Nga Hysni Gurra
Ngjarjet e ditëve të fundit kanë tronditur shumëkënd për atë se çfarë ndodh në politikën shqiptare. Por ato që shënjuan këto ditë të trazuara në vendin tonë, mendoj se ishin qëndrimet e Ambasadës së Shteteve të Bashkuara në Tiranë, kjo ishte ngjarja më e rëndësishme sipas meje dhe më shpresëdhënësja.
Deklarata e menjëhershme e bërë nga ambasada pas përjashtimit të deputetit Doshi dha një sinjal të fortë për politikën, median, prokurorinë dhe gjyqësorin shqiptar, të cilët tremben vetëm nga një zë i jashtëm, kurrë nga zëri i brendshëm sado i mbytur qoftë ai, zëri i populli.
Qëndrimi i dytë ndodhi një javë më pas, kur edhe një herë, SHBA anuloi një takim të rëndësishëm të Grupit të Miqësisë shqiptaro-amerikane, shkaku ishte se grupi ynë parlamentar kishte në përbërjen e tij njerëz të inkriminuar.
Nisur nga këto dy qëndrime është hapur një diskutim i gjerë në opinionin publik lidhur me dekriminalizimin e Parlamentit dhe që shpesh, për habi, përdoret në zhargonin e përditshëm mediatik të personaliteteve të rëndësishme edhe ideja se deputetët tanë janë të inkriminuar sepse nuk dinë të shkruajnë e të lexojnë, më habit ky qëndrim, dhe jam totalisht kundër për disa arsye.
E para, këtë vend e kanë kriminalizuar njerëz të mirëshkolluar dhe në nivel shumë të mirë intelektual. Janë ata porta kryesore nga e cila kalon një deputet, pa shkollë, kur hyn në listën e kandidaturave për deputet apo kryetar bashkie, janë ata dera për nga e cila kalojnë trafiqet e shumta, blerja e votës, presioni mbi popullsinë, shantazhi etj.
Deputet “budallenj” janë njerëzit më kollaj të menaxhueshëm nga shefat e tyre në këtë vend, po të ishte e kundërta, Parlamenti shqiptar nuk do të ishte mbushur me analfabetët e inkriminuar, administrata e lartë shtetërore nuk do të ishte e mbushur me njerëz totalisht injorantë për të qenë në shërbim të popullit dhe në zbatim të ligjit. Nuk janë të pamenaxhueshëm ata, ata janë njerëzit më të bindur që ekzistojnë, prandaj edhe janë aty në parlament, në administratë e në të gjitha hallkat kyçe të shtetit. Ata nuk njohin ligj, ata njohin vetëm shefin, dhe nëse Parlamenti apo administrata e lartë shtetërore ka një imazh të keq, përgjegjës për këtë janë udhëheqësit e politikës dhe jo vartësit e tyre. Sot nuk mund të bëhesh deputet, kryetar bashkie, apo drejtues në aparatin shtetëror falë kapacitetit intelektual dhe përgatitjes profesionale, por bëhesh vetëm nëse je i pasur dhe e blen vendin në listë, je i fortë dhe e merr me dhunë, ose je i kompromentuar dhe i shantazhueshëm. Kështu është krijuar një efekt zinxhir, ku sunduesit dhe vartësit e çdo niveli karakterizohen nga një fenomen i tillë, blerje dhe shitje postesh. Pra, peshku është qelbur nga koka…Në fund është populli ai që u nënshtrohet të gjithëve duke mbajtur në kurriz peshën e rëndë të gabimeve të politikës shqiptare.
Meqë Ambasada e SHBA-së u përfshi në këtë histori, dhe shumë mirë bëri, mendoj se ka ardhur koha që ne si popull t’i lutemi të na ndihmojë në këtë rast, le ta lënë mënjanë gjuhën e ngurtë diplomatike për mosndërhyrje në punët tona të brendshme, jo, jo le të ndërhyjë, ne e duam këtë gjë, e duam dhe e pranojmë sepse është në të mirën e vendit tonë, madje unë do të shkoja më tej duke thënë se na e ka “borxh” ambasada një ndërhyrje të tillë, për të gjithë dashurinë e pakushtëzuar që ne si popull kemi për popullin amerikan, dhe ambasada e di shumë mirë, ashtu siç edhe ne e kemi kuptuar tashmë, se çdo ndërhyrje është një shpresë, është një dritë jeshile shumë e madhe për ne si popull i shumëvuajtur dhe i sfilitur nga banda të mafies politike që na kanë qeverisur këto vite tranzicion.
Miku i SHBA-së në Shqipëri është vetëm populli shqiptar, në këtë pikë, miku kërkon nga miku më i madh të mos mbaj sekrete, por t’i tregojë gjithçka për këta politikanë. Hapini arkivin, jepjani medias, në mos medias, nxirrini në faqet tuaja zyrtare në rrjetet sociale, t’i shohë populli dhe të vendosë vetë ç’duhet bërë, mjaft më me stabilitetin që kërkohet nga Shqipëria, është më keq kështu, nuk është stabilitet ky që kemi tani, thjesht po gënjejmë veten ne dhe ju, sepse mafia nuk di të ndalet, korrupsioni nuk di të ndalet, injoranca është një minë me sahat për këtë dreq stabiliteti që kërkojmë ne, jo nuk është stabilitet ky. Shqipëria, populli dhe politika shqiptare kanë nevojë imediate për një katarsis të thellë, nuk mund të vazhdohet më kështu.
SHBA-së populli shqiptar i është shumë…mirënjohës për ndërhyrjen në punët e tij të brendshme në fillim të viteve ’90, kur shporrëm nga drejtimi i vendit një sistem famëkeq, do t’ju jemi shumë mirënjohës sot dhe kemi shumë nevojë që të na “ndërhyni në punët e brendshme”, të pastrohemi nga këto mbeturina politike që po na mbajnë peng të ardhmen tonë, zhvillimin e vendit, lirinë dhe të drejtat, për ta jetuar ashtu si populli amerikan edhe ne lirinë e demokracinë.
