“Për kombëtaren Kuq e Zi gjithë shqiptarët bëhen një”. Ishte kjo thirrja e të rinjve shqiptarë që protestuan sot në Tiranë para Ambasadës së Serbisë.
Me këtë tubim paqësor, Klubi i Patriotëve të Rinj, kërkoi nga autoritetet politike serbe të tërhiqen nga deklaratat antishqiptare të ditëve të fundit.
Duke mbajtur parulla shprehjen e Papa Françeskut se “Shqiponjat duhet të fluturojnë në qiell” dhe vargjet e Naim Frashërit dhjetëra të rinj deklaruan krenarinë e të qenit shqiptar.
Albano Idrizi, përfaqësues i Klubi të Patriotëve të rinj tha në emër të protestuesve, se e gjithë bota e pa se çfarë ndodhi në stadium, ndaj dhe Serbia, sipas tij duhet të kërkojë falje për incidentin që ndodhi në Beograd.
Por, protestave për kombëtaren shqiptare i janë bashkuar sot në Tiranë edhe një grup gjimnazistësh të Tiranës dhe të Podujevës.
Me iniciativën e tyre, pas mësimit ata janë mbledhur para Piramidës për të protestuar kundër sjelljes që iu bë kombëtares shqiptare në Beograd.
Bashkë me të rinjtë nga Tirana janë bashkuar edhe një grup nxënësish të ardhur nga Podujeva.
Në fakt këta të fundit ndodheshin në Tiranë për një ekskursion nga shkolla ‘Aleksandër Xhuvani’ në Podujevë dhe kur kanë parë se protestohej për kombëtaren shqiptare, i janë bashkuar protestës për pak minuta.
Ndërsa një i ri nga Podujeva, Muhamet Ejupi tha se ndodhet në Tiranë për një ekskursion me shkollën, por kur pa se po protestohej për të mbrojtur kombëtaren shqiptare, vendosi dhe ai ti bashkohej të rinjve të tjerë.
Ndryshe, protesta u mbajt pasi dy ditë më parë u ndërprere ndeshja Serbi – Shqipëri, ku lojtarët shqiptarë u sulmuan nga tifozët dhe policia serbe.
