Nga Besi BEKTESHI
Nuk dua të bëj lojë fjalësh mbi “anti-shtetërimin dhe anarkizmin” sepse në ditët e sotme ka shumë e shumë definicione “par exelance”, por kjo që po ndodh me opozitën shqiptare, është për t’u shkruar në analet e analizës politike, për t’u marrë si shembull i kohëve moderne por si retro e plotë politike. Dje ishte me sa duket ideologjia e re e së djathtas shqiptare “Duma”, që bënte thirrje për protesta popullore, dhe sot është Basha që e plotëson këtë thirrje për protesta. Në cilin moment bëjnë thirrje për protesta, të tillë ideologë të rinj të një momenti të vjetër anti-statalist (kundër shtetit si formë dhe përmbajtje filozofiko-praktike në zbatim) dhe anti-ligj? Në një moment që ju shpall luftë kanabisit dhe u vendos autoriteti i shtetit në Lazarat, në një moment ku në dogana po vendoset autoriteti i shtetit, në një moment ku për energjinë elektrike po vendoset autoriteti i shtetit, në një moment ku në trafik po vendoset autoriteti i shtetit që në fund të fundit nuk është asgjë tjetër, por vendosja e ligjit në territorin e shtetit shqiptar. Në një moment të luftës kundër degradimit urban! Pra, zbatimi i ligjit dhe asgjë më tepër se sa kaq. Basha dikur thoshte se nafta do të kalonte 200 lekët, por në fakt jo vetëm që nuk i kaloi, por dhe pse ju shtua ai 10 lekëshi, mbeti më poshtë se sa e la partia e Bashës, kur u rrëzua nga pushteti. Ideologjia e famshme e antistatalismit për të mbajtur tre individë në krye të vendit, por e zbatuar nga PD dhe lidershipi i saj i madh, kishte sjellë mospagesën e taksave, mospagesën e ujit, mospagesën e energjisë dhe vjedhjen e saj, moszbatimin e ligjit bie fjala të anti-duhanit edhe pse ishte, moszbatimin e ligjit të ndalimit mbjelljes së drogës, por dhe kultivimit dhe kthimit të zonave të paprekshme në bazene politike, moszbatimin e ligjeve të ruajtjes dhe mbrojtjes së pyjeve dhe lumenjve etj., etj.
Ishte anarkizmi i projektuar për të lënë anti-ligjin, për të bërë sigurisht ligjin ish sekretarët e partisë, të frymëzuar nga inati për shtetin nga marksizëm-leninizmi dhe deri te utopitë e mëdha “prodomiane” dhe në opozitë, nga modele proteste antishteti, për të bërë pastaj shtetin e tyre rrumpallë që ju siguron fitimet më të mëdha si klasë politike në demokraci. Të tillë ideologë bërtasin “se janë pro-ligjit” dhe pastaj kur kërkohet zbatimi i tij, dalin në protesta kundër! Basha thotë: “Protesta popullore, ju bëj ftesë edhe ju (grave) për të thënë se gjërat janë keq e më keq, po shkojnë keq e më keq, dhe së dyti për ti dhënë mesazhin qeverisë të ndryshojë, se do ta ndalim me forcën e sovranit!”. Në thelb si Basha dhe disa afër tij, janë kundër mazhorancës së sotme, sepse ajo po lëviz përfundimisht anti-shtetin dhe anti-ligjin, i instaluar nga regjimi politik anti-ligj i pushtetit të dikurshëm të partisë dhe lidershipit të Bashës! Por me që Basha i bën në një takim me femra të tilla deklarata për protesta popullore, më duhet të gjej sistem referimi dhe nuk ka më të mirë se sa “anarko-feminizmi” për të definuar këtë rast. Anarko-feminizmi e shikon luftën anarkike si komponente të nevojshme të luftës feministe kundër patriarkatit si manifestim të hierarkisë dhe si bazë të luftës së klasave dhe e luftës anarkike kundër shtetit dhe kapitalizmit. Dakord, në thelb kështu është!
Ky lloj anarkizmi feminist në disa pika ishte edhe kundër baballarëve të anarkizmit teorik si Pierre-Joseph Proudhon e Mikhail Bakunin! Liria e individit dhe mënyra për moskontroll shtetëror e shekullit të nëntëmbëdhjetë vijnë tashmë në teori të re në shekullin e 21, në Bashizmin e aplikuar. Në fakt, Basha thotë se jemi për ligjin dhe shtetin, por jo për shtetin policor! Nëqoftëse dikush ka përdorur shtetin policor dhe me vrasje, nuk është askush tjetër përveç se Basha me katër të vdekur në bulevard, por meqë sot po merrem me teori, nuk do ti përmend të vrarët si praktikë policore e Bashës! Nëqoftëse shteti të dënon se vjedh dhe të kap me duar në vjedhje, ky është shtet policor. Kur proteston (ata të katër nuk po prishnin dhe po rrënonin asgjë) dhe vret ky është shtet “demokratik” për Bashën si Ministër i Brendshëm.
Por si Ministër i Brendshëm, Basha ishte “tolerant i madh” për vjedhjen masive të energjisë, të ujit, të taksave dhe të moszbatimit të ligjit kudo deri në trafik në ndërtime dhe rrënime! Këtu jo! Këtu sillej si një populist anarkisto-përfitues!Qeverisjet e modelit Basha, por që në fakt janë Berishiane në origjinal, këtë shtet anarkisto-juntist kanë në mëndje. Ky lloj shteti anti-shtet dhe anti-ligj, mban pushtete të mëdha dhe të përfitimeve të jashtëzakonshme.
Duke lënë disa të varfër të vjedhin, hajdutët e mëdhenj, mega hajdutët me mbrojtje qeverie bënin namin dhe Basha fshihet mbas anarko-populizmit të tij anti-shtet. Kush e ha këtë në fund të fundit? Sigurisht, të vegjlit që mbeten në saj të bashizmit si teori dhe praktikë, e që bëhen akoma më të vegjël dhe të pasurit akoma më të pasur. Ky është edhe momenti për tu dalluar në këtë teori trumbetimi si protestë popullore. E kanë të qartë, se vendosja e autoritetit të shtetit dhe ligjit, i mohon përfundimisht në sy të njerëzve si teori dhe praktikë politike. Kjo tashmë është mëse e qartë, se për pikërisht këtë gjë, janë edhe në alarm.
