Nga Gjin MUSA PD, tashmë është publikisht në duart e “themeluesit” Sali Berisha. Largimi i figurave kryesore, është përfundimisht copëtimi i kësaj force politike që tashmë është kalbur deri në palcë. Po me të drejtë lind pyetja: Si do jetë fati i PD? Shqipëria, mjerisht ka një opozitë pa moral politik, e marrë peng nga gjyshi Berisha, emëruar një kukull në krye siç është rasti konkret i Lulzim Bashës. Kongresi i Partisë Demokratike nxori lakuriqësinë e kësaj force klienteliste. Familja Basha -Berisha me hajdutët dhe servilët rreth oborrit familjar krijuan këshillin “kombëtar” të PD, po kombëtarizëm këtu nuk ka.
Ristani përsëri numërues i Berishës dhe i Lulit! Besniku i sotëm Ristani po i gëzon peshqeshet e Berishës, nga qelia e burgut në krye të piramidës… vetëm demokraci këtu nuk ka. Dollibashi Berisha di t’ia lërë dopio gjashtën Lulit në dorë, po shpejt do pendohet. Zërat e fuqishëm të djeshëm në drejtimin e PD, sot janë në hije! Diktatori i ndëshkoi… veproi sipas porosisë staliniste, “vile mirë dhe hidhe në kosh”… identik si në kohën e Enverit. Grupi “armiqësor” i Ridvan Bodes, Jozefina Topallit, Astrit Patozit e Mesila Dodës e shumë të tjerë sot të padëshirueshëm për Saliun dhe Lulin… Turpi nuk ka kufi.
Po duheshin afruar shikasit dhe Malltezët, deputetët dhe këshilltarët socialistë, ishin të domosdoshëm për PD? Apo ishin të imponuar nga frika?! E vërteta është se ashtu siç u prit, përfundoi kongresi me “7500” delegatë, një mashtrim publik! I panevojshëm, apo donin ti matnin pulsin qeverisë se mos po frikësohej nga kjo “shumë” delegatësh… Sali Berisha u vetëdeklarua se e ka në grusht kupolën e SHQUP. Luli është sa për të lexuar hartimet dhe për të zbatuar urdhërat e “liderit shpirtëror” të PD, që me këtë kongres i vuri kazmën demokracisë.
Po me të drejtë lind një pyetje nga opinioni publik: Si ndihet mazhoranca kur nuk ka një opozitë në Parlament? Po kjo opozitë e ka dënuar bojkotin, s’ka lënë gjë pa fëlliqur, po sot, çfarë po ndodh? U rrah Strazimiri dhe u shemb toka! Jo, jo! Ky ishte sebepi që kishte kurdisur Sali Berisha, deputetët e mazhorancës duhet të shahen nga gratë, nëna dhe motra, kështu ndonjëri nuk do të durojë këto fyerje dhe do kemi ndonjë sherr sado minimal për të braktisur Parlamentin. Këto janë praktika të njohura nga Berisha, provokator dhe gojëligë në çdo post, që ka patur në këto 24 vite “demokraci”. PD identike, ajo që ka qenë ndër vite, në pushtet shaj opozitën përpara ndërkombëtarëve, në opozitë s’pranon asnjë kompromis, po bredh dyerve të Europës duke sharë vendin e vet, qeverinë e shtetit të vetë…
Pse i bën këto veprime PD e sotme? Kriza drejt një shpërbërje të pashmangshme, larje hesapesh. Kjo nuk do asnjë koment, demokratët e ndershëm, pionierët e themeluesit e saj nuk do ta durojnë këtë masakër të pashoqe në PD. Tashmë Berisha dhe rrethi i tij kriminal do përballen me stuhinë e vërtetë, manipulimi i votës brenda selisë së PD është vërtetësia më e pastër e një klikë që do të destabilizojë vendin, që kërkon të bëjë spastrime si në kohën e Enverit… Enveristi Berisha nuk shkëputet nga e kaluara, është vërtetuar në këto 24 vite, si një njeri diktator dhe stalinist i betuar, duke bërë deri likujdime fizike të kundërshtarëve tij politikë. Tashmë ka ardhur koha që Prokurori i Përgjithshëm, o të lërë zyrën, o të përveshë mëngët. Të jesh kryeprokuror i një vendi me një demokraci të brishtë nuk është e lehtë, po kur demokracia dhunohet, shteti plaçkitet, bandat kriminale bëjnë larje hesapesh, prokurorin nuk duhet ta zërë gjumi i natës…
Dosja Gërdeci dhe 21 Janari, z. Kryeprokuror, pse flenë në zyrën tënde? Nuk janë kutitë e votimit të PD që fjetën deri sa u rregulluan sipas dëshirës së Berishës, atëherë u asgjësuan nga zyra e kryetarit në hije Lulzim-Berisha. Ti je kryeprokuror! Në demokraci nuk veprohet kështu z. Llalla. Lirohet Guvernatori i Bankës së Shtetit, mbahet peng një femër në qelitë e paraburgimit… Je i marrë peng nga Berisha dhe Nishani? Pse hesht? Populli po të pret, reago sa nuk është vonë, qelitë e burgut janë të barabarta për të gjithë.
PD e ka humbur trenin e demokracisë rrugëve të Europës, duke sharë si sharlatanë të dalë dore. Po drejtësia dhe prokuroria nuk janë as të PD dhe ase të një force politike. Janë mbrojtëse të dinjitetit të kombit, janë dënuese të ashpra kundër krimit dhe korrupsionit pa asnjë ngjyrë politike, ndaj zoti kryeprokuror dil nga ajo agoni që je mbyllur. Kurrë nuk është vonë, po kur vonesa i kalon limitet, zullumi bëhet i madh dhe dikush duhet të përgjigjet. Ti ndoshta pret ndonjë mbështetje nga Luli? Jo, Luli është identik kopja e atij që e emëroi në krye të PD, kopje e Berishës në veprim dhe në krim, çdo prokuror është i padenjë për të inkriminuarin… PD është në krizë me vetveten, po me frikën e madhe se disa “liderë” të saj do përballen me drejtësinë… Demokratët e vërtetë do ta rilindin demokracinë e dhjetorit të ‘90-tës.
