Jamie Shea ishte fytyra e NATO-s, të cilën audienca botërore më shpesh kishte mundësinë të shihte.
Bëhet fjalë për njeriun i cili gjatë sulmeve të NATO-s mbi Serbi ishte njeriu tek i cili shumë e shumë njerëz pritnin informata.
Konferencat e tij të rregullta për shtyp në Bruksel, ku shpjegonte qëllimet dhe arritjet e operacioneve ajrore të NATO-s, nuk lanë askënd indiferent.
Dhe në 20-vjetorin e bombardimeve të NATO-s mbi caqet strategjike serbe, përcjell Telegrafi, ish zëdhënësi i NATO-s ka thënë se i vjen keq për dëmet kolaterale, por se siç ka thënë ai “bombardimet kanë qenë të justifikuara”.
“Në situatën e dhunës dhe spastrimit etnik, NATO bëri gjënë e duhur që skenari nga Bosnja nuk do të përsëritej në Kosovë”, ka thënë Shea për BBC.
“Unë shpreh keqardhjen mbi disa detaje, por për shkak të arsyeve të përgjithshme për nisjen e fushatës – 20 vjet më vonë unë jam po aq i bindur për justifikim, ashtu si atëherë”, është shprehur pa ndonjë dilemë Shea.
“Kishte një besim në NATO dhe tek disa kryeqytete të shteteve anëtare që, pas vetëm disa sulmeve ajrore, Millosheviqi zbutet dhe ulet në tryezë. Kur kjo nuk ndodhi, ne duhej të ndryshonim tërësisht planet mediatike dhe strategjinë ushtarake për një operacion shumë më të gjatë”.
“Gjatë javëve të para, ekipi im i vogël dhe unë kishim vështirësi në mbulimin e konferencave dy-tri herë gjatë ditës, marrjen e informacioneve nga përfaqësuesit ushtarakë, si dhe nga shtetet anëtare. Prandaj, një ndihmë ka ardhur nga Londra – Alastair Campbell, këshilltari kryesor i atëhershëm për media i kryeministrit britanik Tony Blair ka ardhur në Bruksel për të fuqizuar forcat e mediave të NATO-s”.
***
Brnabiq: Jemi të vetëdijshëm për gabimet tona, por bombardimet e NATO-s nuk ishte gabimi ynë
Kryeministrja e Serbisë, Ana Brnabiq ka thënë sot se Serbia është e vetëdijshme për gabimet e bëra në të kaluarën, por që bombardimet e NATO-s në vitin 1999 ishte një gabim i të tjerëve, dhe jo i qytetarëve të Serbisë.
Sipas mediave serbe, përcjell Telegrafi, në një konferencë me rastin e 20 vjetorit të sulmeve të NATO-s kundër Serbisë, Brnabiq ka thënë se Serbia nuk duhet të harrojë viktimat e bombardimeve, shkatërrimin e fabrikave, urave dhe të ekonomisë, por është vlerësuar se duhet të përpiqet për të falur, sepse, siç tha ajo, për të kjo do të ishte mënyra e vetme për të realizuar potencialet e saj të mëdha dhe kthimin kah e ardhmja, partneriteti dhe bashkëpunimi.
“Ne jemi të vetëdijshëm se kemi gabuar, por bombardimet në vitin 1999 ishte një gabim i të tjerëve dhe jo i qytetarëve të Serbisë”, tha ajo.
Tutje ajo citohet të ketë thënë se gjatë sulmeve të NATO-s, të gjithë në Serbi ishin objektiva, pavarësisht nga gjinia, mosha, përkatësia etnike, feja apo afinitetet politike.
