Konferenca
Institucionet, hapur gjithë ditën. Të rriturit mund të mësojnë zanat falas
Shpresa Mezini
Shkollat profesionale, si kurrë ndonjëherë do të jenë hapur jo vetëm paraditeve, por edhe pasditeve. Tanimë ato do të funksionojnë si qendra multifunksionale mësimi dhe trajnimi, për të mësuar apo perfeksionuar zanatin. Një tjetër lajm i mirë është se të drejtën për të mësuar një zanat, tanimë nuk do ta kenë vetëm nxënësit e regjistruar në një shkollë të caktuar, por edhe ata të cilët nuk janë të regjistruar në asnjë shkollë, përfshirë këtu edhe të rriturit, që preferojnë të mësojnë një zanat falas. Zyrtarisht mësohet se zbatimi i kësaj strategjie do të nisë fillimisht në shkollat më të mira profesionale, për të mbërritur te të gjitha në nivel kombëtar. Këto janë premtimet e ministrit të Mirëqenies Sociale, Erion Veliaj, i cili thekson se dyert e shkollave profesionale do të jenë hapur për të gjithë të interesuarit që kërkojnë të mësojnë një zanat, por me një kusht, që degët që do të ofrohen falas nga Ministria e Mirëqenies do të jenë ato të cilat kërkon tregu i punës. Pas kalimit në varësi të Ministrisë së Mirëqenies Sociale, Arsimi Profesional po i nënshtrohet një reforme të thellë dhe të pakryer ndonjëherë më parë. Zyrtarisht, mësohet se në shkollat profesionale është shtuar një numër i caktuar degësh, të përzgjedhura këto në raport me interesin që ka tregu për punësimin e të rinjve në fusha të caktuara. I pranishëm në konferencën rajonale mbi aftësimin profesional, të zhvilluar dje, Kryeministri Edi Rama, theksoi edhe njëherë se arsimi në vendin tonë ka nevojë për implementimin e një strategjie të re, pasi ajo e ndjekur deri më tani ka qenë e gabuar dhe ka krijuar probleme. “Kemi pasur probleme me qeverisjen, se kemi pasur dy ministra për të njëjtën gjë. Kemi pasur shumë universitete, numri ka qenë mjaft i lartë. Jemi bazuar në strategji të gabuar gjatë gjithë këtyre viteve. Duhet të fokusohemi se si ta përputhim sektorin privat me arsimimin. E rëndësishme është që të mësojmë diçka të dobishme dhe si të bëjnë një jetë të ndershme. Është mësuar gjithë kohës vetëm për teorinë, por nuk ka pasur instrumente për ta treguar. Teoria dhe praktika kanë pasur mospërputhje. Ka pasur gjatë gjithë kohës deklarata të bukura. Duhet ndryshuar profili i shkollave. Ne po shohim rezultate të mira për këtë. Kemi parë regjistrime të reja në modelin tonë të ri. Një diplomë nuk të jep atë që ti kërkon nëse nuk ke aftësitë e duhura për t’u përballur me tregun. Të rinjtë po e kuptojnë këtë ndoshta pak me ngadalë, por rëndësi ka që do ta kuptojnë”, argumentoi Kryeministri i vendit. Ndërsa ministri i Mirëqenies Sociale përmendi disa prej risive të zbatuara sivjet në sistemin e arsimit profesional, duke premtuar se në vijim do të ketë të tjera ndryshime, që lidhen sidomos me mënyrën e drejtimit në këto institucione të arsimit parauniversitar. “Duke ditur që dinamikat europiane të tregut të punës sot kërkojnë aftësinë për të mësuar deri në tre zanate apo profesione të ndryshme gjatë ciklit të jetës, MMSR me mbështetjen e partnerëve tanë është duke shkuar drejt transformimit të shkollave tona të arsimit profesional, fillimisht të atyre më të mira, në qendra multifunksionale mësimi dhe trajnimi që u ofrojnë shërbime jo vetëm nxënësve, por edhe prindërve të tyre në kërkim të një profesioni të ri apo rritje të profesionalizmit të atij që kanë. Në të gjitha shkollat profesionale jemi në vijim të procesit të vënies në funksion të bordeve të reja të shkollave, të cilat drejtohen nga disa prej drejtuesve më të spikatur të bizneseve në linjën e shkollës profesionale. Po synojmë që në të gjithë sistemin e arsimit profesional, të arrijmë që 30% e të nxënit, të ndodhë në hapësirat e biznesit”, sqaroi Veliaj.
