Kreu i PD: “Të gjithë bashkë në mbrojtje të familjes, punës, shkollës dhe shëndetit. Kundër rritjes së taksave dhe çmimit të energjisë. Kundër papunësisë dhe varfërisë”. Reagon Rama: “Do të ndërtosh pa leje? Do të vjedhësh drita sa të duash? Do diplomë pa shkuar në shkollë? Po Lazarat e rrena pa hesap do? Protesto…”
Pas pjesëmarrjes në punimet e Asamblesë Parlamentare të Partive Popullore Evropiane, Kryetari i PD-së, Lulzim Basha deklaroi në një prononcim për mediat se gjatë takimeve ai kishte marrë përkrahje për aksionin opozitar nga partitë simotra. Basha tha se opozita është një lëvizje dypalëshe. “…Në takime me qytetarët për të dëgjuar drejtpërdrejtë problemet e tyre dhe për t’i kthyer ato në veprim opozitar, në takime me faktorin ndërkombëtar, në veçanti me institucionet evropiane, për të shprehur gjendjen aktuale të vendit, shqetësimet tona për demokracinë, për gjendjen ekonomike dhe shoqërore dhe për të marrë përkrahjen e Bashkimit Evropian, të institucioneve të Bashkimit Evropian, të partive tona si motra, për veprimin opozitar. Prej më shumë se gjashtë muajsh, qeveria sistematikisht po asgjëson çdo hapësirë institucionale ku opozita dhe shumica të bëjnë debat, të bëjnë transparencë para qytetarëve shqiptarë për çfarë po ndodh në Shqipëri. Kjo është arsyeja pse, opozita shqiptare, Partia Demokratike, unë personalisht, u jemi drejtuar drejtpërdrejtë qytetarëve shqiptarë”, – tha Basha. Sipas tij, problemet dhe shqetësimet e qytetarëve lidhen veçanërisht me situatën e rënduar ekonomike në vend. “Lidhen me rritjen e çmimit të energjisë dhe taksave për vitin e ardhshëm, me dhunën dhe paligjshmërinë qeveritare me pronën dhe jetën e qytetarëve, me instalimin në vend të një shteti policor i cili vepron kundër rregullave të shtetit ligjor, pra të ligjeve dhe Kushtetutës së vendit, të cilat na janë bërë të ditura drejtpërdrejt nga qytetarët shqiptarë me raste konkrete të evidentuara me fakte të pakundërshtueshme. Këto janë edhe shqetësimet që po paraqesim këtu në Bruksel pranë institucioneve europiane, pranë partive simotra, ku po gjejmë jo vetëm interesimin e tyre, jo vetëm shqetësimin e thellë për situatën në Shqipëri, por edhe përkrahjen e plotë për aksionin opozitar”, – tha ai. Basha e sheh problemin tek kjo shumicë që sipas tij nuk dëgjon teksa pyetet për thirrjen e ndërkombëtarëve për dialog politik në Kuvend. “…Arsyeja kryesore se pse vendi është zhytur në këtë situatë ekonomike, në këtë situatë politike, është sepse qeveria shpërfill zërin e qytetarëve, shpërfill zërin e opozitës, shpërfill institucionet dhe mundohet t’i kapë ato t’i vërë nën zotërimin e saj të paligjshëm. Ky është një shqetësim i jashtëzakonshëm për ne. Është një shqetësim i madh edhe për Bashkimin Europian edhe për partnerët tanë dhe për të gjithë bashkëbiseduesit që unë kam takuar dhe vazhdoj të takoj këtu në Bruksel. Bashkë me shqetësimin tonë të thellë për situatën në vend, kemi gjetur dhe mirëkuptimin dhe mbështetjen e partnerëve tanë, të institucioneve evropiane, partive tona si motra, Partisë Popullore Evropiane”, tha ai. Ndërkohë në një postim më herët në faqen e tij në Facebook, Basha shkruante se vetëm katër ditë i ndajnë qytetarët nga protesta e së shtunës. “Të gjithë bashkë në mbrojtje të familjes, punës, shkollës dhe shëndetit. Kundër rritjes së taksave dhe çmimit të energjisë. Kundër papunësisë dhe varfërisë. Kundër dhunës dhe paligjshmërisë qeveritare. Aleanca e mashtrimit, krimit dhe korrupsionit, nuk e gjunjëzon dot shpirtin e lirë të shqiptarit”, – shkruan Basha. Por i menjëhershëm ishte edhe reagimi i kryeministrit Rama. “Do të ndërtosh pa leje? Do të vjedhësh drita sa të duash? Do diplomë pa shkuar në shkollë? Po Lazarat e rrena pa hesap do?Protesto…”, – ironizon Rama.
