Ish-kryeministri britanik Toni Bler shkruan në profilin e tij në rrjetin shoqëror “fejsbuk” se Shqipëria shënoi një hap me rëndësi në rrugën eurointegruese.
Me fare pak radhë, ish-kryeministri i Mbretërisë së Bashkuar të Britanisë së Madhe dhe Irlandës së Veriut, Toni Bler uroi Shqipërinë për marrjen e statusit “kandidat” për anëtarësim në Bashkimin Europian.
Këshilltar i qeverisë së kryeministrit socialist Edi Rama, zoti Bler shkruan gjithashtu se statusi “kandidat” është vlerësim për reformat në vazhdimësi.
Zoti Bler shkruan në profilin e tij në rrjetin shoqëror “fejsbuk” se Shqipëria shënoi një hap me rëndësi në rrugën eurointegruese.
“Urime Shqipërisë për marrjen e statusit kandidat në BE! Hapi i parë në rrugën për anëtarësimin në BE. Kjo pason përpjekjet e vazhdueshme të vendit për reforma dhe është meritë e qeverisë dhe popullit të saj. Ishte fantastike të takoja kryeministrin Edi Rama javën e kaluar”-thuhet në komentin e shkurtër të zotit Bler.
Ministrat e Jashtëm të 28-të vendeve anëtare të Bashkimit Europian ia dhanë Shqipërisë statusin “kandidat” një ditë më parë në mbledhjen që po zhvillonin në Luksemburg.
Kjo ishte hera e katërt që Këshilli i Ministrave shqyrtoi rekomandimin pozitiv të Komisionit Europian për t’ia dhënë statusin Shqipërisë, por në tri raste ishte rrëzuar.
