Qeveria e Kosovës duhet që domosdoshmërisht ta shpallë “Trepçën” ndërmarrje publike në mënyrë që pastaj si shtet të përballemi me çfarëdo pretendime dhe të punojmë në mënyrë që këto pretendime mos të shëndrrohen në detyrime. Kështu ka thënë të premten deputeti i Lëvizjes Vetëvendosje!, Visar Ymeri, në seancën plenare të Kuvendit të Kosovës.
“Javën e kaluar i tërë spektri politik pajtoheshim se ka një rrugë të vetme përmes së cilës mund ta shpëtojmë ‘Treçën’ nga kthetrat e Dhomës së Veçantë dhe ta vendosim atë në funksion të zhvillimit ekonomik dhe në mirqenie të qytetarëve të Kosovës. Ajo rrugë e bënte ‘Trepçën’ ndërmarrje publike dhe i gjithë spektri politik mendonte kështu përveç një subjekti politik i cili nuk është i Kosovës pra, kreatura e Beogradit, Lista Serbe. Por të hënën në mengjes gjërat ndryshuan, si Lista serbe filluan të mendojnë edhe PDK-dhe LDK.
Qeveria dhe deputetët e saj na thanë që kjo nuk është rruga dhe u tërhoqën dhe kështu në mënyrë indirekte thanë se ‘Trepça’ nuk do të vendoset në funksion të zhvillimit ekonomik dhe mirëqenies së qytetarëve por në funksion të negociatave me Serbinë ashtu siç kërkoi Beogradi. Qeveria duhet që domosdoshmërisht ta shpallë ‘Trepçën’ ndërmarrje publike në mënyrë që pastaj si shtet të përballemi me çfarëdo pretendime dhe të punojmë në mënyrë që këto pretendime mos të shndrrohen në detyrime, ka thënë Ymeri.
Pal Lekaj, në emër të Aleancës për Ardhmërinë e Kosovës (AAK), tha se janë bërë shumë manipulime me deklarime se opozita po e përdorë grevën për qëllime politike duke shtuar se solidarizimi me minatorët ka qenë mjaftë i arsyeshëm, derisa bëhej fjalë për “Trepçën”.
Muhamet Mustafa, deputet i LDK-së, ka thënë se për ndërmarrjen “Trepça” nuk vendosin komunat, por Qeveria e Kosovës.
“Asnjë komunë nuk do të vendos për pasurinë e Kosovës. Për ‘Trepçën’ vendos Qeveria dhe atë me një ligj të veçantë. Qëllimi i tërheqjes së ligjit, është sqaruar specifikisht nga kryeministri dhe se vendimet Qeveria nuk i merre në gjendjen e nervozës ndaj deklarimeve të Vucic-it apo të dikujt tjetër”, theksoi Mustafa.
Ndërkohë deputetja e Partisë Demokratike të Kosovës (PDK), Flora Brovina, ka komentuar deklaratat e ministrit për Komunitete dhe Kthim, Aleksandar Jablanovic, duke thënë se ndjehet e shqetësuar për deklarata të tillë që vijnë nga zyrtarë qeveritar të Kosovës.
“Ky shqetësim është i arsyeshëm, u shqetësuam të gjithë nga një deklaratë e ministrit Aleksandar Jablanovic. Jam e shqetësuar si deputete, si ish- kryesuese e Komisionit për personat e pagjetur. Në kohën e vet ky komisioni bëri disa punë të arsyshme për personat e pagjetur. Serbia nuk kërkoi falje, as pas bisedimeve në Bruksel të cilat u quajtën të sukseshme”, tha Brovina.
Edhe deputeti i Lëvizjes Vetëvendosje!, Rexhep Selimi, ka kërkuar nga kryeministri Mustafa shkarkimin e ministrit serb Jablanovic. Ai i është drejtuar kryeministrit Mustafa duke e pyetutr nëse në anën e kujt është apo peshon një ministër i ardhur nga Serbia apo viktimat që i shkaktuan.
“Ose shkarkojeni ose ti bashkë me këtë ministër shkoni ku të doni dhe ikni prej kësaj qeverie”, tha Selimi.
Nait Hasani, deputet i Partisë Demokratike të Kosovës (PDK), ka thënë se do ta ngrisë një çështje, e cila është masakra e Dubravës.
“Ajo masakër, për çka ministrat thonë se nuk e kanë idenë për të po na fyejnë dhe përdhunojnë në formën më të ulët. Kemi edhe fotografi të një masakre, ku janë mbi 120 të vrarë, mbi 300 të plagosur e të burgosur dhe askush nuk ka marrë deri sot asnjë masë. Kemi ngritë edhe çështje ne Kuvend të Kosovës, kemi marrë edhe rekomandime nga kuvendi, kemi dhënë propozime këtij kuvendi, është angazhuar edhe EULEX-i, por as ai nuk ka marrë një vendim. Dhe sot, dhunuesit, poshtërueshit, fyesit na thonë se nuk dimë asgjë.
Për mua dhe për njerëzit që kanë qenë pjesë e kësaj masakre, asaj dhune e atij terrori dhe janë të papranueshme fyerjet e tilla që vijnë nga ministra për shqiptarët, për nënat, për fëmijët e prindërit. Thuhet sot se ne nuk dimë gjë kur kemi me qindra e qindra viktima është një turp. Është absurde qe Qeveria të sillet me neglizhencë dhe te mos merr masa. Kjo është një absurd i kohës”, ka thënë Hasani.
