Është duke vazhduar seanca për shqyrtimin e vendimit të masës së paraburgimit për personat e arrestuar një muaj më parë, me akuzën për rrezikim të rendit kushtetues të Kosovës, ku të përfshirë janë imam e hoxhallarë. Sipas mbrojtjes, deri në këto momente prokurori nuk ka paraqitur asnjë provë të re.
Fuad Ramiqi, Sabahudin Selimi, Eroll Nesimi, Idriz Bilibani, Leopnard Ruli, Dardan Gjuka, Shefki Koraçi dhe Bedri Robaj janë 8 nga 13 të arrestuarit një muaj më parë, që sot pritet të merret vendimi për ta.
Aktualisht për shumicën e të akuzuarve që janë brenda, ka rënë vepra rekrutim për terrorizëm.
Skënder Musa, avokat i Fuad Ramiqit, thotë se për shumicën e të dyshuarve nuk ka ndonjë dyshim të bazuar se kanë kryer veprat penale për të cilat dyshohen.
“Sot është duke u mbajtur seanca në bazë të aktvendimit të Gjykatës së Apelit e cila ka kthyer në rivendosje lëndën për shkak se nuk është arsyetuar dyshimi i bazuar mirë. Deri në këto momente prokurori paraqiti argumentet e tij dhe faktikisht ai nuk paraqiti asnjë provë të re, por vetëm i përshkroi një formë tjetër provat që i ka deponuar kur është marrë aktvendimi i parë për caktimin e paraburgimit. Ajo çka u vërejt për shumicën e këtyre njerëzve të dyshuar nuk ka dyshim të bazuarse kanë kryer veprat penale për të cilat dyshohen”, thotë ai.
Fuad Ramiqi, dyshohet të ketë kryer veprën penale thirrje për rezistencë, në bazë të nenit 411 të Kodit Penal të Kosovës.
E mbrojtja e tij, thotë se Ramiqi gjatë intervistës dhënë KTV-së, për çka edhe akuzohet, ka shprehur vetëm qëndrimet e tij kundër burgosjes në mënyrë arbitrare të njerëzve me bindje politike e fetare.
Ai konsideron se kjo është në kundërshtim me nenin 30 të Kushtetutës së Kosovës.
“Ne konsiderojmë se është në kundërshtim me nenin 30 të Kushtetutës së Republikës së Kosovës, e cila garanton të drejtën e lirisë dhe shprehjes për të gjithë personat pa asnjë kufizim, në asnjë rast nuk ka bërë thirrje për rezistencë gjatë intervistës, vetëm ka shprehur brengën e tij për veprimet e organeve shtetërore të Kosovës të cilat në një moment të caktuar i ka quajtur se ngjajnë me diktaturat absolut nuk është e ndalur”, thotë ai.
Sipas tij, këtë formë të retorikës në Kosovë janë mësuar ta shohin edhe nga LDK, AAK e VV. Siç thotë ai, këto në mënyrë unanime kohëve të fundit akuzojnë PDK-në për kapje të shtetit. Musa vlerëson se edhe deklarata e të mbrojturit të tij është në vazhdën e partive opozitare që në një formë ka referuar se në Kosovë është vendosur një lloj diktature. Ai thotë se shprehja politike dhe akuzimi i institucioneve qeveritare nuk është e ndaluar.
Avokati Musa ka kërkuar nga prokurori që të heq dorë nga masa e paraburgimit, të paraqesë propozim në gjykatë që t’i zëvendësohet ajo masë me ndonjë masë tjetër.
Sipas tij, prokurori duhet të heq dorë nga ndjekja penale sepse nuk do të arrijë të vërtetojë dyshimin.
Gjykata Themelore në Prishtinë dy ditë pasi u arrestuan të dyshuarit, pra me 19 shtator, ua caktoj masën e paraburgimit për 30 ditë. E tani pritet që nga kjo seancë të vendoset se a do të u vazhdohet masa e paraburgimit apo do të u caktohet ndonjë masë tjetër.
