Presidentja e Kosovës, Atifete Jahjaga, ka vënë theksin në nevojën e bashkëpunimit të vendeve të Ballkanit Perëndimor me qëllim të realizimit të asporatës së përbashkët të tyre për anëtarësim në Bashkimin Evropian (BE).
Duke folur në takimin e presidentëve që po mbahet në kuadrin e Procesit të Bashkëpunimit të Evropës Juglindore, në Bukuresht, Jahjaga ka theksuar përkushtimin për paqe, stabilitet e prosperitet.
“Ne kishim një të kaluar të rëndë, një të kaluar nga e cila mund të mos jemi këndellur plotësisht dhe pasojat e se cilës vazhdojmë t’i vuajmë ende, por jemi duke u bërë bashkë drejt vizionit premtues për liri, paqe, stabilitet dhe prosperitet për të gjithë, për secilin qytetar, dhe, si Presidente e Kosovës, jam e vendosur që këtë dedikim ta zbatoj në Kosovë”, ka thënë ajo.
Presidentja e Kosovës ka kritikuar politikat dhe veprimet që pengojnë ndërtimin e marrëdhënieve të mirë fqinjësore midis vendeve të rajonit. Në këtë kontekst ajo është shprehur për “implementimin e marrëveshjeve” dhe për “heqjen e barrikadave” që pengojnë bashkëpunimin.
“Rruga jonë për në BE është e kushtëzuar me aftësinë tonë që të ndërtojmë marrëdhënie të mira ndër fqinjësore, të cilat nënkuptojnë respekt për vlerat e mbajtura nga shoqëritë tona dhe për integritetin e vendeve tona respektive. Marrëdhëniet e mira nuk ndërtohen vetëm me nënshkrime marrëveshjesh, por me implementimin e atyre marrëveshjeve. Jo nëpërmes barrikadave, por nëpërmjet dialogut kuptimplotë, i cili do t’i largojë ato pengesa drejt bashkëpunimit”, ka theksuar ajo.
“Si vendi më i ri në regjion, Republika e Kosovës i ka dhënë prioritet ndërtimit të marrëdhënieve të mira ndër fqinjësore. Për ne, ndërtimi i themeleve të qëndrueshme për partneritete nuk është vetëm vendosmëri politike, por edhe e nevojshme, nëse duam të lëvizim përpara drejt përmirësimit të jetës së qytetarëve tanë dhe të sigurojmë stabilitet në regjion”, ka thënë Jahjaga.
“Ne kemi dëshmuar këtë vendosmëri në procesin e dialogut me Republikën e Serbisë, një nga ndërmarrjet më të vështira politike, që ka kërkuar një kurajo të madhe. Por ne e kemi bërë këtë sepse dëshirojmë të lëvizim përpara”, ka theksuar Jahjaga.
Presidentja e Kosovës ka bërë thirrje që Kosova të përfshihet në të gjitha nismat dhe projektet rajonale.
“Asnjë bashkëpunim në regjion nuk do të jetë i kompletuar pa pjesëmarrjen e Kosovës, asnjë politikë regjionale nuk do të jetë plotësisht e implementuar pa përfshirjen e Kosovës dhe Bashkimi Evropian nuk do të jetë i plotë pa anëtarësim të plotë të vendeve të Ballkanit Perëndimor”, ka thënë Jahjaga në mbyllje të fjalimit të sat para pjesëmarrësve të Procesit të Bashkëpunimit të Evropës Juglindore, në Bukuresht.
