Shoqatat e grupeve me aftësi të kufizuar: Jemi të vendosur të protestojmë pa ndërprerë kundër projektligjit problematik dhe mafioz të ministrit Veliajt
Shoqata e Personave me Aftësi të Kufizuar deklaron se do të padisë në gjykatë për shpifje, ministrin e Punës dhe Mirëqënies Sociale, Erjon veliaj. Vendimi i grupeve të këtyre shoqatave, të personave me aftësi të kufizuar, u bë publik nëpërmjet një njoftimi për shtyp ku theksohet se ministri Veliaj ka shpifur në mënyrë të qartë dhe të pastër. Ata pretendojnë se kjo është një mënyrë e ministrit Veliaj për ti bërë presion kësaj kategorie për të mos kundërshtuar ligjin e miratuar nga ministria e tij për personat em aftësi të kufizuara. Shoqatat e personave me aftësi të kufizuara, deklarojnë se janë të vendosur të kundërshtojnë këtë ligj I cili sipas tyre është problematic dhe mafioz. “Grupet e aftësisë së kufizuar janë të vendosur të kundërshtojnë dhe të protestojnë pa ndërprerë kundër projektligjit problematik dhe mafioz të Veliajt. Ai është një projektligj vrastar, sepse nuk i jep asgjë askujt, me një efekt financiar 0 dhe sigurisht kur përfshihesh në një fushë ku nuk ke çfarë të marrësh, diçka do të humbasësh.
Ministri Veliaj nëpërmjet shantazhit dhe kërcënimit po përpiqet t’u mbyllë gojën personave me aftësi të kufizuar. Ministri ka shpifur në mënyrë të qartë dhe të pastër dhe vazhdon të fyejë sistematikisht personat me aftësi të kufizuar. Për këtë arsye, sot (dje) do të dorëzohet një padi në gjykatë mbi shpifjet se gjoja ne paskemi menaxhuar 1.14 milionë dollarë për godinën në Vaqarr. Është e vërtetë si drita e diellit se tenderat, kontratat, supervizorët dhe çdo procedurë tjetër është zhvilluar nga Ministria e Mirëqenies dhe asgjë nga ne”, thuhet në deklaratën e Shoqatës së Personave me Aftësi të Kufizuar.
Sipas tyre, ky investim ka nisur nga shoqata dhe më pas në vitet 2006-2008 ka kontribuar në vazhdimin e ndërtimit edhe ministria duke administruar gjithçka vetë ajo. Kjo godinë, sipas shoqatës së PAK, është rreth 6500 m2 dhe është në proces të përfundimit me investimin e vetë qytetarëve të verbër. Një tjetër padi që pritet të bëhet ndaj ministrit Veliaj po për shpifje, është në lidhje me deklaratën që ai ka bërë për presidentin e shoqatës, Sinan Tafaj për shpërdorim të fondeve. “Veliaj do të paditet edhe për shpifjen tjetër të radhës, pasi presidenti i shoqatës nuk është paguar asnjëherë dhe me asnjë qindarkë nga fonde publike në funksionet e veta drejtuese”, thuhet në deklaratën e Shoqatës së Personave me Aftësi të Kufizuar.
Reagimi i këtyre shoqatave vjen pas deklaratve të ministrit Veliaj se persona të caktuar nga këto shoqata kanë kryer abuzime me fondet për personat me aftësi të kufizuara.
