Nga Edison Ypi
Ka një numër frikshëm të madh dhe në rritje të rinjsh që hanë, pijnë, vishen, mbathen, flenë, lahen, krihen, krekosen, por nuk duan, nuk dinë, dhe nuk bëjnë asnjë punë edhe po tua shtypësh kokën. Nuk lexojnë asnjë libër edhe sikur tua çash kafkën me kazëm. Në univesitet shkojnë vetëm për gallatë dhe për asgjë tjetër edhe po tua shkulësh gurrmazin. Rrinë gjithë ditën në kafene prejnga nuk i shkul dot asnjë vinç. Nuk kanë asnjë interesim për asnjë profesion edhe të gjitha kushtet po tua plotësosh. Femrat i kanë qef, por nuk u afrohen butë, bukur, si njerëz, por në mënyrë instinktive, si shtazë. Flasin sikur hungërrijnë me çerek fjalësh, gjysma frazash, zero kuptime, në një gjuhë që duket si gjuha e derrit dhe çakallit vetëm Shqip jo. Mbrëmjeve thithin hashish duke u llafosur rrëmujshëm për pare të mëdha, dallavere dhe hajdutllëqe, si mund të fitohen mliona të kollajta pa luajtur vendit, vetëm me dredhira, për shembull duke krijuar shoqata dhe organizata fantazma për të marrë grante të majme nga miku, miku i mikut, miku i mikut të mikut, ministri, deputeti, për të blerë me ato pare të vjedhura makina të shtrenjta dhe për të ndërtuar vila, për tu shoqëruar me femra të bukura në hotele dhe plazhe të shtrenjta. Mbajnë me vete kobure, dhe nëpër vende të caktuara fshehin kalashnikova. Ëndërrojnë për tu lidhur, dhe lidhen, me rrjetet e trafikut të drogës, vrasin për hiçgjë njëri-tjetrin nëpër lokale nate duke ja ulur çmimin e jetës së shqiptarit sa gëzhoja që mbetet në dysheme brenda pellgut të gjakut, e të tjera e të tjera. Tabloja përditë e më e errët me të rinj parazitë që pretendojnë gjithçka pa bërë asgjë, është rrënqethëse. Pyeta një baba, -Si ka mundësi që djali yt e kalon gjithë kohën nëpër lloto dhe bingo ? Çfarë bën ti si baba, i thashë për të ardhmen e djalit tënd ?! -Nuk kam çfarë të bëj për të ardhmen e djalit tim kur djali i tij nuk bën asgjë për të tashmen e vet. I kam thënë me mijëra herë që të mësojë ndonjë zanat, por s’më dëgjon. Tani e kam lënë në fat të vet. S’më bën më asnjë përshtypje, dhe nuk do ndjej aspak keqardhje nëse ndonjë ditë do ta vrasi ndonjë shoku i tij të cilit mund t’i ketë marrë borxh që nuk ja kthen dot. -Domethënë ti po pret që djalin tënd ta vrasi shoku i vet. -Po. Përgjigja tmerruese ma shtoi kureshtjen. I bëra të njëjtën pyetje një babai tjetër djali i të cilit, në shkollë shkon, por gjithë kohën tjetër e vret në Fejsbuk. Edhe ky baba më dha të njëjtën përgjigje. Nuk më intereson më djali, tha. S’ka ç’më duhet një parazit pa asnjë të ardhme që do më duhet ta mbaj mbi shpinë derisa të vdes. E kam lënë të ma vrasi dalngadalë Fejsbuku duke ja thithur trurin. Një nënë më tha se jo vetëm djalin, por edhe vajzën e rritur, të cilët të dy e shkojnë kohën në kafene, po priste t’i vriste kafeneja. Katër baballarë të tjerë rradhasi më thanë për djemtë e tyre, Hiç s’kam ç’i bëj hajdutit, po e lë të ma vrasi policia. Inshallah ma vret Zoti rrugaçin, të shpëtoj prej atij edepsizi që ma nxiu jetën. Nuk kam zemër t’ja fus vet thonjtë në fyt. Po e lë t’ma mbysi droga. Jam i qetë, bëra gjithçka ta largoj nga bixhozi por pa sukses. E kam lënë ta vrasi shoqëria. Ndodhet në mëhallën time një goxha market. Pronar i atij marketi është Musai. Marketi i Musait punon si sahati i hoxhës. Hapet dhe mbyllet në orare precize, asnjë problem, asnjë ngatërresë, heshtje, qetësi, rregull, mirsjellje, pastërti. Musai ka tre djem. Marshalla të tre. Njëri më i fuqishëm e më i shëndetshëm se tjetri. Tre djemtë e Musait merren me furnizime, bëjnë hesapet, ruajnë rendin, qetësinë, pastërtinë. Ata sot janë nga 25 në 30 vjeç. Në pak vite, u martuan njëri pas tjetrit të tre. Vijnë e ikin partitë, ndërrohen pushtetet, Musai, marketi i Musait, biznesi i Musait, djemtë e Musait, për bukuri. Musai me gruan e vet, dhe djemtë e Musait me familjet e tyre, me makinat e tyre, bashkë me nuset dhe fëmijët e vegjël, pas punëve në market dalin shetitje, pijnë kafe. Meqënse me Musain i kam dy pare muhabet, e pyeta një ditë, -O Musa, të lutem më thuaj, cili është sekreti, që biznesi yt, marketi yt, familja jote, shkojnë të gjitha vaj, nuk keni asnjë problem. Të rinjtë e sotëm rrinë gjithë kohën nëpër kafenera, nëpër bingo, thithin hashish, s’bëjnë asnjë punë. Si e ke zgjidhur ti këtë problem me djemtë e tu që janë aq puntorë, aq të displinuar, aq familjarë ? Çfarë magjie u ke bërë ti djemve të tu që s’bëjnë gëk por vetëm zbatojnë përpikmërisht urdhërat e tua ? Si ka mundësi që djemtë e tu nuk lozin lloto, nuk venë në disko, nuk bëjnë sherr, nuk i arreston policia, nuk i budallalleps hashishi, nuk i vret shoku, nuk ja thith trurin Fejsbuku ? Të lutem mos më le me vdek pa ma tregu këtë sekret. -I kam zgjidhur me kohë këto probleme, tha Musai. Mes meje dhe djemve të m’i ska policira, fejsbuka, droga, e më the e të thashë. Ua kam bërë të qartë se i pari që do ma bëjë fjalën dysh, do ta vras me dorën time. Nëse, pasi ta vras të parin, njëri prej të dyve që do mbeten gjallë ende nuk do ketë zënë ment, do ta vras edhe atë pa mu dridhur dora. Po kështu do veproj edhe me të tretin. Skanë ç’më duhen as mua as vetes nëse s’më binden. Edhe kopeja e deleve e ka një dash me brirë që i prin. Dashi i familjes time jam unë. Deshët e familjeve të tyre janë djemtë e m’i. -Domethënë ti Musa nuk pret që djemtë e tu t’i vrasi shoqëria, fejsbuku, policia, droga, kafeneja, por i vret vet ? -Po. Pa më lëvizur qerpiku. Këtë e di unë më mirë se e ka ditur babai im. E dinë djemtë e mi më mirë se unë. Do ta dinë më mirë se djemtë e m’i, djemtë e djemve të m’i. -Musa, Të lutem mos u tut. Vazhdo vriti vetë djemtë e tu. Është mënyra më e mirë që ti dhe djemtë e tu, Shqipëria dhe shqiptaria, të jetojnë në jetë të jetëve pa i gjetur kurrë asnjë bela’. – See more at: http://www.noa.al/artikull/musai-i-vret-vete/450896.html#sthash.VDzzZUPi.dpuf
