Sipas saj në Kushtetutë duhet të përkufizohet qartë njëherë e përgjithmonë, përdorimi zyrtar i gjuhës shqipe, përdorimi i simboleve dhe ndarja proporcionale e buxhetit
Diskutimi I ndryshimeve kushtetuese është kthyer në një debat mes përfaqësuesve të Partisë Demokratike Shqiptare (PDSH) dhe deputetëve të maxhorancës qeveritare në komisionin parlamentar.
Anashkalimi i çështjeve me prioritet për shqiptarët dhe mospërfshirja e tyre në ndryshimet e propozuara kushtetuese janë cilësuar të papranueshme nga PDSH. Sipas saj në Kushtetutë duhet të përkufizohet qartë njëherë e përgjithmonë, përdorimi zyrtar i gjuhës shqipe, përdorimi i simboleve dhe ndarja proporcionale e buxhetit, transmeton Alsat-M.
“Edhe këtë herë prioritetet shqiptare që kanë të bëjnë me përdorimin zyrtar të gjuhës, flamurit, ndarja e drejtë dhe proporcionale e buxhetit nuk bëjnë pjesë në ndryshimet që propozohen nga ana e qeverisë ku bën pjesë edhe BDI-ja… Cilat nga këto ndryshime të cilat sot propozohen janë burimore të BDI-së? Cilat nga këta janë kërkesa të shqiptarëve? Cilat nga këta ndryshime që sot propozohen janë apo burojnë nga legjitimiteti i shqiptarëve në të cilin thirren këta njerëz që sot i përfaqësojnë shqiptarët në qeveri? Pra ku është interesi shqiptarë në këto ndryshime kushtetuese”, tha deputeti I PDSH-së, Imer Aliu.
Nga ana tjetër, deputetët e Bashkimit Demokratik për Integrim (BDI) thanë se asnjëherë nuk do të heqin dorë nga këto kërkesa, ndërsa ata të VMRO-DPMNE u shprehën se ndryshimet në fjalë janë në të mirë të të gjithë qytetarëve.
“Ndryshimet të cilat propozohen janë ndryshime kushtetuese që kanë të bëjnë me të gjithë qytetarët e Republikës së Maqedonisë, nuk janë ndryshime që i takojnë vetëm një bashkësie etnike dhe për këtë punë kemi marrëveshje me partnerët e koalicionit që duhet të plotësohen ato standarde që kërkohen prej BE-së. Ju zotëri të PDSH-së kështu siç i keni fjalët t’i keni edhe veprat pas vete,me siguri se do të ishte më mirë edhe për ju, edhe për shqiptarët”, tha deputeti i BDI-së, Rafiz Haliti.
“Ndryshimet kushtetuese që propozohen nga qeveria janë të përgjithshme me një rëndësi të madhe për të gjithë qytetarët, pa dallim të përkatësisë etnike apo fetare. .. Unë e kuptoj se ka çështje thelbësore të cilat partia e juaj, partia jonë, BDI-ja, LSDM-ja dhe të gjitha partitë e bashkësive të tjera më të vogla etnike dëshirojnë t’i shtrojnë për debat, por duhet të pranojmë se duhet ta mënjanojmë parimin e kushtëzimit të një çështje me një çështje tjetër”, u shpreh deputeti Dimovski, nga VMRO-DPMNE.
Ministri i Drejtësisë Adnan Jashari, në arsyetimin e tij rreth ndryshimeve kushtetuese, duke u fokusuar në ato në fushën e gjyqësorit, tha se janë në kuadër të harmonizimit me legjislaturën e BE-së.
“Një periudhë më të gjatë kohore reformat në gjyqësorin kanë qenë prioritet i qeverisë së RM-së dhe ato janë në fokusin e interesit të publikut profesional, shkencor por edhe atij më të gjerë. Në këtë sferë aktivitetet janë orientuar nga zbatimi i ligjeve të miratuara, qëllimi i të cilëve është përforcimi i pavarësisë dhe rritjes së efikasitete të gjyqësorit”, tha Jashari.
