Deputeti i PD-së, Sali Berisha thotë se “Policia e Shtetit po ushtron terror ndaj banorëve të Lazaratit”. Kurse, deputeti i PS-së, Taulant Balla vëren se “Sali Berisha po keqpërdor “Facebook” për të marrë në mbrojtje kriminelët”
Deputetët Sali Berisha dhe Taulant Balla mbetën në llogore krejt të kundërta, ndonëse për detaje të ndryshme, në komentimin e operacionit policor për shkatërrimin e të mbjellave me bimë narkotike në Lazarat të Gjirokastrës.
Ish-kryeministri Berisha dhe zoti Balla zgjodhën profilet e tyre në rrjetin shoqëror “fejsbuk” për të komentuar mbi sjelljen policore ndaj atyre që i quajnë “qytetarët” dhe “kriminelë”.
Zoti Berisha i Partisë Demokratike opozitare shkruajti se “Policia e Shtetit po ushtron terror ndaj banorëve të Lazaratit”:
“Policia në kundërshtim flagrant me ligjet dhe rregullat në kontrollin e banesave, përmbys dhe thyen orendi, mobilje, hap dhe mure, nxjerr forcërisht jashtë banorët, fëmijët, gratë, të sëmurët nga shtëpitë e tyre dhe nuk i lejon edhe pas kontrollit të kthehen aty”.
Por, ai akuzoi Sipas tij, policinë gjithashtu për ndihmesë të kalimit të trafikantëve që i nënkupton të lidhur me pushtetin.
Zoti Berisha përfshin edhe dy media televizive që i quan të kontrolluara prej kryeministrit Edi Rama në përcjelljen e zhvillimeve në Lazarat:
“Policia, me urdhër të Ramës, lejon vetëm dy televizionet e kontrolluara prej tije (Top Channel dhe A1 Report) që të ndjekin operacionet e saj. Ndërkohë bëhet e ditur se gjatë natës ajo ka hapur shtegun për largim të grupeve kriminale me të rrezikshme dhe bosëve kryesor të trafikut, të cilët nuk i futi në listën e 26 personave të kërkuar, duke dëshmuar lidhjen e këtyre grupeve me qeverinë”
Sipas deputetit demokrat, në pjesën më të madhe të komunës Lazarat është ndërprerë energjia dhe interneti.
“Dënoj dhunën, terrorin ndaj popullsisë civile dhe i bëj thirrje Prokurorisë se shtetit të nisi menjëherë hetimin për dhunën, terrorin, keqtrajtimet e qytetarëvë te Lazaratit, abuzimin masiv me të drejtat e njeriut të policisë në Lazarat dhe të verë para përgjegjësisë ligjore autoret e këtyre abuzimeve si dhe të urdhërojë policinë të lejoje mediat e pavarura për të ndjekur operacionin”.
Në të njejtin mesazh zoti Berisha u bën thirrje banorëve të Lazaratit që “të dokumentojnë çdo rast të dhunimit të të drejtave, lirive dhe pronave të tyre si nga kriminelët ashtu dhe nga policia” për të vënë siç vijon “përpara përgjegjësisë ligjore autorët e tyre të papërgjegjshëm”.
“Stop terrorit ndaj popullsisë civile të Lazaratit!”-shkruan ai duke shenjuar shkronjat nistore “S.B.”.
Kurse, deputeti i Partisë Socialiste qeverisëse Taulant Balla shkruan se “Sali Berisha po keqpërdor “Facebook” për të marrë në mbrojtje kriminelët”:
“Sigurisht nuk përbën lajm interesant fakti që disa prej atyre që qëlluan mbi Policinë e Shtetit, jo rastësisht kanë në telefonat e tyre të regjistruar numrin personal të Sali Berishës”.
Zoti Balla vëren ndërkaq, se “në faqen “Facebook” të Sali Berishës përjashtohet çdo postim që flet pozitivisht për punonjësit e policisë”:
“Reklamoni sa me shume raste kur ju behët ban çdo postimi që mbron veprimet e Policisë. Sa turp për një njeri që deri vjet ishte Kryeministri i Shqipërisë”!
