Ekspozita “Shenja shqiptare”, çel edicionin e parë në galerinë e qytetit të Fierit. Kjo eskpozitë i kushtohet grafikës artistike. Veprat e artistëve të njohur shqiptarë si: Sadik Kaceli, Gazment Leka, Mustafa Arapi, etj., janë bashkuar me ato të artistëve shqiptarë të Maqedonisë: Burhan Ahmeti, Behar Ferati dhe atyre të Kosovës: Fatmir Kryka, Lulzime Osmani dhe Valdeta Veliu Vuçitërna. Kuratori i kësaj ekspozite është Arben Koliçi, i cili një vit më parë projektoi realizimin e këtij eventi mjaft të rëndësishëm, pasi në vendin tonë mungon prezantimi i grafikës, si zhanër më vete i artit pamor, prandaj pas këtij realizimi synon që të shndërrohet në traditë.
“Shenja për artistin është vetë gjeneza, fillimi i procesit, mund të lind me spontanitet nga gjesti inkoshient i përditshmërisë”, shpjegoi kuratori i kësaj ekspozite Arben Koliçi, në lidhje me emërtimin e eventit si “shenja shqiptare”. Për artistët grafika është shprehje karakteri, intimiteti, lirie, por mbetet gjithashtu dhe një dokumentim historik. Dikur artistët e grafikës limitoheshin në teknika, ndërsa në dy dekadat e fundit janë bërë përpjekje për përmirësimin, rikuperimin e kësaj gjinie artistike. Pikërisht ballafaqimi i akademive shqiptare në Shqipëri me ato në Kosovë dhe Maqedoni, ballafaqimi mes brezave, shenjave, ishte dhe qëllimi i kësaj ekspozite.
Në këtë ekspozitë pjesëmarrësit patën fatin të shijojnë veprat më të hershme të këtij zhanri në vendin tonë, si krijimin e artistit të njohur Sadik Kaceli, “Një pikë loti” 1942, artistit Andon Kuqali, “Motive lufte” 1943, pasuar nga veprat e Lumturi Dhramit dhe Vilson Kilica krijuar në vitin 1970, Vlash Prifti më 1973 për të mbërritur te emrat e njohur si: Gazment Leka, Mustafa Arapi etj.
Gjatë hapjes së ekspozitës në galerinë e qytetit merrnin pjesë disa nga artistët pjesëmarrës, përfaqësues vendor, artdashës dhe nxënës të liceut artistik. Drejtori i galerisë, Pandeli Lena, në hapje të ekspozitës është shprehur se kjo galeri arriti të përfshijë në eventet e shumta të saj dhe këtë ekspozitë, e cila do të jetë dëshmi e gjallë për brezat që do të vijnë, një dokumentim i ekzistencës dhe zhvillimit të artit të grafikës artistike.
