Daut Dauti
Gjatë Lojërave Olimpike të vitit 2012 që u mbajtën në Londër, pos ngjarjeve sportive, qenë shënuar edhe momente dhe ndodhi tjera interesante. Një nga ngjarjet me të cilën u morën shumë mediat ishte harxhimi i delegacioneve zyrtare apo shtetërore që kishin ardhur për të përcjellë lojërat olimpike. Klasifikimi i harxhimeve të delegacioneve qe ndarë në tri kategori, sipas të cilave, kriter ishte çmimi i hotelit:
- Në hotelet super të shtrenjta ose superluksoze, në të cilat një natë kushtonte disa mijëra paund, qenë vendosur delegacionet e shteteve më të varfra, zakonisht afrikane, të cilat udhëhiqen nge regjimet diktatoriale dhe të korruptuara;
- Në hotelet mesatare qenë vendosur kryesisht delegacionet e shteteve të fuqishme ekonomike, zakonisht evropiane;
- Kishte edhe kategori të tretë të hoteleve, më të lira se mesataret dhe në to qenë vendosur delegacionet e shteteve skandinave dhe të disa vendeve tjera demokratike.
Kategoria e parë, pra diktatorët dhe të korruptuarit, të cilët në Afrikë janë lloj halabakësh, bënin shpenzime astronomike edhe jashtë hotelit. Ata lojërat olimpike i konsideronin pushim. Prandaj, me vete i kishin marrë gratë, vëllezërit, kunatat, dajat, shokët dhe ndonjë akraba tjetër. Dhe, gjëja më e rëndësishme për ekonominë e Londrës, ishte se kjo kategori, nëpër dyqanet e kryeqytetit britanik, blinte gjëra pa hesap. Këta ishin njerëz që kishin nevojë të tregonin se në Londër mund të flinin në hotelet më super luksoze, të hanin ushqimet më ekzotike dhe të blinin garderobën më të shtrenjtë. Pse këta kanë një nevojë të këtillë, është çështje që dihet.
Kategoria e dytë dhe e tretë nuk dilte në ‘shopping’ sikur e para. Këta nuk tregonin se kishin ndonjë nevojë apo dëshirë të papërmbushur. Pra, këta nuk harxhonin asgjë jashtë elementares.
Nëse këtyre të dhënave ua dedikojmë vetëm pak kohë për analizë, do ta shohim një pasqyrë mjaft të qartë të kulturës së shteteve, popujve dhe udhëheqësve të tyre politikë. Këtu do të na ndihmonte për shpjegim edhe rasti i harxhimeve në hotelin e shtrenjtë të Zvicrës që bëri kryeministri i Kosovës, Ramush Haradinaj.
Kosova, pa asnjë dyshim, bënë pjesë në kategorinë e parë.
Në fotografi shihet pjesa e një dhome ‘suite’ që është më e shtrenjta në Londër. Kjo ‘suite’ është në hotelin Lanesborough dhe kushton 26 000 (nëzetegjashtëmijë) paund. Ky është çmim i vitit 2015, i cili sot me siguri është më i lartë. Duhet ta dini edhe këtë fakt nëse rastësisht mendoni të qëndroni në këtë hotel.
