Presidenti Nishani e cilësoi marrjen e statusit si një moment reflektimi për të gjithë, ndërsa e quajti atë kontribut të të gjitha qeverive dhe partive politike shqiptare.
Si politikani që qëndron mbi palët, kreu i shtetit vlerësoi çdo kontribues në marrjen e statusit që nga ndërkombëtarët e deri tek qytetari më i thjeshtë.
“Sot është dita për të reflektuar për të reflektuar për të gjithë rrugën e përshkruar deri këtu, për vonesat e shmangshme që nuk duhen përsëritur më për kohën e humbur që nuk duhet humbur. Sot është dita për të shikuar përpara. Një sfidë u mbyll një tjetër duhet të hapur fillimi i menjëhershëm nga puna për hapjen e negociatave. Detyrat janë të qarta. Përmbushja e tyre në kohë dhe me cilësi është provë e re e pjekurisë së klasës politike”, u shpreh presidenti Nishani.
Presidenti i Republikës organizoi një pritje në ambientet e Presidencës ku ishin të ftuar deputetë, ministra, ish presidentë e ish-kryeministra, diplomatë, përfaqësues të medias dhe shoqërisë civile, nga fusha e artit, e shkencës etj.
“Duke vlerësuar përpjekjet tona për përmbushjen e standardeve. Duke na bërë pjesë të së ardhmes së tyre, pjesë të promovimit të vlerave, të lirisë, barazisë, demokracisë. Falënderimet e mia më të thella u shkojnë qeverive shqiptare në vite, partive politike, shoqërisë civile, medias, gjithë shqiptarëve të cilët kanë vënë gurin e tyre në ngrehinën e madhe të integrimit”, tha Nishani.
Për kreun e shtetit, Shqipëria e meritonte statusin e vendit kandidat.
“Statusi është guri më i ri në këtë ndërtesë të shtrenjtë për ne është arritja jonë e përbashkët e të gjithëve pa dallim. Finalizimi me sukses i marrjes së statusit është njohje e ndryshimeve rrënjësore. Unë dua të them se Shqipëria e meritonte pa as më të voglin dyshim marrjen e statusit kandidat”, tha Nishani.
Ai theksoi se marrja e statusit mbylli një etapë të rëndësishme në rrugën drejt integrimit. Nishani theksoi se për marrjen e statusit kanë kontribuar të gjitha forcat politike.
“Kjo është një ditë e shënuar për të gjithë. Është një ditë e veçantë feste për brezin e ri që sheh të ardhmen e tij evropiane. Në rrugën e integrimit në Evropë është dita t’u shprehim mirënjohje studentëve të përfshirë në lëvizjen e dhjetorit. Sot është një ditë për të falënderuar. Falënderimi im i parë i shkon Komisionit Evropian, Parlamentit Evropian dhe Këshillit Evropian, të cilët kanë dhënë një kontribut rrënjësor duke na qëndruar pranë në momente të vështira për ne”, tha Nishani.
