Zëvendësambasadori amerikan në Tiranë, David Muniz, tha sot se është shumë vonë për ndryshime thelbësore në pjesët kryesore të reformës në drejtësi.
“Ne jemi tashmë në një fazë kritike të reformës në drejtësi. Komisioni i Venecias e ka dhënë mendimin e tij dhe komisioni i posaçëm parlamentar është duke shqyrtuar projekt-ligjet përkatëse. Kjo reformë është kritike dhe për projektin e tanishëm kanë punuar shumë ekspertë për shumë muaj. Ka ardhur tashmë koha që parlamenti ta miratojë reformën pa vonesë. Ndërsa ka negociata që duhen zhvilluar para se të hartohet varianti përfundimtar dhe të paraqitet për votim, tashmë është shumë vonë për ndryshime thelbësore të pjesëve kryesore të reformës”, deklaroi zëvendësambasadori amerikan.
Ai shtoi se në këtë çështje duhet të bëhet përparim dhe ajo të përmbyllet, pasi “nuk ka më kohë për vonesa dhe argumente pa fund”. Deklaratat e përfaqësuesit të ambasadës amerikane, në një takim për ndikimin e Reformës në Drejtësi për investimet e huaja, u bënë pak përpara se Komisioni i posaçëm për Reformën në Drejtësi të niste mbledhjen pasdite, e cila është e fundit për fazën e shqyrtimit nen për nen.
Javën e shkuar opozita paraqiti një projekt të zgjeruar me propozime që sipas saj i japin zgjidhje çështjeve që kërkojnë një vendimmarrje politike, ndërsa sugjeron dhe ndryshime në arkitekturën e sistemit të ri të propozuar, me shkurtimin e disa prej institucioneve të reja të parashikuara në variantin e përpunuar nga ekspertët e misionit amerikan OPDAT dhe tij europian EURALIUS.
Për të vënë theksin te rëndësia e kësaj reforme për të ardhmen e investimeve të huaja, zëvendësambasadori amerikan tregoi se vetëm vitin e kaluar ambasada kishte folur me shumë kompani, një prej të cilave kërkonte të investonte 250 milionë dollarë.
”Por këto kompani kanë zgjedhur të investojnë gjetkë për shkak të frikës se nuk do të mund të kishin gjykim të paanshëm në gjykatat shqiptare”, u shpreh zoti Muniz./Zëri i Amerikës/
