Edhe pse programi i Matematikës është akredituar me vonesë, hiç më pak se 202 aplikantë kanë shprehur interesimin të jenë pjesë e programit të Matematikës në FShMN-e. Por, vetëm 64 prej tyre kanë fituar të drejtën të jenë studentë të këtij programi studimor. Kështu ka deklaruar dekani i Fakultetit të Shkencave Matematiko-Natyrore, Tahir Arbneshi, i cili ka njoftuar se stafi i mësimdhënësve tashmë është i gatshëm për dyfishim të punës, vetëm e vetëm që studentët të kompensojnë mësimin e humbur.
Edhe për kundër faktit se Matematika është profesion deficitar, dhe se interesimi i studentëve për regjistrim ka qenë shumë i madh, prof. dr. Arbneshi, ka deklaruar se institucioni që drejton ai, nuk ka kapacitete për pranimin e më shumë studentëve, pasi që nuk ka asistentë të mjaftueshëm dhe të kualifikuar në treg, pra mungon stafi.
“Definitivisht mungon stafi, ekskluzivisht në programet e Matematikës, Fizikës dhe atë të Gjeografisë. Megjithatë, duhet ta kemi një gjë parasysh, se Fakulteti i Shkencave Matematiko- Natyrore, nuk ofron studime masive, siç e nënkupton masa e gjerë popullore, sepse vetë objekti është i dizajnuar që të ketë grupe prej 30 deri në 50 studentë, e jo 60 e më shumë”, ka thënë në një intervistë për Kosova. Info, prof. dr. Arbneshi.
Megjithatë, ai ka shprehur pakënaqësitë e tij, sa i përket ofertës për studentët, pasi që oferta e tij, nuk është e mjaftueshme, për shkak se kapacitetet e këtij fakulteti janë shumë të vogla dhe kushtet nuk janë të mira, që rezultatet të jenë të mira.
“Por në çfarë kushte ne punojmë dhe çka ju ofrojmë, prapë se prapë studentët i kemi të mirë”, ka thënë prof. dr. Arbneshi.
Kosova Info: Sa studentë kanë aplikuar në programin e matematikës, pasi që tashmë ky program më vonë është akredituar nga Agjencioni i Akreditimit i Kosovës?
Prof. Dr. Tahir Arbneshi: Gjithsejtë kanë aplikuar 202 aplikantë, ku me konkurs i kemi kërkuar vetëm 60 studentë, por janë pranuar 64, për shkak se pesë aplikues të fundit kanë arritur pikë të barabarta, dhe duke mos i bërë askujt padrejtësi, kemi pranuar të gjithë ata me pikë të barabarta, pra katër më shumë se që ka kërkuar konkursi.
Po ashtu, kemi pranuar dy student jashtë Kosovës, kurse i kemi refuzuar, ose nuk kanë arritur të pranohen 136 kandidatë. Konkursi është shpallur menjëherë pas akreditimit, që i bie, me 8 nëntor 2014, aplikacionet i kemi pranuar deri më datën, 14 që i bie deri të premten e javës tjetër. Me datën 15 nëntor kemi organizuar provimin pranues për ata që kanë pasur aplikacione pa provim të maturës, pra ata duhet t‘i nënshtrohen provimit pranues. Me datën 17 nëntor kemi publikuar rezultatet. Me 17, 18, 19 kemi marrë ankesat e aplikantëve, me datën 20 i kemi shqyrtuar ankesat dhe kemi publikuar raportin e komisionit të ankesave ne web-faqe dhe në tabelat e shpalljes, dhe me datën 20 gjithashtu, kemi bërë regjistrimin e kandidatëve të cilët janë pranuar.
Mësimi ka filluar menjëherë, edhe pse nuk besoj se nuk do të mundemi ta stabilizojmë mësimin sot, por prej të javës së ardhshme mësimi është i sigurt dhe në rrjedha normale.
Kosova Info: Me pranimin e katër studentëve më shumë, a e keni tejkaluar rregulloren e konkursit?
Prof. Dr. Tahir Arbneshi: Kemi një vendim të senatit të UP-së, që ata që kanë pikë të barabarta, të pranohen, pra është vendim i senatit të UP-së, dhe unë jam i obliguar ta zbatoj vendimin.
Në vendim thuhet se në rast e kandidatët kanë pikë të barabarta pranohen të gjithë. Mund të bëhen 10 që kanë pikë të barabarta. Me konkurs kemi kërkuar 60 studentë, por vendimi i senatit, është ai që përmendëm më herët.
Kosova Info: Sa ka qenë i vështirë përgatitja e semestrit, pasi që programi në fjalë është akredituar më vonesë?
Prof. Dr. Tahir Arbneshi: Konkursi është përgatitur me kohë, sepse e kemi ditur se do të akreditohemi, por problem ka me qenë se si kemi me e realizuar semestrin. Matematika është studim themelor , pa të cilin nuk bën, dhe nuk ka asnjë logjikë që të mos akreditohet programi, kur kemi parasysh se ne të njëjtin departament ofrojmë edhe programe tjera që janë super strukturë e matematikës, siç është matematika financiare në banka dhe sigurime, dhe shkencat kompjuterike, dhe se më dështuar në programin bazik që është matematika, që punon që 50 vite, kishte qenë e pamundur që të mos akreditohet. Diçka tjetër është çështja se ne jemi vonuar në aplikacion, por ka qenë e sigurt që ne akreditohemi.
Kosova Info: Prof. A keni planifikuar orar shtesë të orëve të mësimit, pas vonesës së fillimit të rregullt të mësimit?
Prof. Dr. Tahir Arbneshi: Vonesat do t’i kompensojmë me mësim edhe në fund të javës, pra çdo të shtunë do të mbahet mësimi, dhe secila lëndë që është dy orësh, tash do të bëhet katër orësh, dhe ajo e cila është tre orësh, do të bëhet gjashtë orësh. Pra në këtë semestër do të punojmë me dyfishim të orëve.
Për këtë kemi bërë një plan dinamik, me të cilin, ne do t’i kompensojmë 15 javë punë, e që i bie me i pas 15 herë nga 5 ditë punë.
Kosova Info: Sa është i përgatitur stafi për këtë dyshim të punës?
Prof. Dr. Tahir Arbneshi: Stafi tashmë është në dijeni për këtë dyfishim të punës, dhe ka marrë obligime ta kryejë këtë punë. Për këtë zyrtarisht e kemi shtyrë semestrin për programin e Matematikës deri me 31 janar të vitit 2015, dhe plus kësaj 15 ditët e janarit do të punojmë me orar të ngjeshur. Për këtë, ne do t’i dorëzojmë raport Agjencisë së Akreditimit të Kosovës dhe Rektoratit të UP-së, për çdo orë të mbajtur, dhe për këtë e mbajë përgjegjësin unë si Dekan i këtij institucioni arsimor, sepse nuk kemi çare pa e mbajtur mësimin.
Kosova Info: Z. Prof. në konkursin e shpallur tashmë në një paragraf, thuhet se ‘rezervon të drejtën e pranimit e personave me aftësi të kufizuar’. Pse ky rezervim ndaj kësaj kategorie të shoqërisë?
Prof. Dr. Tahir Arbneshi: Kjo është një pyetje që kërkon përgjigje jo nga unë, por për një instancë më të lartë. Kjo çështje nuk është në kompetencën time, është jashtë domenit tim. Konkursin e përgatit Rektorati i UP-së, unë vetëm bëjë kërkesë për numrin e studentëve, ku kam kërkuar të regjistrohen 60 studentë.
Kosova Info: Pasi që kërkesa e studentëve për pranim ka qenë e madhe, a keni kërkuar shtim të numrit të studentëve?
Prof. Dr. Tahir Arbneshi: Jo, për arsye se unë kam staf të rregullt të profesorëve, me 15 veta, në Departament të Matematikës, kurse i kam në funksion 5 programe të studimeve, pra kam shkenca kompjuterike, matematikë financiare, matematikën arsimore, matematikën e përgjithshme dhe programin e ri tash që e kam, e që është program studimor matematikë. Kam staf shumë të vogël të mësimdhënësve, kur për një numër të madh të studentëve më kërkohet numër shumë i madh i asistentëve. Pra, edhe për kundër faktit se interesimi ka qenë shumë i madh i regjistrimit të studentëve, ne nuk kemi kapacitete, nuk ka asistentë të mjaftueshëm në treg.
Pra definitivisht mungon stafi, ekskluzivisht në programet e Matematikës, Fizikës dhe të Gjeografisë. Megjithatë, duhet ta kemi një gjë parasysh, se Fakulteti i Shkencave Matematiko- Natyrore, nuk ofron studime masive, siç e nënkupton masa e gjerë popullore, sepse është i dizajnuar të ketë grupe 30 deri në 50 studentë, dhe jo 60 e më shumë.
Kosova Info: Megjithatë, sa po kuptohet, është i nevojshëm provimi pranues, në mënyrë që filtri i studentëve të jenë më i mirë?
Prof. Dr. Tahir Arbneshi: Unë jam për t’i forcuar kriteret, për ta bërë provimin pranues, dhe jo me ardhur dikush nga provimi i maturës dhe me sukses të shkollës së mesme, sepse nuk është njësoj, si atë që ka mbaruar shkollën e mesme në Prishtinë, në gjimnazin ‘Sami Frashëri’, si ai që ka mbaruar në Rugovë të Hasit (duke mos dashur me përjashtuar rastet individuale), dhe ky i fundit vjen me 5-a prej atje dhe ky tjetri nga Prishtina vjen me 5-a prej Prishtinës. Këta hyjnë në garë të barabartë për regjistrim. Pra, ne duhet ta kemi filtrin tonë, pra ai që kalon provimin pranues, pragun hynë, dhe ai që nuk e kalon mbetet.
Kosova Info: Keni kërkuar nga Ministria e Arsimit që të ketë provim pranues?
Prof. dr: Tahir Arbneshi: Kjo ka ndodh, sepse Ministria e Arsimit na ka fut në një pilot-projekt, ku Fakulteti i Shkencave Matematiko-Natyrore, regjistron student pa provim pranues. Ne kemi bërë kërkesë për kthimin e provimit pranues, dhe e kemi votuar në senat të UP-së, por Ministria e Arsimit nuk e ka aprovuar. Politikat për mësim dhe për shkollim universitar i bënë Ministria e Arsimit, përderisa unë vetëm zbatoj urdhrat e tyre.
Kosova Info: Sa jeni të kënaqur me punën dhe angazhimin që ju i ofroni studentëve, që ata të jenë të suksesshëm?
Prof. dr: Tahir Arbneshi: Ne ju ofrojmë atyre, por oferta jonë për studentët, për mendimin tim nuk është e mjaftueshme, për shkak se kapacitetet tona janë shumë të kufizuara dhe kushtet nuk janë të mira, në rend të parë kemi mungesë të hapësirave, laboratorëve dhe pajisjeve tjera përcjellëse për konkretizimin e mësimit, që rezultatet të jenë të mira. Megjithatë, në çfarë kushte ne punojmë dhe çka ju ofrojmë, prapë se prapë studentët i kemi të mirë. Parimisht, nëse llogaritim në Fakultetin e Shkencave brenda vitit regjistrohen mbi 1000 studentë, dhe ne kemi një staf prej 105 profesorëve që i mbulojnë të katër vitet, e edhe Master dhe Doktoratën, kjo d.m.th se kemi pak staf. Prandaj, mund të them se shumë mirë janë studentët në raport se çka ju ofrojmë ne, pra nuk ofrojmë atë çka do të duhej. Pra kemi numër të madh të studentëve, në krahasim me stafin ë profesorëve, edhe pse Matematika është një profesion deficitar.
