Lëvizja e Vangjel Dules, por edhe e aleateve te tjerë te Lulzim Bashes në drejtim të largimit nga grupi demokrat është diçka e parashikuar në marrëveshjet individuale që këto parti bënë me liderin demokrat, pas daljes nga çadra dhe hartimit të listave.
Këtë e ka treguar vete kreu i PBDNJ ne emisionin “7 pa 5” në Vizion Plus, ku edhe ritheksoi se kjo nuk ndryshon asgjë në qëndrimin e tij në opozitë.
Vangjel Dule nuk ka lënë pa sulmuar kryeministrin Edi Rama në çështjen e integrimit të Shqipërisë, që duket se do të jetë edhe kryefjala e tij në këto 4 vite.
Sipas kreut të “Bashkimit për të Drejtat e Njeriut”, integrimi nis pikërisht nga zbatimi i këtyre te drejtave nga qeveria, duke marrë si shembull vendimet e pazbatuara të gjykatave ne raport me banoret e minoritetit në Himare.
Ndërkohë Rama është sulmuar edhe nga zyrtarët grekë.
Ministri grek i Mbrojtjes, Panos Kammenos, ka komentuar deklaratat e fundit të kryeministrit shqiptar Edi Rama për marrëdhëniet dypalëshe.
Kammenos i ka cilësuar si provokuese jo vetëm deklaratat e shefit të qeverisë, por edhe, siç ka thënë “disa lëvizje që bëhen rreth minoritetit grek në Shqipëri”.
“Është e vërtetë se në nivel deklaratash verbale zoti Rama është provokues. Dhe paralelisht, edhe disa lëvizje që bëhen rreth minoritetit. Mirëpo konsideroj se Rama ka përballë shumicën e popullit shqiptar, edhe njerëz që kanë qenë emigrantë në Greqi, njerëz që kanë lidhje me Greqinë, njerëz që kërkojnë nënshtetësinë greke. Dhe konsideroj se do ta marrë përgjigjen nga populli shqiptar për këtë sjellje ekstremiste ndaj vendit tonë”.
Kammenos tha se deklaratat që konsiderohen si provokuese në Athinë, mund të ndikojnë në izolimin e Shqipërisë dhe se ato nuk kanë asnjë lidhje me deklaratat që qeveritarët shqiptarë bëjnë në forumet ndërkombëtare.
