Grupi Parlamentar i PD debatoi për reformën në drejtësi. Por paralelisht deputetët ngritën shqetësimin për reformën zgjedhore. Lulzim Basha e deklaroi hapur pas mbledhjes se reforma në ligjin zgjedhor është kusht edhe për “drejtësinë”. “Zgjedhjet e lira dhe të ndershme dhe gjithçka që ka të bëjë me garantimin e zgjedhjeve të lira dhe të ndershme janë prioritet i prioriteteve”, u shpreh ai.
Ish –kryeministri Sali Berisha ishte kategorik në mbledhjen e grupit: “Nuk ka zgjedhje pa rrëzuar Edi Ramën”, u tha ai deputetëve.
Astrit Patozi, që u përball me një presion të egër në zgjedhjet e fundit vendore në bashkinë e Vorës, ku mazhoranca garonte me një kandidat të LSI, e quajti reformën zgjedhore si çështje thelbësore për të ardhmen e PD. “Nëse do të shkojmë në zgjedhjet e vitit 2017 në të njëjtën mënyrë si dy zgjedhjet e fundit, atëherë do të asgjësohemi. Në krye të kupolës është një grup që vetëm është mësuar me vjedhjen e votës, i cili do të shumëfishojë mandate nëse nuk ndërhyhet me një reformë zgjedhore”, u shpreh ai.
Nga diskutimet me dyer të mbyllura deri tek deklaratat publike, shqetësimi i PD është i qartë. Lulzim Basha mendon se veç reformës elektorale, për të garantuar zgjedhjet Edi Rama nuk duhet të jetë në qeveri. Ai vazhdon t’i mëshojë idesë për një qeveri teknike. “Partia Demokratike dhe unë e kemi bërë të qartë prej fillimi, pa një reformë zgjedhore që garanton zgjedhje të lira dhe të ndershme asgjë tjetër nuk do të funksionojë normalisht në këtë vend. Natyrisht parametri i parametrave mbetet një qeveri teknike sepse Edi Rama tashmë është faktuar botërisht një person jo në gjendje për të garantuar zgjedhje të lira dhe të ndershme”, deklaroi pas mbledhjes.
PD do t’i kërkojë komisionit të posaçëm për reformën zgjedhore të implementojë elementë për të patur siguri se vota nuk do të vidhet, siç ndodhi në zgjedhjet e pjesshme në Korçë.
“Së shpejti do të finalizojmë qëndrimin tonë për procesin zgjedhor bashkë me aleatët tanë dhe pres që brenda kësaj jave apo fillimi i javës së ardhshme Komisioni Ad-Hoc për Reformën Zgjedhore, mazhoranca të ketë të parashtruar në mënyrë profesionale standardin europian të zgjedhjeve të lira dhe të ndershme, votimin biometrik, numërimin elektronik dhe të gjithë aspektet e tjera që kanë të bëjnë me shkurtimin e duarve të korrupsionit dhe krimit nga vota e shqiptarit”, thotë Basha.
Pas dekriminalizimit dhe futjes së reformës në drejtësi në hullitë e balancës së ndarjes së pushteteve, me “çmontimin e kapjes politike të sistemit të drejtësisë nga Edi Rama”, siç thotë nënkryetari i Komisionit të Reformës në Drejtësi, Eduard Halimi, PD ka shpallur një tjetër betejë: atë të garantimit të votës së shqiptarëve.
A është ky një tjetër “pretekst” për të mos e votuar reformën në drejtësi, siç thotë PS dhe kryeministri Rama sa herë PD kërkon garanci për respektimin e vendimeve të Gjykatës Kushtetuese apo të ligjit për Dekriminalizimin? Apo është frikë reale se me Edi Ramën dhe Ilir Metën të bërë bashkë, vota e shqiptarëve nuk do të jetë e lirë për të zgjedhur alternativën më të mirë?
Çfarëdo që të qëndrojë pas këtij shqetësimi të PD, që bazohet në precedentë të ngjashëm me zgjedhjet në Korçë apo zgjedhjet e vitit 2013 në zona të nxehta, si Lezha, ku pati edhe përplasje fizike të kandidatëve dhe një vrasje të lidhur me procesin zgjedhor, opozita e ka të artikuluar qartë qëndrimin e saj: Nuk ka asgjë më të rëndësishme sesa heqja e duarve të Edi Ramës dhe Ilir Metës nga komandimi i votës së shqiptarëve.
“Ua kam thënë dhjetëra herë këtu dhe në të tjera forume, dhe si të tilla (zgjedhjet e lira e të ndershme) janë dhe mbeten kusht absolut i Partisë Demokratike dhe i opozitës për gjithçka tjetër në këtë vend”, deklaron Lulzim Basha.
