Nga Lek Mirakaj
Mos harro se Ai që ke arrestuar i ka provuar torturat dhe privimet që Ti as në ëndërr nuk i ke parë. Po qe se servilat që ke rreth e rrotull e kanë bërë me kokën e tyre, për të të bërë qejfin, vepro shpejt e kërkoji të dëmtuarit dhe gjithë shqiptarëve të falur, se i ke prishur gjumin e natës.
Kemi parë shumë, shumë më tepër se një shoqëri normale natyrshem mund të durojë. Jetuam periudhën e komunizmit, që aqë shumë Ju keni anatemuar në rininë tuaj dhe që tani si gjeli, të cilit i kanë futur gjalpin e shkrirë në fyt. Ju me zë të përçudnuar kujtoheni rrallë herë ta kujtoni. Nejse! Luftuat, bravo ju qoftë! E mundët armikun e filliméve, jo aq për meritën tuaj se sa për gabimet e tij. Në fund të fundit të gjithë e dimë se pushteti në atdheun tonë të bekuar nuk fitohet, po humbet nga ata që e administrojnë në mënyrë të gabuar. E humbën kështu ata që na lanë në duart e atyre që në rininë tënde, Ju donit t’i shikonit duke bërë lavjerrësin, të kujtohet lavjerrësi nga mësimet e fizikës kur ishim të vegjël, d.m.th. kur ishim akoma në udhëkryqin të bëhemi njerëz apo djaj. Kështu e humbi mentori yt, jo se kundërshtari i tij bindi popullin, po se Ai pra, ai që të mori në qafë, që nga njeri i lirë si ishe, të bëri me pushtet dhe mori në qafë veten e ty të hoqi atë që kishe më të bukur, lirinë. Kështu e humbi dhe Ai që në mënyrë naive të bëri figurë, të ngriti në rangun e rivalit, kur Ti për hir të së vërtetës nuk ishe, ti kishe ca inate të vjetra dhe aq. Ti nuk e fitove se premtove atë që as vetë nuk e besoje, Ti fitove se paraardhësi nuk pati kurajon të ndahesh nga shokët e këqinj që pa nevojë i kishte bërë ortak,e të cilët edhe kur tërë bota e pa se kush ishin, Ai nuk pati kurajon ti flakte jashtë vathës, se vathë dhe kullot e patën bërë sinorin e tyre, e plot gabime të tjera që Ai më mirë se kushdo tashmë i din. Pra mendimi im modest është. Se ti nuk i mashtrove njerëzit me (Rilindjen tënde), po njerëzit donin të provonin një gjellë tjetër. E nisa me Edi, po gabon, dhe rrugës lajthita pak, çfarë ka barku e nxjerr bardhaku, thonë andej nga fshati i gjyshes tende e times, sa ma shumë të thellohesh aq më shumë të nxjerr bardhaku, por po e lejmë me kaq. Dikur Enveri po të kishte ndonjë mëri të vjetër apo të krijuar në shtegtimin e tij kanibalesk, të burgoste apo të hiqte edhe qafe, kështu më duket i thonë kur të përcillte andej, në atë botën tjetër, nganjëherë me muzikë e shumë herë ashtu komunisteshe, një “dekoratë” mbas qafe e bum, të bënte dhe hero. Thonë që paraardhësi juaj bëri gabime, Ai e ka pranuar edhe vetë,edhe unë mendoj se bëri shumë gabime, më shumë se Ai ka pranuar, po për hir të vërtetës edhe Ti dhe unë duhet ta pranojmë se Ai nuk arrestoi njeri pse e kishte sharë, apo shpifur në shumicën e rasteve, ndaj tij apo familjes së tij. Të paktën formalisht Ai ja përcillte drejtësisë për gjykim. Po ti Edi, çfarë po bën? Të gjithë e kujtojmë, se dikur një biznesmen ju pati akuzuar se njerëz që flisnin në emrin tuaj i patën kërkuar një milion dollarë për një leje ndërtimi. Ndoshta ata nuk ishin duke përcjellë mesazhin tuaj, këtë ti dhe ata e dinë, po ka pak rëndësi. Ajo që është e paprecedent dhe që na sjell në kujtesë kohen e jeep-it të degës së punëve të brendshme, është veprimi i turpshëm i hakmarrjes primitive ndaj atij biznesmeni që pati kurajon dikur të denonconte një aferë korruptive. Do kisha heshtur për të pritur zhvillimet, po kur lexojmë se Fratari është arrestuar, “se ka skaduar afati i lejes së ndërtimit”, gjë që presupozon se Ai kishte leje ndertimi, po nuk i kishte përfunduar punimet në kohë, në një vend ku shkelja e afateve është praktikë e përditshme, në një vend ku maskarenjtë mburren se sa shumë kanë vjedhur, nuk ka se si mos të ulërasësh se kjo është hakmarrje primitive dhe po qe se e ka shkelur ligjin dhe ata bedelat që ke përreth bëjnë gafa të tilla në formulim, ruaju nga ata, se ata që janë në anën tjetër është më kollaj t’i përballojsh. Edi, ta vura në dukje se pushteti në Shqipëri nuk fitohet, po humbet. Kohëzgjatja varet nga aftësia për të mos ja prurë miletit në majë të hundës. Po vazhdove kështu, duke e trajtuar qeverisjen si pushtet personal, shumë shpejt, ata që sot nuk i ke as në parlament do të bëjnë të kuptosh sa keq është kur inati të errëson logjikën e thjeshtë. Mos harro se Ai që ke arrestuar i ka provuar torturat dhe privimet që Ti as në ëndërr nuk i ke parë. Po qe se servilat që ke rreth e rrotull e kanë bërë në kokën e tyre, për të të bërë qejfin, vepro shpejt e kërkoji të dëmtuarit dhe gjithë shqiptarëve të falur, se i ke prishur gjumin e natës.
Pa keqdashje Edi!
