Ultimatumi lidhet me pronat në Himarë, një ndër pikat është mbajtja e një referendumi lokal “ku populli i Himarës të shprehë vulletin e vet për të vendosur për të ardhmen e tij”
PBDNJ e PR kërcënojnë me mosbindje civile në se zbatohet ligji nr7501 në Himarë. Gazeta Shqiptare shkruan sot se Organizata e Minoritetit Etnik Grek, Partia Bashkimi për të Drejtat e Njeriut dhe Partia Republikane në Himarë shpallin zyrtarisht vendimin për mosbindje civile ndaj ligjit Nr.7501 “Për ndarjen e tokës bujqësore në përdorim” duke deklaruar se “populli i Himarës njeh vetëm pronat e trashëguara nga gjyshërit, bazuar në nenin 41 të Kushtetutës së Shqipërisë”.
Ultimatumi që PBDNJ bashkë me PR I kanë dredjtuar qeverisë ka tre pika dhe një prej tyre është mbajtja e një referendum lokal “ku populli i Himarës të shprehë vulletin e vet për të vendosur për të ardhmen e tij”, në rast se nuk do të merret në konsideratë propozimi për bashkimin në një njësi më vete administrative të Bashkisë Himarë me Komunën Lukovë.
Vendimi i dy partive shqiptare, i mbështetur nga OMONIA dhe pesë shoqata lokale vjen fill pas takimit konsultues që ministri i Shtetit për Pushtetin Vendor, Bledi Çuçi zhvilloi me banorë të zonës për reformën e re administrativo-territoriale. Në këtë bashkëbisedim Çuçi theksoi se “njësitë vendore të Himarës, Vranishtit dhe Lukovës do të përbëjnë një zonë funksionale më vete që do t’u sigurojnë banorëve më shumë të ardhura”.
Por nga ana e tyre himariotët e pranishëm në këtë bashkëbisedim duke mos refuzuar bashkimin me Lukovën kontestuan bashkimin me Vranishtin. Më herët Çuçi, në emër edhe të qeverisë shqiptare, ka bërë të qartë se me ndarjen e re territoriale të vendit, Himara nuk do të jetë një njësi administrative më vete, pasi sipas tij këtë status do ta gëzojnë vetëm zonat minoritare.