Lajme shumë të rënda vijnë nga Komisioni Europian për Edi Ramën. Presidenti i ri i Komisionit, Zhan Klod Junker nuk ka konfirmuar në vendin e komisionerit për zgjerim Stefan Fylen duke e zëvendësuar atë me një përfaqësues austriak. Madje për të larguar Stefan Fylen, Junker ka përdorur formulën e shkrirjes së vendit të punës për Fylen, duke përdorur ironikisht të njëjtën skemë që Rama përdori për largimin nga administrata të kundërshtarëve të tij dhe që u tolerua nga Stefan Fyle. Por kjo është e keqja më e vogël për Ramën, i cili kishte varur shpresa të mëdha tek Fyle pas marrëdhënieve preferenciale të tij me të majtën në Shqipëri. Zëdhënës i Junker në rolin e zëdhënësit të Komisionit Europian është emëruar greku Margaritis Skinas, përfaqësues i të djathtës konservatore greke dhe mik i Kryeministrit grek Andonis Samaras. Emërimi nga Junker i krahut të djathtë siç mund të vlerësohet pozicioni i zëdhënësit, është një tjetër goditje për interesat e të majtës dhe Edi Ramës në Shqipëri.
Jo më kot Kryeministri grek Samaras në një takim të para pak kohëve në kuadër të një konference ndërkombëtare me Ramën dhe Bushatin u kujtoi se ata nuk kishin zgjidhur ende problemin e kufirit detar me Greqinë dhe kishin probleme të mëdha me ndarjen territoriale administrative në jug të vendit. Negociatat për emërimin e zëdhënësit të Junker kanë që në muajin gusht që vazhdonin në Athinë dhe vetë Zhan Klod Junker gjatë një vizite të tij në kryeqytetin grek kishte kërkuar takim jashtë axhendës zyrtare të parashikuar me Margaritis Skinas, të cilit i kishte thënë se a mundej që të mbështetej tek ai për përzgjedhjen. Me plotësimin e pozicionit shumë të rëndësishëm të zëdhënësit të komisionit mbyllet edhe dera e fundit tek e cila shpresonte Rama për një trokitje në rast nevoje.
Tashmë gjithë qeverisja e Ramës ndodhet e ekspozuar para fakteve tronditëse të vendosjes së shtetit policor dhe anulimit “de facto” të lirive civile të shtetasve të tij cka u dëshmua me rastin e arrestimit të guvernatorit Fullani dhe gjithë zinxhirit komandues dhe teknik të Bankës së Shqipërisë.Me keq akoma, Rama ndodhet i ekspozuar para forcave demokratike të djathta të BE-së për arrogancën me të cilën ai dhunon në mes të Kuvendit vlerat e fjalës së lirë duke synuar eliminimin fizik të kundërshtarëve politikë. Rama ndodhet para fakteve skandaloze të futjes në Parlamentin shqiptar të njerëzve të inkriminuar, të dënuar për rrëmbime dhe prostitucion, madje vrasje të të pafajshmëve.
Ndaj për vendin parashikohet një e ardhme jo e mirë nëse Rama vazhdon të jetë Kryeministër. E djathta europiane ka mbyllur shtigjet ku e majta shqiptare do mund të kërkonte ndonjë shpresë mbështetjeje dhe qytetarët shqiptarë mund të jenë më të sigurtë në duart e BE-së sesa të Edi Ramës. Presidenca e re europiane ka shtuar garancitë për shqiptarët ndërsa është një fortesë e pakalueshme për ambiciet ogurzeza të Ramës për kaos dhe eliminim fizik dhe politik të opozitës.
Enturazhi stalinist që qarkon institucione të rëndësishme të demokracisë në Shqipëri do ketë përballë vlerat e patjetërsueshme të së djathtës europiane që ka dizenjuar dhe ngritur Bashkimin Europian e që mban me paratë e taksapaguesve europiane të gjallë ëndrrën e një familjeje të madhe e të bashkuar shtetesh që ndajnë të njëjtat vlera për prosperitet dhe mirëqenie të popujve të tyre. Edi Rama thjesht nuk është më i mirëpritur në BE pa rivendosur dialogun me opozitën dhe pa dënuar dhe larguar nga Parlamenti mashat e tij të rrahjeve e përdhunimeve. Edi Rama thjesht nuk mund të trokasë më në derën e BE-së me mendësitë dhe paraqitjen e talebanëve dhe ekstremistëve me të cilët demokracia është tashmë në luftë.
