Ujësjellës-Kanalizime Tiranë ka nisur prej disa javësh aksionin në terren për pajisjen me matës uji, kolaudimin e atyre ekzistues për banorët e njësive administrative në Dajt dhe Kashar. Këtë fushatë dhe punën në terren të stafit të UKT-së, e cila synon të informojë banorët mbi domosdoshmërinë e formalizmit, e ka inspektuar edhe drejtori i UKT-së, z.Redi Molla.
I pranishëm në Qesarakë, në njësinë administrative Dajt, Molla pa nga afër vijimësinë e procesit dhe u shpreh se ky aksion ka si qëllim jo vetëm formalizimin, por mbi të gjitha rritjen e shërbimit në këto zona, të cilat tashmë janë nën administrimin e Bashkisë Tiranë.
“Për ish komunat e Bashkisë së Tiranës që tashmë janë aktualisht përfshirë në Bashkinë Tiranë me reformën e re administrative, ne ofrojmë të njëjtin shërbim si për qytetin e Tiranës ashtu edhe për ish-komunat Ky aksioni përbën formalizimin e të gjitha bizneseve, të gjithë familjarëve dhe në kolaudimin, fillimin e vendosjes së matësve të rinj, kolaudimin e matësve ekzistues, vendosjen e vulave, në mënyrë që ne të ofrojmë një shërbim më të mirë për klientët dhe klienti të na e shpërblejë duke paguar faturën, lidhur kontratat, formalizuar të gjithë konsumin e tij”, – u shpreh drejtori i UKT-së, pasi inspektoi nga afër vendosjen e disa matësve të ujit në shtëpitë e banorëve të Qesarakës.
Paralelisht me vendosjen e matësve të rinj, nga UKT do të bëhet edhe kolaudimi i matëseve ekzistues, pasi në rast të defekteve ata nuk lexojnë sasinë e ujit që konsumohet. Z. Redi Molla i ftoi të gjithë banorët që të përfitojnë nga kjo fushatë, pasi qëllimi i lidhjes së kontratave dhe formalizimit të shërbimit, përkthehet në një furnizim më të mirë me ujë të pijshëm.
“Ftojmë të gjithë banorët e ish – komunave të pajisen me matësa, të bëjnë kërkesa të lidhjes së kontratave të reja në mënyrë që të rritet cilësia e shërbimit dhe të përmirësohet furnizimi dhe shpërndarja e ujit në të gjithë zonën e Tiranës”, u shpreh drejtori i UKT-së, Z.Redi Molla.
Në këtë fazë është parashikuar që të vendosen 5000 matësa të rinj, veç kolaudimit të atyre ekzistues.
Të gjithë banorët e njësive në Dajt, por edhe në Kashar ku po vijon ky aksion, duhet të drejtohen në njësitë përkatëse të UKT-së për të lidhur kontratën dhe për të vendosur matëset e rinj.
