Takimi i studiuesve të gjuhës ka qenë i dyti për këtë vit, pasi në mars ishte mbajtur një takim në Prishtinë
Këshilli Ndërakademik për Gjuhën Shqipe në takimin e fundit ka propozuar t’i kushtohet vëmendje diversitetit kulturor dhe të mos ketë stigmatizim të asnjë varianti të shqipes, raporton Koha.net.
Disa çështje të sintaksës dhe disa të tjera të gjuhës shqipe në shkolla kanë qenë temat që kanë diskutuar anëtarët e këtij organi nga Kosova e Shqipëria, në takimin e mbajtur në Tiranë. Por, propozimet konkrete që kanë dalë nga ky takim pritet të bëhen publike nga Kryesia e Këshillit Ndërakademik për Gjuhën Shqipe. Takimi i studiuesve të gjuhës ka qenë i dyti për këtë vit, pasi në mars ishte mbajtur një takim në Prishtinë, nga i cili Këshilli kishte dalë me disa propozime në fushën e drejtshkrimit dhe të morfologjisë, si edhe për përdorimin e shkronjës së madhe dhe drejtshkrimin e emrave të vendeve.
Studiuesi i gjuhës, Bardh Rugova, anëtar i Këshillit, ka thënë se në takimin e mbajtur në Tiranë është diskutuar për disa çështje të sintaksës dhe të gjuhës shqipe në shkolla.
“Në seancën për sintaksën nuk ka pasur ndonjë propozim konkret. Kryesisht janë shqyrtuar prirjet e shqipes, gabimet më të shpeshta e kështu me radhë. Në seancën për gjuhën shqipe në shkollë është vendosur që t’u bëhen disa propozime ministrive përkatëse për programet mësimore, tekstet, mësimdhënësit dhe vlerësimin e nxënësve”, ka thënë Rugova.
Sipas tij, një tjetër temë që ka diskutuar Këshilli Ndërakademik për Gjuhën Shqipe lidhet me stigmatizimin e varianteve të shqipes.
“Po ashtu është diskutuar që t’i kushtohet vëmendje diversitetit kulturor dhe të mos ketë stigmatizime të asnjë varianti të shqipes”, ka thënë Rugova. Ai ka shtuar se Këshilli nuk bën vlerësime të tipit mirë apo keq, por vlerëson gjendjen ashtu siç është.
“Ne e vlerësojmë gjendjen të tillë çfarë është dhe kemi parë disa prirje interesante edhe sa i përket sintaksës, por edhe sa i përket shqipes në shkollë. Besoj se propozimet konkrete do të vijnë nga Kryesia e Këshillit”, ka thënë ai.
Studiuesi i gjuhës, Rrahman Paçarizi, që po ashtu ka qenë pjesë e takimit të mbajtur në Tiranë si anëtar i Këshillit, ka thënë se sa u përket çështjeve të sintaksës janë diskutuar materialet e prodhuara nga grupet punuese të Prishtinës dhe Tiranës dhe përgjithësisht ka pasur pajtueshmëri.
“Dallimet kanë konsistuar në faktin nëse duhet mbajtur qëndrim të fortë ndaj prurjeve nga jashtë në strukturat sintaksore apo duhet gjetur rrugët për inkorporimin e atyre prurjeve në strukturën e shqipes, në rastet kur këto prurje paraqesin fenomene të cilat tashmë janë pranuar dhe përdoren gjerësisht”, ka thënë Paçarizi.
Sipas tij, sa i përket shqipes standarde në shkolla, Këshilli Ndërakademik ka qenë edhe më unik në atë se duhet kushtuar kujdes më i madh mësimit të gjuhës shqipe nëpër shkolla dhe që rëndësia e gjuhës shqipe të theksohet e manifestohet jo vetëm në lëndën e gjuhës shqipe, por edhe në lëndët tjera.
“Propozimet kanë qenë shumë interesante e ndër to mund të theksohet marrja e grupeve punuese edhe me metodologjinë e mësimdhënies së gjuhës shqipe, ku udhëheqësit e grupeve kanë propozuar një metodë mësimi, sipas së cilës bëhet kalimi më i lehtë dhe më efektiv nga varieteti që fëmija e mëson në shtëpi në përdorimin e varietetit të standardizuar të gjuhës shqipe, në mënyrë që fëmija ta kuptojë dhe pranojë qartë dhe lehtë standardin si gjuhë e komunikimit dhe të ketë parasysh domenet e përdorimit të tij”, ka thënë Paçarizi.
Paçarizi ka shtuar se Këshilli Ndërakademik për Gjuhën Shqipe në takimin e mbajtur së fundi ka kërkuar nga grupet punuese për sintaksën dhe për gjuhën në shkolla që të përgatisin nga një dokument të harmonizuar të përbërë nga propozimet dhe diskutimet e të dyja grupeve punuese.
“Shpresojmë se shumë shpejt do të dilet edhe me një komunikim zyrtar për mediet lidhur me propozimet për këto dy çështje e sidomos sa i përket shqipes standarde në shkolla”, ka shtuar ai.
Në takimin e mbajtur në fund të javës së shkuar në Tiranë, pos Rugovës e Paçarizit, nga Kosova kanë marrë pjesë akademik Rexhep Ismajli, studiuesit Imri Badallaj, Shefkije Islamaj, Abdullah Zymberi, Isa Bajçinca.
Ndërsa nga Shqipëria kanë marrë pjesë akademik Jani Thomai, akademik Kolec Topalli, studiuesit Mehmet Çeliku, Enver Hysa, Gjovalin Shkurtaj, Shezai Rrokaj, Seit Mansaku dhe Tomor Osmani.
Takimi i parafundit i Këshillit Ndërakademik për Gjuhën Shqipe ishte shoqëruar me reagime. Në maj të këtij viti mediet shqiptare kishin raportuar se një grup prej njëzet vetash, ku gjysma prej tyre nuk janë gjuhëtarë, i kishin dërguar një letër kryeministrit Edi Rama, me të cilën kërkonin që Qeveria të ndërhynte në mbrojtjen e gjuhës shqipe. Fajin për shkatërrimin e gjuhës shqipe ky grup ia kishte lënë, siç shkruhej në letër, “këshillit të ashtuquajtur ndërakademik”. Por ky reagim për anëtarët e Këshillit nuk është konsideruar serioz e as profesional.
Këshilli Ndërakademik është themeluar nga dy akademitë, me nismën e Akademisë së Shkencave të Shqipërisë e në bazë të kërkesave të konferencave shkencore të mëhershme, dhe ka status të institucionit të pavarur, “si organ me autoritet shkencor për shqyrtimin e të gjitha çështjeve që lidhen me përdorimin dhe zhvillimin e shqipes standarde”. Është themeluar më 27 tetor 2004 dhe ka nisur të veprojë efektivisht në vitin 2005.
