Ruairí O’Connell është emëruar ambasadori i ri Mbretërisë së Bashkuar në Republikën e Kosovës. Ai do të zëvendësojë ambasadorin Ian Cliff, i cili do të transferohet në një shërbim tjetër diplomatik.
O’Connell do ta marrë detyrën në fillim të prillit të vitit 2015, njofton qeveria britanike.
O’Connel aktualisht është zv/drejtor në Drejtorinë për bashkëpunim me NATO-n. Më herët ai ka punuar në shumë çështje gjatë karrierës së tij, i fokusuar në çështje të sigurisë evropiane dhe zhvillimit ekonomik. Ai ka shërbyer edhe parë në Kosovë, në periudhën kur Kosova e ka shpallur pavarësinë.
Me rastin e emërimit të tij ambasador në Kosovë, O’Connell ka thënë:
“Jam i nderuar dhe i gëzuar që do të shërbej si ambasador britanik në Republikën e Kosovës. Gjatë gjithë historisë së deritashme, Britania dhe Kosova kanë zhvilluar marrëdhënie të fuqishme. Unë do të vazhdoj të punoj në Kosovë sërish me miqtë e mi të vjetër dhe të rinj që vijnë nga të gjitha komunitetet, në mënyrë që të ndërtojmë ura të fuqishme dhe ta mbështesim Kosovën në rrugën drejt integrimeve Evropiane”, ka thënë ai.
