Deputeti shqiptar në Parlamentin e Serbisë, Shaip Kamberi, ka tërhequr vërejtjen se Serbia po punon për nddryshimin e structures etnike të Luginës së Preshevës. Ai ka thënë se Beogradi po e bënë këtë përmes pasivizimi të adresave të shqiptarëve në Preshevë, Medvegjë dhe Bujanoc.
Në një bisedë për Radion Evropa e Lirë, Kamberi e ka mirëpritur reagimin e kryediplomatëve të Kosovës dhe të Shqipërisë, të cilët kërkuan që Serbia të ndalë fshirjen e qëllimshme të adresave të shqiptarëve në Luginë të Preshevës.
“Po, ky është një proces që ka filluar para disa vjetësh. Më intensivisht është duke u zbatuar në Medvegjë në shqiptarët që në 99-tën janë larguar dhunshëm nga Medvegja dhe jetojnë në Kosovë, nuk e kanë të rregulluar statusin civil në Kosovë, që do të thotë se akoma janë shtetas edhe me vendbanim në Medvegjë. Por, në kuadër të ligjit për caktimin e vendbanimit po shfrytëzohet një dispozitë e cila thotë se nëse qytetari nuk është duke banuar në vendbanimin që e ka paraqitur, atëherë ai vendbanim pasivizohet. Këtu është fjala për pasivizimin e vendbanimeve”, ka thënë Kamberi.
Ai ka shtuar se qytetarëve të cilët iu pasivizohen adresat, mund të kërkojnë të regjistrojnë një vendbanim të ri.
Kamberi ka thënë se nuk ka informacione të sakta se cili është numri i qytetarëve të cilëve u janë fshirë adresat në Medvegjë, por një numër të përafërt e ka nxjerrë nga regjistri zgjedhor.
“Sipas informacioneve që i kemi tani, së paku te regjistrat zgjedhorë, sepse me humbjen e vendbanimeve qytetari humb edhe të drejtën e votes, janë diku 1.200 persona që janë fshirë në Medvegjë, pra të moshës madhore, mbi 18 vjeç”, ka thënë ai.
“Shqiptarët, deri më 2018, sipas regjistrit zgjedhor, i kanë pasur 8 këshilltarë në Kuvendin komunal të Medvegjës. Me pasivizimin e adresave ata kanë rënë në 3. Kjo nënkupton një ndryshim drastik të strukturës etnike të komunës”, ka theksuar Kamberi.
Ministrja e Punëve të Jashtme dhe Diasporës e Kosovës, Meliza Haradinaj-Stublla, dhe ministri në detyrë i Punëve të Jashtme të Shqipërisë, Gent Cakaj, përmes një deklarate të përbashkët, kanë thënë se ky fshirja e adresave përbën formë të re të presionit ndaj shqiptarëve të Luginës së Preshevës.
“U bëjmë thirrje autoriteteve të Serbisë ta ndërpresin menjëherë punën sistematike për pasivizimin e adresave të shqiptarëve. Kjo praktikë shtetërore nuk I dëmton vetëm të drejtat e shqiptarëve në Luginën e Preshevës, por është edhe një shpërfillje e plotë të standardeve demokratike në përgjithësi”, thuhet në deklaratën e përbashkët të shefave të diplomacive të Kosovës dhe të Shqipërisë.
Deputeti Kamberi ka thënë se Medvegja është më e prekura nga pasivizimi i vendbanimeve, por kjo formë e presionit ndaj shqiptarëve po aplikohet edhe në dy komunat tjera të banuara me shumicë shqiptarë, në Preshevë dhe në Bujanoc.
Kamberi ka shprehur edhe shqetësimin që shqiptarët nga Lugina e Preshevës që janë vendosur në Kosovë prej vitit 1999 nuk e kanë ende të rregulluar statusin as në Kosovë.
“Në Kosovë, shumica prej tyre nuk e kanë të rregulluar gjendjen civile, kështu që mbeten persona, atë që terminologjia juridike në Serbi i quan ‘persona juridikisht të padukshëm’”, ka thënë ai.
Në Serbi nuk ka numër të saktë të shqiptarëve, pasi ata e kishin bojkotuar cenzusin e vitit 2011 në Serbi.
