Presidenti Bujar Nishani garantoi se në krye të SEECP-së, Shqipëria me moton “Regional ownership in action”, merr mandatin me besimin dhe përkushtimin e plotë për të arritur të gjitha objektivat e saj ambiciozë
Shqipëria u angazhua të përmbushë me devotshmëri politikat për paqë, siguri e bashkëpunim kur nisi të udhëheqë zyrtarisht prej sot Procesin e Bashkëpunimit të Evropës Juglindore (SEECP).
Presidenti Bujar Nishani pranoi presidencën e radhës nga homologu i tij i Rumanisë, Trajan Basesku në takimin e Bukureshtit.
Pas përfundimit të punimeve, presidenti Nishani dha deklaratën zyrtare në konferencë të përbashkët për gazetarë me zotin Basesku.
“Republika e Shqipërisë mbetet e përkushtuar në forcimin e marrëdhënieve të fqinjësisë së mirë dhe intensifikimit të bashkëpunimit rajonal”-tha presidenti.
Ndërsa shprehu vlerësimet për presidencën rumune, zoti Nishani nuk i rreshti lëvdatat për të, pasi çmoi punën profesionale dhe të përkushtuar.
Për presidentin Nishani, e tëra kjo udhëheqje shënoi arritje të rëndësishme, veçanërisht në bashkëpunimin në drejtësi, punë të brendshme, luftë kundër krimit të organizuar e korrupsionit.
Zoti Nishani garantoi se në krye të SEECP-së, Shqipëria me moton “Regional oënership in action”, merr mandatin me besimin dhe përkushtimin e plotë për të arritur të gjitha objektivat e saj ambiciozë.
Presidenti nxiti bashkëpunimin ndërkuvendar, në statistika dhe çështjet konsullore.
“Roli i Shqipërisë në rajon është aktiv dhe konstruktiv, sepse ne besojmë se edhe interesave kombëtare shqiptare u shërbehet më së miri me një rajon në paqe e stabilitet të qëndrueshëm, të integruar në institucionet euroatlantike”-tha presidenti.
Shtyllat kryesore në udhëheqjen e SEECP-së nga Shqipëria, sipas zotit Nishani do të jenë forcimi i rolit rajonal, promovimi i dialogut mes anëtarëve dhe fuqizimin e rëndësisë sektoriale të organizatës.
“Bashkëpunimi rajonal dhe marrëdhëniet e fqinjësisë së mirë janë shtylla që garantojnë paqen, sigurinë e stabilitetin në rajon dhe parakushte për integrimin e tij në Bashkimin Evropian”-tha ai.
Presidenti vërejti sakaq se Procesi i Bashkëpunimit të Evropës Juglindore mbetet forumi qendror politik, bazuar në vullnetin e vetë vendeve të rajonit, andaj theksoi që duhet të jetë institucion gjithëpërfshirës dhe me qëndrime të njehsuara për problemet e përbashkëta në procesin e zhvillimit dhe integrimit europian.
Zoti Nishani theksoi se në këtë frymë, pjesëmarrja e Kosovës në SEECP është shumë e rëndësishme, jo vetëm për vetë Kosovën, por edhe për rajonin tonë në tërësi.
“Bazuar në Parimet e Kartës së SEECP-it dhe marrëveshjet ndërmjet Kosovës dhe Serbisë, të lehtësuara nga Bashkimi Evropian, sipas së cilave, asnjëra palë nuk do të pengojë dhe nuk do të inkurajojë një palë të tretë të bllokojë përparimin në rrugën e integrimit evropian, Shqipëria ka mirëpritur pjesëmarrjen e Kosovës në veprimtaritë e SEECP-it gjatë vitit të kaluar dhe përshëndet vendimin për ta ftuar Kosovën që të marrë pjesë në mënyrë të përhershme në veprimtaritë dhe takimet e të gjitha niveleve dhe në kushte të barabarta të SEECP-it”.
Presidenti shpreson që Shqipëria të përmbushë qëllimin që Grupi Ad-Hoc i punës të dalë me një Dokument konkret për veprimtarinë në fund të Presidencës së radhës.
“Me besimin e palëkundur se të gjithë bashkë do ta bëjmë Presidencën Shqiptare një histori suksesi, më lejoni të shpreh gjithashtu dëshirën për t’u takuar me ju në Tiranë në të ardhmen e afërt”-përfundoi presidenti.
