku i ndëshkimit ligjor për dëmet, vjedhjet, zullumet, krimet dhe skandalet që i kanë bërë shtetit dhe shoqërisë. Korrektësia demokratike, proceduralizmi demokratik, konstitucional dhe ai institucional e ligjor, transparenca qeverisëse e sotme e ka çliruar demokracinë, lirinë, ekonominë, shtetin dhe shoqërinë nga sundimi i autoritarizmit injorant politik e pushtetor, nga nepotizmi e klientelizmi, nga intoleranca, nga kundërintelektualizmi, nga presioni e tensioni politik . “Trimëroshat” dhe “guximtarët” mafiozë të politikës së ish pushtetit janë strukur e janë bërë frikacakë nga frika se mos ligji do veprojë mbi ta. Opinioni dhe shoqëria civile janë zgjuar dhe janë çliruar, dhe kanë filluar të veprojnë e të guxojnë për të vepruar, kundërshtuar dhe reaguar si një antipolitikë kundër politikës egoiste e negative dhe jotransparencës së pushtetit; gjë e cila vjen në kundërshti me faktin se para 23 Qershorit shoqëria civile, ligji dhe drejtësia ishin të prangosura e të paralizuara dhe nën mbikqyrje e nën sundim të ish pushtetit dhe të korrupsionit. Sot pushteti nuk harxhon kohë dhe para kot për t’i bërë reklamë e lobingje vetes për krijimin dhe rritjen e imazhit të vet, por punon siç dhe e ka për detyrë sepse për atë është dhe i votuar, për të punuar për Shqipërinë, shoqërinë, për demokracinë, për patriotizmin real, për shtetin ligjor, për zhvillimin, integrimin, punësimin etj., të cilat ishin mbërthyer nga vargonjtë e politikës së vjetër kundërpublike dhe të korruptuar dhe trumbetoheshin prej saj vetëm për mashtrim publik dhe si gënjeshtra reklame, fasadë e propagandë të neveritshme. Sot, pra pas 23 Qershorit 2013, shoqëria civile, administrata shtetërore, policia, biznesi dhe “ushtria” e nxënësve, studentëve, mësuesve, mjekëve etj., e kanë fituar “pavarësinë” dhe nuk janë të kërcënuara nga tensioni dhe presioni socio-ekonomik dhe as nga manipulimi e kërcënimi me varfërinë dhe me vendin e punës, dhe nuk përdoren më si vegla dhe material njerëzor rutinë për të mbushur rrugët dhe sheshet nëpër inagurime e stërinagurime të improvizuara dhe bajate që bënte ish pushteti, nuk përdoren më si reklamë për imazh të pushtetit nëpër mitingje, kundërmitingje e festa ekzaltuese të pushtetit, i cili pa kursim për të tilla gjëra shpenzonte lumë paranë publike. Politikës aktuale në pushtet, verdikti i popullit që ishte i përmasave të një revolucioni qytetar, demokratik e paqësor i ka besuar qeverisë dhe parlamentit të sotëm të drejtën për të bërë gjithçka ligjore edhe pa nevojën e opozitës, pasi i tillë dhe kaq i madh ishte konsensusi popullor dhe opinioni qytetar, pasi dhe aq shumë u zhgënjye populli nga ai ish pushtet. Ndërgjegjësimi i opinionit qytetar dhe verdikti e ndëshkimi që sovrani i dha turpeve dhe skandaleve të shekullit me autor ish pushtetin e PD-së ishte një ndëshkim i merituar që erdhi edhe natyrshëm, dhe prandaj ishte dhe i asaj përmase sa që duket sikur regjimi i PD-së vetëdoli apo u vetënxor “jashtë ligjit”prej papërgjegjshmërisë, korrupsionit, tradhtisë dhe skandaleve publike të veta. Por mazhoranca e sotme në pushtet nuk e shfrytëzon këtë fakt për ta injoruar dhe për të mos e respektuar opozitën mjerane, po e fton, e pret dhe e toleron atë me një durim tejet demokratik për konsensus dhe për kontribut në reforma dhe ligjbërje siç ishte rasti për reformën territoriale; sjellje këto që vijnë në antitezë me të shkuarën e para 23 Qershorit ku ish pushteti përdorte jo vetëm dhunën e kartonit parlamentar por dhe kërcënimin e presionin ndaj opozitës, brutalitetin dhe kërcënimet e fjalorin shpifës e denigrues verbal e brutal kundër saj, matrapazllëqet e fëlliqura politike e deri dhe puçet institucionale e administrative për të rrëmbyer të gjitha pushtetet, edhe ato të pavarura, disa prej të cilave kundërveprojnë edhe sot si institucione paralele siç është p.sh., akoma drejtësia, KLD, presidenti e ndonjë zgjatim tjetër i tyre. Sot, pra pas 23 Qershorit, opozita që ishte në pushtet dje proteston për “kauza” të fabrikuara prej saj, po asnjë protestues nuk keqtrajtohet dhe as nuk survejohet e as nuk dhunohet nga strukturat e shtetit. Sot qeverisja punon për shtetin dhe qytetarin pa dallim politik, pa diversion politik mbi opozitën. Dhe këto janë ato, të cilat gjykoj se janë ato për të cilat them se Rilindja e premtuar ka filluar , dhe janë ato si arritje paraprake që ja hapën rrugën integrimit të brendshëm të vendit dhe atij të integrimit për në BE. – See more at: http://www.sot.com.al/opinione/ndryshimi-nd%C3%ABrmjet-para-dhe-pas-23-qershorit-2013#sthash.7rd2TFBV.dpuf
