Vendimi, Drejtori i Policisë me privilegje si Kryeministri e Presidenti. Ja çfarë përfiton
Tani edhe kreu i Policisë së Shtetit do të ketë të njëjtat privilegje si kryeministri dhe Presidenti. Bëhet fjalë për një vendim të ditës së sotme të marrë nga qeveria për trajtimin e veçantë të drejtuesit të Policisë së Shtetit.
Vendimi i sotëm ka të bëjë me “Trajtimin e veçantë të Drejtorit të Policisë së Shtetit pas përfundimit të mandatit
Vendimi për këto privilegje është marrë me propozimin e ministrit të Punëve të Brendshme.
VENDOSI:
- Drejtori i Policisë së Shtetit, pas përfundimit të mandatit, gëzon trajtim të veçantë për:
- Ruajtje të afërt fizike
1.1. Ish-Drejtori i Policisë së Shtetit përfiton ruajtjen e afërt fizike, me shoqërues personal, për 2 vjet.
1.2. Shoqëruesi, që merret me ruajtjen e ish-Drejtorit të Policisë së Shtetit, është punonjës i strukturave policore për mbrojtjen dhe sigurimin e personave me cilësi të veçanta.
1.3. Policia e Shtetit merr përsipër caktimin e automjetit, të limitit të furnizimit me karburant dhe riparimin e saj.
1.4. Kur paraqiten rrethana që rrezikojnë jetën e tij dhe të familjes, i sigurohen pjesëtarët e familjes dhe banesa, për aq kohë sa ekziston ky rrezik.
- Trajtim financiar për kurim
Ish-Drejtori i Policisë së Shtetit, në rast sëmundjeje, brenda 2 (dy) viteve pas lirimit nga detyra, përfiton trajtim financiar për kurim në institucionet e kujdesit shëndetësor në vend ose jashtë vendit. Shpenzimet për kurim në masën 100 për qind përballohen nga fondet e Policisë së Shtetit.
- Përparësi për emërimin në funksione këshillimore apo funksione pedagogjike.
Drejtori i Policisë, pas përfundimit të afatit të qëndrimit në detyrë, në interes të shërbimit të rendit e të sigurisë publike, mund të kryejë funksione të këshilltarit të personave që kryejnë funksione kushtetuese apo funksione të tjera këshillimore ose pedagogjike.
- Efektet financiare, që rrjedhin nga zbatimi i këtij vendimi, sipas pikave 1 dhe 2, planifikohen dhe përballohen nga programi buxhetor “Policia e Shtetit”.
III. Ngarkohet Ministria e Punëve të Brendshme për zbatimin e këtij vendimi.
Ky vendim hyn në fuqi pas botimit në “Fletoren zyrtare”.
