U bënë ca kohë që Edi Rama në cilësinë e kryeministrit të Shqipërisë ka filluar t’i peshojë shumë ligjshmërisë së ligjit, detyrimeve të qytetarëve ndaj shtetit, por në fakt në çdo operacion të qeverisë që po bëhet në mënyrë të njëanshme po favorizohen persona të caktuar dhe aq më keq të atyre që janë me pushtet. Tipik ky është në rastin e aksionit të energjisë elektrike, ku ndonëse janë shoqëruar në paraburgim me qindra qytetarë dhe nga ata që nuk kanë bukë të hanë, biznesmenë apo drejtues të administratës dhe aq më keq drejtues të OSHEE-së që janë debitorë ndaj kompanisë së cilës i shërbejnë, nuk iu ka ndodhur asgjë. Kjo është padrejtësi!.
E ndërsa një nënë bashkë me fëmijën 5 vjeçe shoqërohet bashkë më të bijën në komisariat, një jetime në Fushë-Arrës po ashtu, një kryefamiljar nga Lushnja i jep fund jetës në paraburgim, një i ri babai i një fëmije në Kashar dhe në pritje të një tjetri mbetet në korent duke rilidhur energjinë, sikurse një grua në Durrës vdes teksa tentonte të rikthente energjinë, në Elbasan një gruaje i bie infarkt dhe vdes pas shoqërimit bashkë më bashkëshortin në komisariatin e policisë, drejtues të rëndësishëm në administratë e aq më tepër drejtues të OSHEE-së si në Tropojë, Lushnjë, etj, që i kanë me milionë lekë borxhe nga kompanisë të cilës i shërbenin pushohen dhe nuk iu ndodh asgjë! Të çosh sot qytetarët përpara dilemës të zgjedhin të rrinë në errësirë, ta rilidhin alternativën për të shkuar në burg, apo më keq akoma të vetëvriten duke mos pasur mundësi ta paguajnë, kjo është vërtet kriminale dhe aq më tepër kur në këtë operacion ligji zbatohet me dy standarde.
Çdo jetë e qytetarëve shqiptarë vlen më shumë se sa debia që ata mund t’i kenë shtetit apo dhe rilidhja e energjisë pasi iu duhet që fëmijët të mësojnë, e sigurisht që qeveria duhet të ketë prioritare jetën e tyre. Ndërkohë përpara se sa t’i kërkosh qytetarit zbatimin ligjit duhet që vet institucionet t’i kenë plotësuar atij nevojat për të cilat kanë funksionet bazë. Në rastin konkret OSHEE-ja duhet të jetë korrekte në përgjigjien ndaj ankesave të qytetarëve në kohën e caktuar gjë e cila nuk ndodh. Mos të rëntë të kesh një ankesë për tu paraqitur në zyrat e Kujdesit ndaj Klientit pasi aty është një torturë më vete. Ankohesh (për mbifaturim, kërkon të të bësh një kontratë të re energjie apo ndonjë gabim tjetër), një zot e di kur mund të marrësh përgjigjie.
Personalisht e them me bindje pasi jo vetëm jam një ndër personat që jam përballur dhe më është dashur që vetëm me mik të zgjidh problemin që kam pasur jo për fajin tim, por dhe kam parë me dhjetëra e qindra qytetarë që dynden me të tilla ankesa në zyrat e Kujdesit Ndaj Klientit. Ndërkohë, ndërsa OSHEE-ja me porosi të kryeministrit është sulur ndaj qytetarëve për të shlyer detyrimet më kërcënimin së në të kundërt i pret burgu, më duhet të konstatoj që në mjaft zona, jo vetëm thellë në Shqipëri, por dhe në Tiranë ka raste ku kompania e shpërndarjes së energjisë në këtë vite të tranzicionit nuk iu është gjendur aspak pranë me investime konsumatorëve dhe qytetarët janë detyruar të investojnë vet duke blerë tel, shtyllë dhe kabinë elektrike për t’u furnizuar me energji dhe gjithçka përmenda që qytetarët i kanë blerë vet, nuk figurojnë në inventarin e kompanisë. E ndërsa nuk i është ofruar asnjë shërbim, faturat iu ka shkuar sërish afrofe qytetarëve dhe pse kanë pasur një matës në shtëpi pavarësisht se energjia nuk iu ka shkuar as kilovolt as nevojitet.
E ndërsa kryeministri përdor nga mëngjesi në darkë fjalën burg përpara këtij kërcënimi duhej që mbi tavolinën e tij vartësit t’i kishin dërguar listën e debitorëve ku të evidentuar duhej të kishin ata që e vjedhin energjinë, ata që nuk kanë mundësi ta paguajnë pasi janë të papunë apo trajtohen me ndihmë ekonomike, për të pasur një trajtim të diferencuar në këtë rast. Mirëpo shefi i ekzekutivit jo vetëm nuk e ka bërë këtë gjë, por sot përballemi me një tjetër masë ndaj konsumatorëve qytetarë, me rritjen e çmimit të energjisë elektrike nga 7.7 lekë në 9.5 lekë duke rënduar më tej barrën qytetare.
Kjo ka ardhur në të kundërt të asaj që Rama premtoi në fushatën elektorale se do të ulte çmimin e energjisë elektrike duke hequr TVSH-në. Sot shqiptarët po përballen me të kundërtën e zotimit të Ramës: Çmimi i energjisë është rritur! Ndërkohë i pyetur disa herë nga gazetarët kryeministri dhe ministri i Energjetikës nuk thanë kurrë sa është detyrimi që konsumatorët familjarë i kanë OSHEE-së, por thonë një shifër të përgjithshme ku fusin dhe të tjera detyrime të bizneseve, kompanive, apo dhe institucioneve shtetërore dhe këtu nuk përmenden as humbjet!
Kur qeveria t’i këtë dhënë zgjidhje të gjitha këtyre përgjigjeve qytetare atëherë ndoshta ka të drejtë morale të kërkojë zbatimin e ligjit dhe detyrimeve ndaj tyre. Në të kundërt gjithçka bëhet nul.
