Nga Kimete Berisha
Nuk e mundi ‘blloku’, por e mundi Samia, Xhabiri, Xhaviti, Remi, Feridi, Ramizi, Enveri, Hajredini, Shefqeti, Hakubeti, etj. Kryeministri Hashim Thaçi prej sotit s’ka asnjë gisht fytyrë të flas për drejtësi e për moral, pasi që edhe ministri i tij i shëndetësisë haxhi Ferid Agani është i dyshuar për keqpërdorime dhe korrupsion me zemrat e sëmura të shqiptarëve.
Kryeministri është dashur ta shkarkojë menjëherë nga pozita ministrin e dyshuar, dhe të jap një shenjë të vogël njerëzie. Të gjithë zyrtarët e Ministrisë së Shëndetësisë e kanë rastin të organizohen me padëgjueshmëri dhe mos ta pranojnë për ministër njeriun e dyshuar për krime ekonomike, i cili çdo mashtrim që e ka bërë në këtë vend e ka bërë në emër të Zotit, të shamive dhe të Hashim Thaçit, i cili sikur të ishte veç pak njeri, do të distancohej urgjentisht nga ministri i tij i dyshuar për krime të rënda.
Kur Ambasadorja Amerikane kërkoi nga liderët e Kosovës që të mos përfshijnë në listat e tyre zgjedhore kriminelë e hajna, shumica nuk e morën seriozisht. Në listat zgjedhore të shumicës së partive politike depërtuan hajna e kriminelë. Dhe, kështu Hashim Thaçi e humbi përkrahjen amerikane, por kryesore e ruajti miqësinë me Sami Lushtakun, i cili për kuriozitet botëror merr pagën e Kryetarit të Skenderajt duke qenë në burg. Ato paga ndoshta do të mund t’i merrte retroaktive pasi që të dilte i pafajshëm nga burgu, ama që njeriu i dyshuar për krime merr pagë të rregullt gjatë procesit të gjykimit, këtë e bën vetëm një arrogancë e madhe dhe një kokë e mykur si e Hashim Thaçit.
Pagë pa punuar kanë marrë për dhjetë vite edhe punëtorët e Isa Mustafës në Komunën e Prishtinës, dhe nuk ka asnjë mundësi që ky krim të jetë bërë pa dijeninë e Kryetarit. A kthehen pagat dhjetëvjeçare në buxhetin e Komunës dhe a jep kush përgjegjësi për këtë krim të rëndë, dihet! Gjithkah nëpër Institucione jepen paga për zyrtarë fantomë që nuk i sheh as nuk i njeh kush. Sipas informatave të mia, në KEK 200 veta marrin paga pa punuar, ndërsa në Postën e Kosovës, ka zyrtarë që nuk shkojnë në punë nga një muaj dhe nuk i vëren kush që s’kanë qenë në punë. Shqiptarët e Kosovës nuk dinë të mbajnë shtet, prandaj, sikur të kishte pasur mundësi të kërkojmë protektorat nën Shqipëri, së paku do të digjeshim së bashku, më ngadalë.
P.S. Përveç Albin Kurtit, të gjithë liderët e ‘bllokut’ duhet të hetohen për prejardhjen e milionave të tyre, e mos të flasim për Hashim Thaçin dhe klanin e tij kriminal! Aktualisht, vetëm Presidentja dhe VV janë të pakorruptuar. Më tregoni se si jetohet në një shtet ku edhe çerdhet e fëmijëve janë të korruptuara!
