Nga Arben Velo
Një ditë më parë, një vajzë 25-vjeçare nga fshati Gjerbës i Mallakastrës ra në një pus uji, i hapur në thellësi mbi 20 metra nën tokë. Pusi shërben për të furnizuar me ujë banorët e një pjese të mirë të këtij fshati. Kjo në mungesë të rrjetit ujësjellës. Alarmit, frikës për jetën e së resë, iu përgjigj fillimisht policia e më pas këta të fundit lajmëruan edhe shpëtuesit. U desh ndërhyrja e specialistëve të zjarrfikëseve që të shpëtonin jetën e vajzës. Ata nuk kishin thuajse asgjë për të përdorur në këtë ngjarje. Me litarë dhe mjete të tjera të rastit shpëtuan një jetë. Dhe në këtë rast duhen cilësuar heronj. Erlind Korçari, që u fut me mjete rrethanore në pusin e thellë, pësoi goditje. Si pasojë u plagos edhe vetë. Vajza 25-vjeçare e quajtur, Arta Bregasi, u dërgua së bashku me efektivin e repartit zjarrfikës të qytetit në spitalin e Ballshit e, që andej, për trajtim më të specializuar në spitalin Fier. Të dy morën mjekimin e nevojshëm dhe falë ndërhyrjes dhe ndihmës së bluzave të bardha, iu rikthyen familjeve të tyre, vajza të afërmve në fshat dhe, efektivi, të afërmeve në qytezën e Cakranit. Vajza pas tmerrit nga goditja që pësoi, ndihet mirë që e shpëtoi një njëri me uniformë.
Zjarrfikësi i papaguar nga shteti, ndihet mirë që shpëtoi një jetë, por shpreson që fundi i zi dhe pa dritë i pusit të ujit që pa me sytë e tij, të mos nënkuptojë fatin që ka ndjekur dhe po ndjek këtë repart dhe nëntë kolegët e tij që punojnë me varësi të dyfishtë: në njërën anë varen nga pushteti lokal dhe në anën tjetër nga Drejtoria e Përgjithshme në Tiranë. Zjarrfikës pa mjete, pa paga Shprehja “Larg zjarri nga unë” më së miri mund të përdoret në këto ditë qershori në Mallakastër. Repartet zjarrfikëse janë jashtë funksioneve. “Atë që ta bënë perëndia, zjarri dhe shteti, nuk ta bënë askush”, thotë populli. Dhe në të vërtet deri në ditën e sotme, në këtë rreth kanë ndodhur dy mrekulli. Perëndia ende nuk e ka lëshuar nëpërmjet heshtës së saj zjarrin në terrenin e thyer kodrinor të këtij rrethi.
Zjarret kanë ndodhur vetëm në dy raste, gjatë qershorit, në Mallakastër. Një zjarr ra para disa ditësh në TEC dhe një tjetër në një shkurrishte, që fatmirësisht nuk u përhap. Këto janë dy rastet e shënuara për këto ditë qershori. Flakët deri tani kanë falur dhe nuk kanë dënuar mallakastriotët dhe pasurinë kombëtare. Por atë që nuk kanë bërë dy të parët, zjarri dhe uji, e ka kryer më së miri shteti me mosveprimin e tij. Reparti i zjarrfikësve në qytet ka një mjet në dispozicion. Ai ka pësuar dëmtime dhe është jashtë pune. Reparti tjetër i zjarrfikëseve në UPTHN, Ballsh, edhe pse ka tre mjete në shërbim të mbrojtjes kundër zjarrit dhe shpëtimit të qytetarëve, nuk mund t`i vendosë ato në gjendje pune. Shkak në këtë nuk është gjendja teknike, por në mënyrë paradoksale mungon karburanti. Uzina që prodhon naftë dhe hidrokarbure për të furnizuar gjithë Shqipërinë, nuk furnizon serbatorët e mjeteve zjarrfikëse. Tri mjetet ndodhen të parkuara në garazhin e tyre, ngjitur me TEC-in e këtij rrethi, me serbatorë bosh! Edhe specialistët që shërbejnë në këto reparte, nuk janë paguar me rrogat mujore që duhet të marrin.
Mungojnë fikset e dorës që duhet të shuajnë zjarret
Rasti i djeshëm tregoi realisht se çfarë ka ndodhur me këtë repart. Pas njoftimit të bërë nga ana e policisë me rregullore i takon që specialistët zjarrfikës të bëhen gati për 30-35 sekonda e të dalin nga reparti së bashku me mjetet që disponojnë në gatishmëri. Pas njoftimit të dhënë nga policia ditën e djeshme për ndihmë, zjarrfikësve iu është dashur të presin për të ardhur një mjet tjetër, sepse mjet nuk disponojnë. Për më shumë se 45 minuta kanë pritur zjarrfikësit për mjet që të shkojnë në vendin e ngjarjes në fshatin Gjerbës. E gjitha sepse reparti nuk ka asnjë kusht për të qenë i gatshëm veç fuqisë njerëzore dhe vitalitetit të kë- tyre njerëzve. Në godinë mungojnë veç mjeteve zjarrfikëse edhe fikset e dorës. Fikset që janë të detyruara me ligj t’i kenë gjithë njësitë shitëse tregtare, administrata deri dhe familjet në pallate, mungojnë në këtë rast në repartin që lufton kundër zjarrit.
Ngjarja e dytë Ngjarja e dytë ka ndodhur para tre ditësh në TEC-in Ballsh. Në repartin kryesor të tij për shkak të një shkëndije elektrike ra zjarr. Asnjë mjet nuk lëvizi nga vendi i parkimit. Nuk kishin karburant. Zjarrfikësit u detyruan të përdornin fikset me shkumë që fatmirë- sisht ndodheshin aty brenda sallës dhe arritën të shuanin flakët që rrezikuan të linin pa energji elektrike gjithë Mallakastrën. Veç ndriçimit, Mallakastra do të ngelej edhe pa ujë. Furnizimi kryesor i qytetit dhe rrethit bëhet nga vendburimi i Poçemit. Pompat e këtij stacioni furnizohen me energji elektrike nga TEC-i në fjalë. Sikur të mos mjaftonte mungesa e karburantit në mjete, 40 punonjësit që shërbejnë në këtë repart kanë dhjetë muaj pa marrë rrogat. Të lënë në mëshirë të fatit, ata po braktisin punën. Kjo do të thotë se tri mjetet e këtij reparti që nga gjendja teknike janë mirë, të mos shërbejnë në raste zjarresh, jo vetëm në këtë rreth, por as brenda uzinës. Kujtojmë që në këtë uzinë flakët janë më se të zakonshme për shkak të natyrës së punës dhe rrezikut në depozitat e naftës nga piroforet që vetëndizen nga temperaturat e larta. Disa depozita morën flakë para dy viteve duke rrezikuar jetën e punonjësve, uzinën, por edhe qytetin e më gjerë. Në kushtet kur vera sa ka nisur, askush nuk mund ta imagjinojë se ç`mund të ndodh me një uzinë jashtë kushteve teknike, pa zjarrfikëse në gatishmëri dhe pa personel të gatshëm. Ndërsa askush nuk mund të parashikojë se çfarë mund të ndodh me një qytet si Ballshi, me dy reparte zjarrfikësesh dhe pa asnjë mjet e shërbim në gatishmëri.
