Policia e Londrës njoftoi kohë më parë se kishte rritur stafin e policëve të armatosur, nga 800 në 2.800 persona. Ky grupim quhet “Herkules”. Bëhet me dije se ata do të mbajnë pushkë gjysmë automatike SIG, pistoleta, si dhe modelet më të reja të motoçikletave. Gjithashtu do të kenë në dispozicion edhe anije të prodhimit më të fundit, nëse terroristët do të ikin përgjatë lumit Tamiz.
“Tani për tani nuk kemi ndonjë informacion se do të ndodhin sulme, por ishim dëshmitarë të asaj që ndodhi në Evropën Perëndimore. Kemi parë sulmet në Gjermani, Belgjikë, Francë, dhe do të ishim vërtetë të çmendur po të injoronim këtë fakt, dhe për këtë është e rëndësishme të shtojmë numrin e policëve të armatosur nëpër rrugë”, tha Hogan Hou.
Duke folur për “Mail on Sunday”, drejtori i policisë në Londër shtoi se Anglia ka shumë mundësi të goditet nga sulmet terroriste. Sipas tij, nuk duhet thënë “se kur do të ndodhin dhe përse”. Edhe kryetari i Londrës, Sadih Khan u shpreh se po ai vetë dhe gjithë stafi i tij po bëjnë gjithçka që është e mundur që të mbrojnë qytetarët nga çdo lloj sulmi i mundshëm. Khan theksoi se synon që ta bëjë Londrën një qytet të sigurt.
Qeveria britanike gjithashtu po synon që të ketë policë të përgatitur edhe në qytete të tjera, përveç Londrës. Mirëpo, kjo pritet të ndodhë në vitin 2018. Kjo njësi e policisë do të jetë tepër e specializuar në luftën kundër terrorizmit dhe do të quhet “C-men” (Counter Terrorism Specialist Firearms Oficers).
