Kryetari i Aleancës Kosova e Re, Behgjet Pacolli, në një intervistë për emisionin “Argument Plus” në RTV 21, ka thënë se AKR-së i janë vjedhur votat, prandaj do të kërkojë rinumërim të gjitha kutive të votimeve. Thotë se AKR-së i duhen edhe 2000 vota për ta kaluar pragun zgjedhor.
Pacolli ka thënë se në Mitrovicë ka pasur më së shumti vjedhje të votave.
“Në Mitrovicë ka pasur stërvjedhje të votave… AKR do të kërkojë rinumërimin e të gjitha votave”, ka thënë Pacolli.
“Çdo kuti, ku hapen e ku është miratuar rinumërimi, ne gjejmë nga 30-40 vota dhe është e pamundur që në çdo kuti ku hapet, ne të mos gjejmë vota të AKR-së”, tha ai.
Lideri i AKR-së ka thënë se partisë së tij i duhen edhe 2 mijë vota që ta kaloj pragun.
Pacolli po ashtu ka thënë se ata janë kryelartë edhe pse nuk e kanë kaluar pragun, pasi që, siç thotë ai, AKR ka bërë reforma që i duhen shtetit të Kosovës.
“Ne kemi qenë pjesë e kësaj qeverisje dhe dalim nga kjo qeverisje me një bagazh të madh. AKR-ja ka pas shumë suksese dhe ka promovu shumë ide. Këto janë reforma që i nevojiten Kosovës dhe do të ishte shumë mëkat nëse këto reforma nuk do të kishin shkuar përpara”, ka thënë Pacolli gjatë emisionit.
E nëse pas certifikimit të rezultateve, AKR kalon pragun, Pacolli ka thënë se nuk e dinë se kujt do t’i bashkohet, apo do të qeverisë vet.
“Ne nuk kemi kërkesa dhe konsiderojmë që çdo nguti është e dëmshme. Po ashtu nuk kemi vija të kuqe për asnjërën parti. Ne duhet ti presim rezultatet dhe certifikimin, dhe kur t’i kemi rezultatet do të vendosim me kë, apo edhe vet”, ka thënë Pacolli
