Presidenti e argumenton vendimin e tij duke theksuar se “ky ligj, sjell ndryshime të cilat kanë pasoja kritike në ushtrimin e kompetencave kushtetuese të Presidentit
Presidenti i Republikës, Bujar Nishani ka kthyer për rishqyrtim në Kuvend ligjin ‘Për pushtetet dhe autoritetet e drejtimit e të komandimit të Forcave të Armatosura të Republikës së Shqipërisë”.
Presidenti e argumenton vendimin e tij duke theksuar se “ky ligj, sjell ndryshime të cilat kanë pasoja kritike në ushtrimin e kompetencave kushtetuese të Presidentit, si dhe në balancën e ndarjes së pushteteve midis Kuvendit, Presidentit, Kryeministrit, si dhe autoriteteve të tjerë të përcaktuara në ligj.”
Në argumentimin e tij, presidenti sqaron se ligji parashikon kalimin e kompetencave për miratimin e strukturës organizative dhe planit të përhapjes dhe vendosjes të Forcave të Armatosura nga Presidenti tek Kryeministri dhe kufizim të kompetencave të Presidentit të Republikës lidhur me emërimet, lirimet e ushtarakëve me grada madhore.
“Kalimi i këtyre kompetencave tek Kryeministri nuk i shërben demokratizimit të procesit dhe është në kundërshtim me parimin e kontroll-balancës, duke marrë në konsideratë varësinë e Ministrit të Mbrojtjes nga Kryeministri.”- thekson Presidenti.
Presidenti konsideron se ndryshimet që sjell ky ligj, nuk janë aspak të justifikuara dhe shkelin parimin e sigurisë juridike në një shtet demokratik.
