Kryegjyshi Botëror Baba Edmond Brahimaj tha në këtë trevë të Korçës se “bektashizmi ka qenë dritë, dritë do të mbetet dhe do të vazhdojë të ketë dritë”!
Baba Abdullah Melçani ishte i pari që 400 vjet të shkuara mblodhi besimtarët bektashinj në teqenë e kësaj treve të Korçës, kryeqendra e zhvillimit kulturor dhe historik të Shqipërisë Juglindore.
Sot, 400 vjet më pas, u vendos në Melçan guri i themelimit për ta rindërtuar Teqenë e Baba Abdullahut.
Teqeja e Baba Abdullah Melçanit është një ndër tre teqetë më të vjetra të Shqipërisë dhe me vlera të mëdha të zhvillimit të besimit, kulturës dhe historisë së shqiptarëve.
Objekti i kultit të besimtarëve bektashinj do të ndërtohet pikërisht në themelet e teqesë së vjetër, që regjimi diktatorial komunist i Enver Hoxhës e shndërroi në repart ushtarak.
Në ceremoni ishte i pranishëm Kryegjysëhi Botëror Baba Edmond Brahimaj, Baba Sadik Hibrokodheli, besimtarë prej an’ e kënd vendit, klerikë, drejtues vendorë dhe kryetari i Bashkisë së Korçës, Sotiraq Filo.
Kryegjyshi Botëror Baba Edmond Brahimaj tha se teqeja e Melçanit do të plotësojë nevojat në shërbim dhe me përkushtim të bektashinjve në trevën e Korçës.
“Falenderoj nga zemra, shpirtërisht baba Sadikun, por dhe të gjithë ju që mundësuat të bëjmë këtë vepër të shkëlqyer në këto kodra të bukura të Melçanit, në këto vende të bukura të Korrçës”.
“Të tregojmë që bektashizmi ka qenë dritë, dritë do të mbetet dhe do të vazhdojë të ketë dritë!”-tha Kryegjysëhi Botëror Baba Edmond Brahimaj.
Mandej, Baba Edmondi falenderoi të gjithë të pranishmit, por edhe njëherë tjetër Baba Sadikun:” Qoftë dritë dhe ndriçoftë në rrugën e bektashizmit”!
Baba Sadik Hibrokodheli uroi mirëseardhjen të gjithë të pranishmëve:
“Këtu, ku të gjithë Baballarët, dervishët, që kanë shërbyer dhe kanë parakaluar nga ky altar i shenjtë, kanë bërë epokë në historinë e bektashizmit, kanë bërë epokë në historinë kombëtare”.
Baba Sadiku është edhe projektues i ndërtesës së teqesë së Melçanit që do të përfundojë pas 5 vjetësh:
“Si Baba, si vëlla, si mik i juajio do të jem një ndërtues, do të jem një mbështetje shpirtërore për të gjithë”!
Kryebashkiaku i Korçës, Sotiraq Filo (Partia Socialiste) tha se e kishte kënaqësi të përshëndeste në emër të Bashkisë në një ceremoni që “nderon të gjithë trevën”.
Zoti Filo u ndal te rëndësia që ka për shqiptarët ndërtimi i një objekti kulti, që siç theksoi “është ngjarje e shënuar kudo në botë, për çdo komunitet fetar”:
“Aq më tepër këto janë ngjarje të shënuara për komunitetet fetare në Shqipëri, për shkak të persekucionit që kanë vuajtur këto komunitetete gjatë periudhës së komunizmit, ku shumë nga këto objekte kulti janë shkatërruar”.
