Nga hetimet rezulton se çifti dhe një person tjetër shkuan në lokalin e muzikës live. Sherri nisi, sepse njëra nga palët porositi një këngë, e cila nuk u vu. Policia arrestoi mbrëmë autorët
Konflikti mes të fejuarit dhe djalit të menaxherit. Arrestohen dy autorët
Ardi Hoti
Një ditë pas ngjarjes së rëndë, ku vdiq një vajzë në Kryebushat të Shkodrës, policia zbardhi dinamikën e plotë të saj, ku rezulton se 20-vjeçarja kishte shkuar në lokalin me muzikë live, bashkë me të fejuarin dhe bashkëfshatarin e tij. Konflikti nisi pikërisht mes dy meshkujve dhe djalit të menaxherit të lokalit dhe përfundoi me të shtëna kallashnikovi, prej të cilave vajza mbeti e vdekur dhe i fejuari u plagos, bashkë me menaxherin e lokalit, i cili ndërhyri për të shuar sherrin. Nga ana tjetër, policia identifikoi dhe shpalli në kërkim dy autorët e ngjarjes, teksa mbrëmë në orët e vona ata janë vënë në pranga. Ndërkaq, të plagosurit po mbahen nën ruajtje nga policia, për të shmangur një hakmarrje të mundshme. Mes 15 të shoqëruarve si persona që kishin parë ngjarjen, është edhe një person që dyshohet se ka bashkëpunuar në këtë krim.
Ngjarja
Policia thotë se ka identifikuar dhe shpallur në kërkim dy nga autorët e ngjarjes, të cilët janë shtetasi Mirsad Aleti, nga fshati Bërdicë, në Shkodër dhe shtetasi Valentin Toma, nga fshati Kaç i Komunës së Vaut të Dejës. Ata u arrestuan mbrëmë në orët e vona. Nisur nga hetimet e para, policia ka arritur të krijojë dinamikën e ngjarjes, duke dhënë një nga versionet më të mundshme, mbi të cilën po hetohet. Kështu, sipas kronologjisë së ngjarjeve, mësohet se shtetasi Paulin Ndoja, 34 vjeç, i cili lëvizte me një automjet tip “BMË” X5, me targa SH 6969E, ka ardhur me të fejuarën, shtetasen Elsa Tusha, dhe bashkëfshatarin e tij, Valentin Toma, 31 vjeç, në ambientet e lokal “Argeni”, në Kryebushat. Në atë lokal kishte muzikë live dhe një numër i konsiderueshëm personash ndodheshin brenda. Një orë pasi kanë qëndruar në këto ambiente, çifti i të fejuarve dhe shtetasi tjetër nisën një konflikt me Mirsad Aletin. Sherri nisi fillimisht me sharje dhe fyerje dhe si shkak u bë fakti se njëra nga palët porositi një këngë, e cila nuk po këndohej. Policia sqaroi edhe pozicionin e shtetasit Mirsad Aleti në këtë ngjarje, duke thënë se babai i tij, Selim Aleti, 56 vjeç, i cili mbeti gjithashtu i plagosur, punonte si menaxher në këtë kompleks. Konflikti mes shtetasit Mirsad Aleti dhe dy personave ka vazhduar në ambientet e brendshme të lokalit. Më pas, sherri ka vazhduar jashtë këtyre ambienteve, ku sipas policisë, mes palëve ka pasur shkëmbim zjarri. Në këtë moment, ka ndërhyrë babai i Mirsadit, shtetasi Selim Aleti, për të ndalur konfliktin, por mbeti i plagosur me dy plumba. Më pas, shtetasit Paulin Ndoja, Elsa Tusha dhe Valentin Toma iu drejtuan automjetit, për t’u larguar. Por, në këtë moment, në drejtim të makinës është qëlluar me breshëri automatiku, teksa në sediljen e pasme ndodhej 20-vjeçarja Elsa Tusha, e cila ka marrë disa plumba në trup dhe për pasojë ka gjetur vdekjen, brenda pak minutash. Ndërkaq, u plagos i fejuari i saj, Paulin Ndoja. Ndërsa personi tjetër, që ndodhej me ta, Valentin Toma, ka arritur të largohet nga vendi i ngjarjes. Gjithashtu, pas të shtënave, është larguar në drejtim të paditur edhe Mirsad Aleti.
Hetimet
Ndërkohë, dy të plagosurit janë dërguar në urgjencën e spitalit, ku u janë nënshtruar ndërhyrjeve kirurgjikale. Sipas mjekëve, dy të plagosurit e kanë kaluar rrezikun për jetën dhe aktualisht janë duke u ruajtur me shërbim 24 orësh nga policia, në cilësinë e personave që kanë dijeni për ngjarjen, si dhe për të parandaluar ndonjë përplasje mes të afërmeve të dy palëve në konflikt. Ndërkohë, policia ka arrestuar mbrëmë 2 personat e shpallur në kërkim shtetasit Mirsad Aleti dhe Valentin Toma. Gjithashtu, nga kontrolli i ushtruar në banesën e shtetasit Valentin Toma, policia ka gjetur dhe sekuestruar një mjet tip prese që, sipas policisë, dyshohet se shërben për presimin e lëndës narkotike kanabis sativa. Shoqërimet në polici të personave që dyshohet se kanë dijeni apo lidhje me ngjarjen kanë vazhduar dhe gjatë ditës së djeshme, ku numri i të shoqëruarve ka shkuar në 15 persona. I shoqëruar ndodhet edhe Paulin Toma. Të shoqëruarit kanë dhënë deklarime në lidhje me ngjarjen dhe, sipas tyre, gjithçka ka nisur për një motiv banal mes palëve. Ndërkohë, një nga të shoqëruarit është duke u mbajtur në ambientet e policisë, pasi dyshohet se ka bashkëpunuar me njërin nga autorët në këtë ngjarje.
