Në vetëm 2 ditë të çeljes së tij për publikun muzeu Bunk’Art ka pritur rreth 3 mijë vizitorë shqiptarë dhe të huaj. I etiketuar ndryshe si Muzeu i Diktaturës Shqiptare Bunk’Art u inagurua më 22 nëntor nga kryeministri Rama, në një kohë jo të paqëllimshme, pikërisht në prag të Festës së Pavarësisë. Nëpërmjet këtij muzeu Shqipëria përcjell te vizitorët shqiptarë por sidomos te ata të huaj një pjesë të rëndësishme të historisë së kombit tonë, vitet e Enver Hoxhës, por jo atë pjesë të historisë që jemi mësuar të dëgjojmë deri tani në libra e dokumentarë.
Muzeu është një dëshmi e gjallë e jetës sekrete të udhëheqësve komunistë Enver Hoxha dhe Mehmet Shehu, brenda një tuneli të cilin ata e krijuan si një vend sekret për t’u mbrojtur në rast rreziku lufte. Bunk’Art, në të vërtetë është një bunker antibërthamor apo tunel i nëndheshëm, i krijuar në vitin 1976, dhe ndodhet 5 kate në tokë, me 106 dhoma. Ai është ndërtuar nga Qeveria komuniste me idenë për të strehuar udhëheqjen e lartë në rast të një sulmi bërthamor ndaj Shqipërisë.
Të bie në sy dhoma e veçantë e Enver Hoxhës dhe e kryeministrit të asaj kohe Mehmet Shehu, ndërkohë që brenda këtij bunkeri ka edhe një kinema me 150 vende. Bunkeri ka 5 dyer të blinduara në hyrje të tij, i emërtuar në vitet e regjimit komunist si “Objekti 0774”.
Në shumë nga këto ambiente janë ekspozuar armatime, uniforma, dokumente, harta të ndryshme dhe detaje të tjera që shërbenin në atë kohë.
Bunkeri, i cili ndodhet në Shish Tufinë, pranë Batalionit Mbështetës të Shtabit të Përgjithshëm, u hap me rastin e 70 -vjetorit të çlirimit. E organizuar nga kryeministria, Ministria e Kulturës dhe Ministria e Mbrojtjes, kjo veprimtari e pazakontë zbulon përmes shumë formave shprehëse, mesazhet që janë përcjellë brenda këtij bunkeri që simbolizon izolimin e Shqipërisë komuniste, por edhe përballjet e vazhdueshme mes bllokut komunist e perëndimit gjatë luftës së ftohtë. Linja historike, muzeale dhe artistike, bëhen bashkë për të përcjellë tek vizitorët mesazhe të qarta për dy periudhat më të diskutuara të historisë tonë, periudhën e Luftës së Dytë Botërore dhe atë të regjimit komunist në Shqipëri.
Muzeu ruhet nga forcat ushtarake, dhe ende nuk është bërë një mirëorganizim i funksionimit të tij dhe nuk është vendosur nëse do të jetë në kompetencë të Ministrisë së Mbrojtjes apo të Ministrisë së Kulturës. Për momentin nuk ka as ciceron, mendohet që pas dy muajsh Muzeu të riorganizohet brenda standardeve dhe të ketë një staf të veçantë që do të kujdeset për të dhe për vizitorët.
Muzeu ndodhet në Tiranë, në zonën e njohur si Shish Tufinë, afër Dajtit.Momentalisht vizitorët hyjnë falas, pa bileta, dhe kushdo që ka dëshirë të shkojë mund të niset në qendër të Tiranës, te Sahati, me autobusa që janë vendosur posaçërisht për të shkuar atje.
Autobusat janë të veshur me logon Bunk’Art, dhe qëndrojnë në dispozicion të vizitorëve nga ora 9:00 deri në orën 16:00.
Në këto pak ditë janë të shumtë vizitorët që vijnë për të parë Bunk’Art, që nga nxënësit e shkollave e deri te të moshuarit, të cilët e kanë jetuar atë periudhë të komunizmit shqiptar. Përtej vuajtjeve që sjell një regjim totalitar vizitorët e vlerësojnë idenë për ta kthyer këtë bunker në një muze të mirëfilltë. Në këtë mënyrë asgjë nuk do të harrohet, dhe brezat e rinj do të njihen nga afër me atë se çfarë ka qenë Enver Hoxha për Shqipëri dhe çfarë kanë jetuar prindërit dhe gjyshërit e tyre. Ja si shprehen disa prej tyre për KosovaPress.
Bilbil Halili thotë se ka ardhur nga Saranda dhe i duket mjaft interesant ky muze i diktaturës, edhe pse që i vogël është njohur me komunizmin e Enver Hoxhës.
Argjend Bajraktari është i ri, nuk e ka jetuar komunizmin, por ka parë filmat e asaj kohe dhe thotë se ky muze është i njëjtë sikurse jeta e atëhershme shqiptare që tregohet nëpër filmat e vjetër.
Skender Çeta një tjetër vizitor që ka ardhur posaçërisht nga Skrapari për të parë Muzeun, thotë se duhet ta vlerësojmë këtë muze, dhe nuk kemi pse kapemi me fjalë me Enver Hoxhën i cili ka vdekur, përkundrazi duhet ta vlerësojmë këtë vepër, të cilët duhet ta vizitojë tërë bota.
Edhe Isuf Çeta, një tjetër vizitor që ka ardhur për të parë Muzeun Bunk’Artthotë se e gjitha kjo është histori, kujtim që duhet ta shoh brezi i ri por edhe të vjetrit që kanë jetuar në atë kohë.
Ndërsa, një tjetër vizitor thotë se Muzeu të shtyn drejt kureshtjes për të parë por nuk beson se janë objekte origjinale të asaj kohe./Kosovapress/
