Ngjarja e rëndë që i mori jetën një gruaje 30 vjeçe me inicialet E.D mëngjesin e sotën në zonën e Freskut në Tiranë, ndodhi për shkak të një defekti teknik. Nga të dhënat paraprake mësojmë se flakët kanë nisur fillimisht nga një problem me rrjedhjen e vajit i cili më pas është nxehur nga lëvizjet e ashensorit. Kjo solli edhe zjarrin në strukture.
30 vjeçarja që u gjet e karbonizuar në ashensor, ka qenë duke hyrë për në banesë, pasi kishte bërë pazar dhe në dorë kishte çantat me ushqime. Gruaja ishte e martuar dhe me një fëmijë, ndërsa bashkëshortin e kishte në Gjermani. 30 vjeçarja u bllokua menjëherë brenda ambienteve të ashensorit pa pasur asnjë mundësi për të dalë. Banorët e pallatit ku ra zjarri tregojnë momentet e tmerrit tek sa dëgjonin fqinjen e tyre që thërriste për ndihmë.
“Ajo thërriste ndihmë, ndihmë, ndihmë por ne s’mund të bënim asgjë. Shtëllunga tymi dilnin prej ashensorit. Ne hodhëm ujë tek dera e ashensorit por nuk mundëm ta shqyenim derën!”
Forcat zjarrfikse mbëritën menjëherë në vendngjarje për të bërë të mundur shuajtien e flakëve por pa mundur shpëtimin e jetës së 30 vjeçares. Siç u konstatua nga ekspertët, vdekja e saj kishte ardhur nga asfiksia.
