Kryetari i Lëvizjes Vetëvendosje, Albin Kurti në një bashkëbisedim virtual me redaktorët e revistës politike të Oksfordit ka folur lidhur me bashkimin me Shqipërinë.
Kurti është shprehur se Kosova duhet ta ketë të drejtën e referendumit, por ka theksuar se Kosova nuk do të shkaktojë një luftë të tretë ballkanike në mënyrë që të ndodh bashkimi me Shqipërinë.
“Kushtetuta e Kosovës thotë që Kosova nuk mund të bashkohet me ndonjë shtet tjetër. Serbët, boshnjakët e të tjerë janë qytetarë të Kosovës, por kur Serbia dëshiron të ndërhyjë në punët e brendshme të Kosovës, atëherë Kosova është shtet i dobët për t’u konfrontuar me hegjemoninë e Serbisë. Serbia dëshiron që të krijojë Serbinë e Madhe pasi që Beogradi u bën presion serbëve nëpër shtete të Ballkanit të mos integrohen. Ne duam të kemi të drejtën e referendumit, ne nuk duam të shohim ndonjë formë të dhunës për tu bashkuar. Kosova duhet ta ketë të drejtën për referendum jo domosdo që të bashkohemi me Shqipërinë por të kemi të drejtën e referendumit. Nëse bëhet në formë paqësore dhe demokratike atëherë po bashkim me Shqipërinë dhe do ta respektojmë rezultatin por në asnjë mënyrë ne nuk do të nisim një luftë të tretë ballkanike në mënyrë që bashkohemi me Shqipërinë”, ka thënë Kurti, citon Express.
Ai ka folur edhe për shkarkimin e Agim Veliut dhe për përpjekjet e ish-presidentit Hashim Thaçi për shpalljne e gjendjes së jashtëzakonshme për shkak të pandemisë së koronavirusit.
“Në mars 2020, ne filluam me një mbyllje por ish-presidenti dëshironte të shpallte gjendje emergjente dhe ai dëshironte që të merrte kompetencat e drejtimit të shtetit në dorën e tij. Ai dëshironte fuqi për ta shndërruar Kosovën nga Republikë Parlamentare në Republikë Presidenciale. Ai mendonte se është mbret. Imagjinoni sikur Mbretëresha Elizabeta t’i bënte thirrje policisë në Britani që të mos u bindet urdhërave të kryeministrit Johnson”, ka thënë Kurti.
Kandidati i Lëvizjes Vetëvendoshe për kryeministër të Kosovës ka thënë se nuk është i gatshëm që të hyjë në dialog për të kompenzuar Serbinë për humbjen e Kosovës.
“Unë mendoj se ne duhet të jemi të sinqertë për të pasur një marrëveshje të qëndrueshme. Ne duhet të bëjmë kërkesa ndaj njëra-tjetrës. Serbia ka disa kërkesa për Kosovën edhe ne gjithashtu dhe t’i vendosim në tavolinë kërkesat tona për të pasur një dialog të drejtë. Ne duhet t’i rishikojmë 33 marrëveshjet paraprake me Serbinë, pra marrëveshjet që nuk zbatohen. Duhet ta mbyllim atë kapitull në mënyrë që të vazhdojmë përpara. Unë jam gati për të dëgjuar nevojat dhe kërkesat për serbët e Kosovës. Ata janë bashkëqytetarë të mi, por, më duhet të them, që nuk jam gati për të hyrë në një projekt ku ne duhet të kompenzojmë Serbinë për humbjet që i ka shkaktuar në Kosovë. Lotët në fytyrën e Vuçiqit nuk janë lot të serbëvë të zakonshëm, por lotë të Serbisë si shtet që e ka humbur Kosovën. Negociatat në dialog janë diçka që njerëzit duhet të jenë përfitues, dhe jo politikanët. Ne duhet të ndihmojmë njerëzit”, ka thënë Kurti, citon Excpress.
(r.m.)
