Petrit Kuçana
Ngjante tejet përbuzës sesa i neveritshëm një njoftim i shpërndarë nga ambasadat shqiptare nëpër botë: “Ju njoftojmë se Samiti i dytë i Diasporës do të mbahet në datën 2 mars 2019. Mbajtja e Samitit të Dytë të Diasporës në mars do të përkojë me përvjetorin e 475-të të Kuvendit të Lezhës, ku Skënderbeu bëri bashkimin e princave shqiptare”.
Kjo “gjetje” ngjan me kapakun e hekurt që përmbyll së paku shumë pikëpyetje, ku më bazikja mbetet se pse u anulua ky samit i njoftuar nga Ministri i Shtetit për Diasporën që do të zhvillohej nga 26-28 Nëntor në Tiranë.
Asnjë përgjigje, asnjë justifikim, nuk vjen nga institucionet shqiptare që paskan gjetur “folkun” si metodë harrimi, anashkalimi, dhe se 2 Marsi na qenka ditë e shenjtë për diasporën, thua se ky vit nuk u shpall viti i Skënderbeut. Por në të vërtete ky njoftim është thjeshtësisht dëshmia e qasjes së qeverisë ndaj diasporës, që siç e pohon Ministri Majko përbën gjysmën e popullsisë.
Krejt koincidencë mbetet edhe shifra se mbi gjysmë milioni shqiptarë kanë marrë leje qëndrimi në vendet e BE-së gjatë 10 viteve të fundit. Kushedi sa provokuese për institucionet do të ishte pyetja vijuese se sa është numri i atyre që janë në të zezë.
Mjafton një lundrim i lehtë në rrjetet sociale për të parë se “Samiti i Diasporës” rezulton i vdekur, (postimi i fundit është bërë vitin e kaluar).
Madje vjet as që i ra kujt në mend që mund të bëhej ndonjë samit, ndërsa pranvera e sivjetme gjallëroi shpresat derisa Ministri Majko njoftoi datat 26-28 Nëntor. Kishte shumë mërgimtarë që prenë biletat, për t’u gjendur atje, pasi siç u tha kësaj radhe do të ishte ndryshe, nuk do të kishte fjalimi politike por do të bëhej me profesionistë.
A u detyrohet ministri një kërkim falje?
Shtet tallava?
Por gjërat nuk shkuan mirë, dhe me sa duket Majko nuk i paska bërë “pazaret pa hanxhinë”, për rrjedhojë erdhi njoftimi se marsi do të sjellë Samitin. Thuajse askush nuk ka shpresë se diçka do të bëhet për diasporën, dhe se përveç albumeve fotografike me ministrin e buzëqeshur, e disa njoftimesh për mbledhje e takime brenda për brenda ministrisë, nuk kemi parë asgjë konkrete. E madje në zhvillimet e ububushme shqiptare duket se diaspora ngjan më pak interes se lajmet astrologjike.Por ka një vërtetë të frikshme.
Politika shqiptare po e përçan diasporën.
Vini re. Qeveria e Shqipërisë e ka caktuar Data 18 dhjetor caktohet si Dita Kombëtare e Diasporës (nuk dihet nga u ka ardhur kjo ide, kur s’besohet që ka ndonjë mërgimtar që mund të gjendet andej, por si shumë gjëra të tjera i bëjnë në kokë të vet) ndërkohë që Kosova e ka në Gusht, kur të gjithë janë me pushime. Dhe ka një PSE që mund t’ua thyejë kokën atyre që me apo pa vetëtijë, e bëjnë këtë gafë që i kalon kufijtë e Turpit. Ndërkohë që Shqipëria ka miratuar gjithnjë në kokë të vet strategjinë e Diasporës, në Kosovë vazhdon konsultimi gjithandej, e madje edhe në shumë qytete të botës. Mjafton të kujtojmë se janë mbase mbi 100 profesionistë që konsultohen dhe japin ekspertizën e tyre në Strategjinë për diasporën në Kosovë.
Por zyrtarët e Tiranës i dinë vetë të gjitha dhe as që duan të “mërzisin” ekspertët e fushave të ndryshme, që jetojnë nëpër botë dhe që përbëjnë pasurinë më të çmuar të çdo kombi…
Ministria e Diasporës e Shqipërisë amë s’po mundet të bëjë as sa një OJQ si “Germin” në Prishtinë.
Krejt naive duken pyetjet vërtet a u konsultuan me diasporën… a u shtrua për diskutim çështja e tyre apo kjo është e tepërt. Duhet theksuar se mërgimtarët e Shqipërisë janë të vetmit në rajon që nuk e kanë të drejtën e votës dhe as që nuk duket asnjë dritëz shprese se do të mund ta ushtrojnë as në zgjedhjet e ardhshme. E mbase gjithçka fillon nga këtu. Jetimët e mëdhenj për të cilët shteti nuk ka asnjë regjistër formal, dhe kjo bëhet akoma më e dhimbshme kur gjeneratë pas gjenerate po lindin nëpër shtetet e huaja dhe nuk po regjistrohen si “shtetas shqiptar”. Por kjo është larg shumë larg pretendimeve që zyrtarucëve të Tiranës që s’po mundin të prodhojnë qoftë edhe një lajm sa për të larë gojën e diasporën. Deri më sot gjysma e popullsisë së Shqipërisë që jeton jashtë dhe që po largohet çdo ditë e më shumë duke zbrazur atë vend, i bie thjesht të jetë diaspora e shtetit tallava.
E ndërsa lexon njoftimin kamuflues për Samitin që do të mbahet në mars, duke e ngjyrosur turpshëm me mbledhjen e princave të Skënderbeut, të vjen ndërmend një shprehje e bukur e një samitisti nga Kosova;
“Këtyre nuk u del diaspora as në shpatull të pulës”. Të paktën Majko këtë e kupton. Sigurisht.
