Nga Ilir Sinanaj
Kohët e fundit është bërë një fushatë e gjerë për të sjellë turistë të huaj në Shqipëri dhe me shumë të drejtë. Nga ana tjetër, i gjithë potenciali turistik u duhet bërë i ditur edhe atyre personave, të cilët banojnë në Shqipëri sepse, e parë në logjike konsumatore, klientët më të mëdhenj dhe më të shpeshtë janë vetë banorët e Shqipërisë. Ajo gjë, që mungon më shumë për vendin tonë është informacioni. Për këtë arsye, investimi më i madh i mundshëm, është vënia në dispozicion të publikut pika informacioni për zonat e ndryshme turistike në vend, si edhe për transportin. Ky i fundit është shumë i rëndësishëm sepse nuk ekziston në Shqipëri një bazë të dhënash për oraret dhe itineraret e autobusëve ndërqytetës.
Nga ana tjetër, sa më shumë të jenë njerëzit në dijeni për mënyrën se si shkohet në një vend të caktuar, aq më të prirur janë ata të caktojnë burime financiare për të shkuar në destinacionin në fjalë dhe si rrjedhojë të shpenzojnë. Për turistët e huaj një hartë e transportit ndërqytetës me oraret dhe tarifat është e domosdoshme, në mënyrë që këta të fundit të përjetojnë një qëndrim sa më të këndshëm në gjithë Shqipërinë dhe si pasojë të shpenzojnë sa më shumë në zona të ndryshme të vendit. Nga ana tjetër, edhe shqiptarët nuk janë shumë të njohur me linjat e transportit, përveçse në rastit kur i lidh puna. Fatkeqësisht kur nevojitet një informacion për të udhëtuar në një qytetet tjetër, forma e vetme e lashtëpër të marrë këtë informacion është duke pyetur të afërm ose të njohur.
Për të zgjidhur këtë problem, në një nga 48 masat e përmirësimit të turizmit, të përpiluara me urdhër të kryeministrit, një nga masat, për të cilën përgjigjet Ministria e Transportit dhe Infrastrukturës, është pikërisht vënia në dispozicion për publikun e një broshure për linjat dhe oraret e autobusëve për të gjithë vendit. Shpresojmë vetëm që kjo masë të përmbushet përpara se të mbarojë sezoni turistik. Përpos “zbulimit” të orareve dhe pikënisjes së linjave të transportit, shqiptarëve u duhet të “zbulojnë” edhe potencialin turistik në Shqipëri. Përsëri për këtë gjë nevojitet një burim informativ, tek i cili mund të kenë qasje të gjithë. Një mënyrë shumë e mirë është krijimi i një faqeje interneti, ku të shpjegohen të gjitha veçoritë turistike të zonave të ndryshme të Shqipërisë, duke përfshirë edhe pasurinë tyre në tradita.
