Kandidati për president është shprehur i çuditur me heshtjen e institucioneve të Kosovës dhe Shqipërisë karshi kandidaturës së tij.
“Më ka ardhur pak çudi heshtja e Kosovës dhe Shqipërisë. Kuptohet, është krejt legjitime që Prishtina dhe Tirana sigurisht kanë kandidat të preferuar presidencial, ndoshta e kanë kandidat të preferuar Stevo Pendarovskin, për shkak të koalicioneve, apo relacioneve miqësore qeveritare, partiake me Shkupin zyrtar. Dhe, e vërtetë është, pos Vetëvendosjes si parti, dhe Albin Kurtit si lider, përkrahje tjetër nuk ka ardhë as nga Republika e Kosovës dhe as nga Republika e Shqipërisë”, thotë kandidati i pavarur precidencial.
Ndryshe, zgjedhjet presidenciale në Maqedoninë e Veriut do të mbahen më 21 prill, ndërsa kandidati i pavarur shqiptar do të përballet në garë me Gordana Siljanovska – Davkova, kandidate e VMRO-DPMNE-së dhe Stevo Pendarovskin e LSDM-së.
***
Blerim Reka ka dy fjalë për Ali Ahmetin i cili po mbështet maqedonasin për president
Kandidati i parë shqiptar për president të Maqedonisë Veriore, Blerim Reka i është përgjigjur deklaratës së kryetarit të BDI-s, Ali Ahmetit, kur ka thënë se: “sikur të mos e kishte propozuar BDI për ambasador në Bruksel, Reka nuk do të ishte këtu ku është sot”.
Reka ka pohuar për Kp se është e vërtetë që në vitin 2005, është propozuar për ambasador nga BDI, porse ka shtuar se atëbotë nuk kishte kandidat më të denjë për atë pozitë.
Kur flet për garën aktuale, Reka kritikon BDI-në që po e mbështet kandidatin maqedonas për president të vendit, në vend se t’i dilte ish të propozuarit të saj të dikurshëm për ambasador në Bruksel.
Reka: BDI që më mbështeti dikur pse tani mbështet maqedonasin për president?
“Në atë kohë shqiptarit i takoi posti i ambasadorit në Bruksel dhe duke pasur parasysh se në vitin 2005, kur janë bërë negociatat për këtë post në BE, unë kam qenë i vetmi profesor i lëndës ‘E drejta e Bashkimit Evropian’, kam qenë autor i 19 librave nga fusha e BE-s, dhe nuk di se cili do të duhej të ishte ambasador në atë kohë, me këtë përgatitje profesionale dhe shkencore, që ka të bëjë me integrimet evropiane. Edhe tash e them, as nuk kam qenë dhe as nuk jam anëtar i BDI-së, dhe krejt në fund, nëse BDI thotë se ka qenë propozim i tyre Blerim Reka, pse BDI-ja nuk doli me propozim Blerim Rekën për president të shtetit, por e përkrah Pendarovskin, i cili nuk është as anëtar i tyre, por është qytetar maqedonas që është anëtar i LSDM-s”, thotë ai.
Ndryshe, BDI publikisht ka dalë në mbështetje të kandidatit maqedonas Stevo Pendarovski nga radhët e LSDM-s
