Kjo ngjarje e përmasave botërore kujtohet çdo 4 Shkurt. Dita Botërore kundër Kancerit është një nismë e Unionit Ndërkombëtar për Kontrollin e Kancerit (UICC) , e mbështetur nga Organizata Botërore e Shëndetësisë. Kjo ditë ka si synim të bashkojë popullatën në luftën kundër kancerit dhe të shmangë në këtë mënyrë miliona vdekje. Kjo mund të bëhet përmes rritjes së vetëdijshmërisë dhe edukimit mbi sëmundjen, duke shtyrë forcat qeveritare dhe individët që të ndërmarrin aksion. Kjo sëmundje e rëndë, e cila mund të shfaqet në pjesë të ndryshme të trupit, është përgjegjëse për miliona vdekje në botë. Në kë datë, Organizata Botërore e Shëndetësisë publikon rekomandimet për mënyrën si mund të parandalohet kjo patologji. Në këtë datë, në raportet e saj të përvitshme, OKB publikon numrin e të sëmurëve, të të vdekurve dhe të atyre që i kanë shpëtuar sëmundjes së rëndë. Në këshillat e saj renditen një stil jete i kujdesshëm dhe kontrolle të herëpashershme.
Kanceri konsiderohet si një sëmundje që gjithmonë e më tepër po sfidon shëndetin e miliona njerëzve në mbarë botën duke u bërë kështu një faktor në barrën globale të sëmundjeve. Nga raportet dhe përllogaritjet e bëra, rezulton se numri i rasteve të reja për çdo vit rritet prej 10 milionë në vitin 2000 deri në 15 milionë të supozuar në vitin 2020.
Në aspektin mjekësor, kanceri është një term i përgjithshëm për një grup të madh të sëmundjeve dhe ka më shumë se 100 lloje të kacereve. Ajo njihet me terma si të tjerë si “tumore malinje” dhe “neoplazma”. Është rritja e pakontrolluar e qelizave dhe përhapja e tyre përtej kufijve të zakonshëm, të cilat mund të pushtojnë pjesë të tjera të trupit dhe të përhapen në organe të ndryshme. Kanceri mund të prekë cdo pjesë të trupit, mund të prekë të gjithë… të rinj e të vjetër, të pasur dhe të varfër, burra, gra dhe fëmijë.
 |
 |
 |
 |
Në Ditën Botërore kundër Kancerit, fushata e vitit 2015 do të artikulohet rreth katër fushave kyce të marra në fokus:
- Zgjedhja e një jete të shëndetshme
- Shpërndarja sa më herët e zbulimit, informacionit
- Arritja e trajtimit të të gjithëve
- Maksimizimi i cilësisë së jetesës
Disa mite rreth Kancerit:
Miti 1: Kanceri është vetëm një çështje e shëndetit. (E gabuar! Nuk është vetëm një çështje e shëndetit duke qenë se implikon dhe ka pasoja sociale, ekonomike.)
Miti 2: Kanceri është një sëmundje e vendeve të pasura, të moshuara dhe të zhvilluara. (Kanceri nuk diskriminon, ndaj një gjykim i tillë konsiderohet i gabuar. Është një epidemi globale që mund të prekë të gjitha moshat, të gjitha grupimet sociale në vende të ndryshme të botës.)
Miti 3: Kanceri është një dënim me vdekje. (Shumë lloje të kancerit tashmë mund të parandalohen dhe të shërohen.)
Miti 4: Kanceri është fati im. (Parandalimi është i mundur me anë të strategjive të duhura. Nëse merren masa ndaj faktorëve risk, si për shembull duhanit, rreth 30% e kacereve mund të parandalohen.)
